المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 270:
حاكمة في يدين خوها الي معبطها في دروج دارهم... ويهى عاملة حالة بتزغريت... هي خرجت وضربو البارود ولاد عمها باباها واقف بعيد يشوف مش قادر يقربلها... وصلها لطموبيل مغطية بكلها (صورة لتحت )... حاصرة دمعتها مش حابة تبكي باه ماتفسدش مكياجها ماشطة توصي وتعاود... ركبو معاها سهى من لوراء... وماشطة وحويجها ركبوها مع طموبيل اخرى... وخرجت على صوت لكلاصون الي عمل حالة مسافة طريق ووصلوها لصالة نفس شيء لبارود يتكلم وحدو... هبطت حاكمة في يد خوها الي طلعها لفوق من الباب وهبط... وهي لقات امها ومريم وجوجيتا الي هازة شمعة وشمعة لخرى مدوها لسهى... واقفة ترجف والماشطة قدامها رافعتلها دراية عليها باه تقدر تشوف... شعلولهم الشمعات يتمشاو بيها على غناية وياصلاة على محمد... وصلوها وحطوها في بلاصتها جوجيتا قعدت من جنبها لايمن وسهى من جنبها لاخر... قربت حليمة مع زهرة لطاولة... وامها ومريم فوق روسها متبعين كل شيء... بدات حليمة تحرك في لحنة في طبق بزهر حطت شمعة وشعلتها... قربت لجميلة حمت يديها ليمين وحطتلها طرف من الحنة وفوقها لوزيزة ذهب وغطاتهالها واليد لخرى نفس شيء... من بعد هزت هذاك دراجي ورمات شوي عليها وشوي على صبايا خلاتهم يضحكو(هذي عادتنا ماتضحكوش انتم ) نحاتلها درايا تشوف معاها وتصلي على نبي ... هزت هذاك طاقم نتع ذهب توري فيه لناس والفقيرة تشيد بيه... صور كامل معاها من عيلتها ومن الي جاو مع اهل ايمن... امها هزت هذاك طبق وهربت بيه خباتو وقفلت عليه الباب... دورتها الماشطة على صالة باه يشفوها الحاضرين ... ودخلتها لبيت لعروسة اول ماذخلت نحات طالونها تحكي...
جميلة: اااه يايما قريب ندوخ...
م: شيء طبيعي لعرايس الكل تعدي بشيء هذا...
جميلة: والله غير قلبي قريب يخرج
كملو حكايات بدلتلها مكايتجها لبستها لبسة ثانية... دخلت فوتوغراف صورتها بيها كل مرة تقلها ديري وضعية... ومن بعدخرجتها الماشطة حطتها وسط الصالة تلمو عليها العايلة يشطوح معاها كل مرة يعلقولها دراهم في رقبتهاويصورو معاها ... مدة من بعد قربت منها الماشطة نحات هذوك دراهم ومدتهم للفقيرات... وحكمتها من يديها دخلت للبيت... وهما في هذا الوقت لفقيرات لمت حوايجها روحت وبدات في بلاصتها dj... حطو لعشاء الي كان (شربة فريك..طاجين مرڨاز...طاجين بونارين وبوراك سلاطة مشكلة مع فاكهةمشكلة ثاني وكوكاولا...«هذا وش حطيت في عرسي ههه»)... خرجت جميلة بالكراكو العاصمي(كل وحدة وش تحب تلبس ) قعدت في طاولة مع بنات خالتها وعماتها تعشات معاهم في جو من ضحك وكل هذا شيء كان مصوراتو... كملو عشاهم وناضت شطت على غناء عاصمي دايرين بيها لبنات زغاريت ماحبستش.... بعدها رجعت لبيتها وين غسلت روحها وبدلت ماكياجها وقت فستان الابيض... قلبها دقاتو زادت واقفة مع لمرايا تشوف مع روحها ووراها وقفة ماشطة تركبلها في طرحة... دارت شافت معاها...
م: شفتي باربي انت جيت احلى منها...
جميلة: زعمة نعجبو...
م: يابنت اليوم يهبل عليك مش غير...
دخلت امها الي من شافتها وتطرشق بلبكاء حتى خلتها تبكي معاها...
جميلة: علاه تعملي فيا هك...
فضيلة: والله ماقدرت من صباح حاكتها بنتي كبرت وراح تخليني...
جميلة: مانيش راح نبعد انت قوليلي ارواحي 10 دقايق نكون عندك...
حطت يديها على خدها فضيلة: ربي يهنيك بنتي... ماتنسيش وش وصيت... راجلك حبيه وصونيه هدرتكم ماتخرجش برا... قالك نخرجو قلو ايه من غير ماتناقشو... لصانك تحكميه... يقلك راجلك على واه توالفيه وولدك على واه تربيه... امو هي امك درك مانخبش بنتي تغلط فيها...
جميلة: من غير ماتوصي ماما
فضيلة: يالا ايمن بحدا الباب راح ندخلو باه تصورو وبخرجك...
حركتلها راسها بعدما ودعت الماشطة دخلت الي تصور ووراها ايمن... الي عينيه تفتحو اول ماشافها... قرب هز طرحة من على وجها وباسها على جبينها...
ايمن: بإسم الله ماشاء الله...
هبطت عينيها حاشمة وشافت مع فوتغراف الي كل مرة تقلهم ديرو وضعية... من بعد خرجت وخلاتهم وحدهم...
هز يديها الي يرجفو باسهم وباسها على خدها مقرب لوذنها وشوشلها: ملاكي وقت نروحو...
حركتلو راسها وهزت برنوس باه تلبسو عونها ربطاتو وهبط طرحة على وجها...بعد عليها شبك يديه مع يديها وحل الباب وخرج قابلاتو امها وامو والقراب واقفين يستناو فيهم... خرجها على صوت زغاريت حكم فاليز تعها من عند سهى وهبطها معاها... وصلها لطموبيل لولاد عملو حالة بفلومبو والبارود... ركبها ورجع ركب بحداها... طموبيلات قبلو وبعدو درجات نارية كورتاج كبير رايح يوصلوه للوتال... شاف معاها ومع يديها الي ترجف حكمها يرص عليها..
ايمن: جميلتي على الخوف هذا الكل ياك معايا...
عضت على شفتها من غير ماتحكي زادو دقات فلبها وقت دور المفتاح وديمار طلعت راسها شافت مع باباها وخوها الي كانو واقفين يشوف مع طموبيل تعها وقتها دموعها طاحو من غير حبسة...
