المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 262:
معتز: واش لعريس مانجيبوش غدوة شيخ نزهاو شوي...
أيمن: لا شيخ لازوج عشاء خفيف وخلاص طبق يشيح...
حمزة: وعلاه خلينا نزهاو عندنا مدة على لعراس...
ايمن: في عرسك دير وش تحب... انا خلوني هك راني مليح...
سفيان: وراس صاحبي غدوة نجيب شيخ ونحفلوها لصباح وماكانش اعتراض...
أيمن: يهذيكم ربي لولاد... خليمة مسكينة وحدها لا والي ولا تالي... وزيد ماعملتش حسابها لحتى حاجة... حتى لحلوة ماطيبتش قلتلها غير اشري شويا لينا حنا في بعضنا وخلاص...
حمزة: ساهلة حكاية لحلاوات غدوة صباح يكون عندك مشكلين ملونين...
معتز: هيا صحبة ما تمسطهاش...
ايمن: اوووف وش راح نقلكم نسمع حليمة دوخ...
سفيان: يا ولدي نديروها لبرا في لحومة... نغنو شوي ونشطحو شوي ناكلو حبات بقلاوة...وتخرج حليمة نحنيلك نزهاو وتخلاص نروحو كل واحد على روحو...
ايمن: وش راح نقلكم ربي يسهل... ديرو الي تحبو عليه انا خاطيني تفاهمو منكم لحليمة...
معتز: غدوة صباح نطب عليها نقنعها...
ايمن: مافهمتش من خرجتولي بيها لحكاية...
حمزة: والله ارجلة غير مدة مازهيناش...
ايمن: ربي يسهل
معتز: والعروسة تجيبها بعد غدوة عشية ولا في الليل...
أيمن: اواااه تعمل عرسها وفي الليل خلاااص نخرجها ...
معتز: ايه باه نوجدولك كورتاج علامة ولد امو ماداروش...
ربثلو على رجلو: يعطيكم صحا رجلة... والله بلا بيكم مانعرف وش كنا نعملو...
حمزة: هاي لهدرة لخاسرة الي مانحبهاش... ما بيناتناش اراجل...
فاتت مرة على مرة يجبدو على حكاية... من بعد كل واحد روح على روحو...تمد على فوتاي نتع صالة... هز تلفون بعتلها ميساج...
حمزة«وش راك تعملي » هز تليكموند يدور في tv وتلفون في يدو يستنى فيها ترد... شوي وصلو ميساج...
ياسمين «راني مع مريضة جاتنا في حالة»
تبسم وعاودلها مدة هزت مزالها تحكي مع ام لمريضة... كمل يسمع فيها فرحان بيها
ياسمين: ايه تكمل بلfucidine مع biafine pommade... لكان تنحات علبها مليح لكان ماتنحاش نبعتها لطبيب جلد...
###: باركة الله فيك حكيمة...
ياسمين: بشفاء عليها ( خرجت من عندها و حطت تلفون في وذنها تحكي ) حبي لباس سامحني خليتك تستنى...
حمزة: احلى كلمة خرجت من فمك... انتي الي حبي وعشقي وزهرتي وطبيبة قلبي وكل شيء...
ياسمين: هههه راح نديها في روحي هك...
حمزة: غير مكلاه حطي رجلك في لارض...
ياسمين: حمزة
حمزة: اممم...
ياسمين: وقتاه تفرغ نخرجو عندي مانحكي معاك...
عقد حواجبو يحكي: علاه غير الخير سمونتي... كشما كاين؟
ياسمين: نو ماكانش غير توحشت راجلي نحب نحكي معاه... تولهتي من تخطبنا عدنا كلمة وقص...
حمزة: عندك الحق بصح تعرفي لاتي مع ايمن عرسو وجري... راك فاهمة من غير مانقلك...
ياسمين: فاهمة وراس حبي فاهمة... اما (سكتت)
حمزة: ياسمين خلينا رايضين مانبداوش بلمشاكل من درك... هما يومين ونلتى لعمري... وزيد عرسنا قرب حتى هو...
ياسمين: اممم هذا هو المشكل لكبير...
حمزة: علاه وشمن مشكل فيه...
ياسمين: خلينا مش وقت لحكايات هذو... وقت نتلقاو نحكو اوكي...
حمزة: هيا باهي اسيدي... ةانت درك عندك خدمة بزااف؟
ياسمين: درك عادي مش حاجة...
حمزة: نفوت نروح بيك غدوة...
ياسمين: لا خلي برك صاحبك اولى...
حمزة: راح نرجعو لنفس لحكاية...
ياسمين: اممم...
حمزة: يهديك ربي راه صاحبي مش صاحبتي حتى تغيري...
ياسمين: نغير ماتسالنيش...
حمزة: ههههههه بصح كان شرطك 10 خطوط تحت نساء مش رجال...
ياسمبن: بدلت راي...
طرشق بضحك عليها خلاها حتى هي تضحك معاه...
ياسمين: ههههه احم حبي راجعة لخدمة تستنى فيا... وغدة ماتعبش روحك يارب تلحقو مع جري نتع صاحبك...
حمزة: يعيشلي الحب الي يفهم... تصبحي على خير...
ياسمين: باي وانت من اهل الخير...
