المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 265:
عند جميلة...
امها من حاجة لحاجة تدور معاها خواتتها ونساء خواتها واقفين في الكوزينة... بدات تحط في لعشاء لرجال من صباح يعيطو عليها وجدت سنيات الي تحط فيهم... سلاطة وموناد خبز ولعشاء كان (لوبياء بيضاء بلكرشة هذي عداتنا في عنابة )... حطولهم تهناو منهم بعدها بداو في نساء...
فضيلة: ياختي غلبت صح اليوم... ومزال لخدمة لفوق راسي...
سليمة: هذي لعراس تعب فوق الحق...
فضيلة: تهون غير ربي يهنيها برك ... هات بحداك صحن نتع سلاطة...
دخلت سهى: طاطا خصنا الماء مكانش عند نساء...
فضيلة: وش اخر ناقص...
سهى: غير الماء برك اصلا مابقاش بزااف...
فضيلة: وين راهي مريم...
سهى: ماشفتهاش بانتلي طلعت ترقد في ادم...
فضيلة: مسكينة حتى هو عذبها وبابا حلف لا يحكمو...
سمية والله يا فضيلة ختي نحير في رجال كفاه تحرن وقت لمة...
فضيلة: ربي يهديه برك مصطفى...
زادت رجعتلها: طاطا لازم مائدة نتع 5 اخرين وهك نبقاو غير حنا نتعشاو هنا...
سليمة: شوفي منال تعاونك...
عوجت سهى فمها: اي تتعشى مانقدرش نوضها...
فضيلة: سهى خليك الباقي ندبر راسي فيه مع لبنات... اطلعي تعشاي مع جميلة وحتمي عليها بسيف تاكل... وشواء هذا ليك وليها...
سهى: يعيشك طاطا حتى انا تعبت نرتاح شوي مزالت سهرية...
هزت من يديعا وطلعت لعند جميلة طبطبت عليها بلمرفق.. شوي وحلت...
جميلة: واخيرا جيتي...
سهى: يابنت ماقعدناش خلاص (حطت سنيوة فوق طابل دونوي ) هيا ناكلو من بعد نحكو... جميلة: والله ماني قادرة قلبي داير عليا...
سهى: ماتقوليش سقام لعرايس مانامنكش...
جميلة: مانيش في وقت تمسخيرك انادرك...
سهى: ارواحي كولي حتى طرف شواء... راني مانظمنلكش نخليلك حاجة...
قرلت هزت طرف كبدة كلاتو وشربت وراه الماء...
طلعت فيها حاجبها سهى: تتمسخري بيا هذا برك؟
جميلة: هك يكفي مش قادرة ناكل حتى لعسل...
سهى: زيدي حتمي على روحك...
جميلة: خلاص هك برك... شوفي سوسو راح نلبس قندورة هذي معاها اكسسورات هذو نحطهم على شعري ... قاعدتلي حيرة نلبس صابو شفاف ولا ذهبي ...
هزت عينيها فيها وهي تمضغ يابنت شفاف احسن نقلك راح تخرجي تحفة كون جاء ايمن لهنا اليوم يخطفك...
جميلة: هههه ماتفركينيش فيه اليوم نهار كامل ماحكيناش...
سهى: خير ماتقوليش تعاركتو...
جميلة: اي لاااا... من نعيط هو ما يهزش والعكس...
سهى: هههه يكون لاتي في لعرس... مابقاش غدوة تكوني عندو...
جميلة: ايه ان شاء الله تفوت على خير...
فات الوقت وكمل لعشاء لبنات تلمو كل عند جميلة لبسو وعدلو... وهي قعدت لخرى مريم حطتلها مكياج خفيف باه يسر وجها غدوة... خرجو الكل هبطو يوجدو في سهرية... كما موصيتهم ولغناء الي يحطوه...
لبست قندورتها المطروزة وحطت فوقها سخاب طلعتلها شعرها لفوق ملموم كامل حطت فوقو اكسسورات صغار... هزت برفانتها دارت منها وهبطت لبست في رجليها... شافت مع روحها في لمرايا فرحانة وخايفة في نفس الوقت... هزت تلفونها عملت سلفي وبعتتهولو مع ميساج صغير «عروستك يوم حنتها »... ماستناتش يرجعلها حطت رقم يهى عيطت ليها تطلع هي ومريم مع شموع...
وهذاك الي كان دخلو عليها بصلاة على نبي وزغاريت امها الاولى ووراها لبنات يزغرطو... قربتلها عينيها مليانين دموع سلمت عليها...
فضيلة: بإسم الله ماشاء الله على بنتي راح تخرج عروسة... ربي يحفضك من العين يارب...
تبسمت ليها حاكمة بكيتها: ربي يخليك ليا ماما...
مريم: يالا نهبطو لبنات لخرين راهم يستناو لتحت هزين شمعات...
حركتلها راسها ومشات قبلهم يديها في يدين امها... مشية رزينة وصلت تحت عند لبنات وهولوها بزغاريت وحطولها غناية منال عمارة الليلة عرسي... دخلت مهبطة راسها الكل حل فمو فيها هي بلا زينة ومليحة يا وهي محرقصة وعادلة... قعدوها على لفوتاي قدامها ينية الحنة والحلوة اشكال والوان... شطحو لبنات شوي وهي غير تتبسم قلبها راح يخرج من بلاصتو...
فضيلة: يالا سليمة اختي حطيلها الحنة على الفال...
قربت بحداها خالتها حطتلها في كل يد دائرة صغيرة وغطاتهالها... وحطت للبنات كامل شوي شوي على لعادة...ونوضوها معاهم يشطحو على لغنايات الي حطوهم... يصورو في كل لقطة عملوها...
