المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 267:
حمزة يحكي...
فوتنا سهريا هبال... من مدة ماتلميناش كامل وعملنا ڨصرة كما البارح صح تعبنا وبزاااف وصرفنا بزاف اما خونا ايمن يستاهل اكثر من هك... شيء الي درناه معاه وقليل ثاني... روحت الفرقة وبدات تتفرق الحالة بقينا غير حنا في حنا كل واحد ترمى على كرسي يرد في نفس ويرجع شوي من القوة الي خلاصت... وقفنا كما هكذاك نميلو ونطيحو كملنا لمينا الحالة هزينا لكراسة حطيناهم على جنب وفكينا هذيك الخيمة... دخلناها لدار ماتدريش وش يصرا... وقتها كل واحد طلع روح... وعدتخا نعيطلها اما وصلت 3 نتع صباح مابقاش فيها... ترميت بيا بحوايجي ماقدرتش نزيد نحرك صبع حتى معتز نفس شيء... ماحسيت على حتى حاجة غير وقت سمع حس لولاد برا ومنهم معتصم متعاركين على بالون... نضت حيط يدي ولاخر يجيب عينيا ماقفولين حتى وصلت لطاقة حليتها عيطت عليهم حتى فجعتهم... سكتو راجعين يلعبو رجعت لبلاصة تنفضت فوق سرير وجبدت تلفون من فوق طاولة... فتحت عين وقفلت لخرى نشوف في ساعة تنفضت وقت لقيتها 10:30... ضربت معتز بلمخدة...
حمزة: نوض ا### راح عليك الحال على لخدمة....
معتز: اوووه ا### على صباح مانيش رايح...
حمزة: نوض راح يرموك برا من كثر غياباتك...
تقعد ينفخ حط لمخدة فوق حجرو: علاه اربي هك مازلت ماشبعتش بنوم...
حمزة: ايا نوض برك دوك نوصلك في طريقي اني رايح لتم...
معتز: اممم دوك رجلك خفت على سبيطار...
حمزة: ايا نوض بلا حلان فم...
نضنا لزوج عملنا روتين العادة وبدلنا وخرجنا... طول لسبيطار ڨاريت في باركينغ... هو هبط وانا طلعت طول لعندها ماحبيتش نعيطلعها نعرف نلقاها متغشة مني... سقسيت عليها قالولي في بيروها... من غير ما ندق على الباب دخلت طول نحكي...
حمزة: سلطاااااانتي متغشة اكيد...
هزت راسها حطت يديها على قلبها تحكي...
ياسمين: ربي يهديك والله وشبيك هك...
قرب جيهتها وقفها سلم عليها: صباح الخير الحب...
ضربتو على صدرو مبعداتو: ماتحكيش معايا انا درك...
حمزة: علاه وشبيها مغشة طبيبة تاعي...
قعدت على لكرسي هبطت راسها مع الي في يديها: سوف روحك مبيتني ليلة كاملة نستنى فيك نعيط ونعاود...
رجعلها خصلة من شعرها لوراء ورفعلها دقنها: وراس سلطانتي غير كملنا مع 3 نتع صباح ترميت طول رقدت حتى قشي... يزيك بلا تشناف والله ماناقص غشك...
ياسمين: بصح من تخطبنا وانا نقلك نحب نحكي معاك تلقالي الف عذر...
حمزة: علاه اسيدي نلقالك في الاعذار ياك قتلك راني مشغول مع صاحبي احسني عوني شوي...(وقفت بعدت عليه)
ياسمين: اوكي ماعدتش نقلك نحكي خلاص ممكن انا زدت فيها...
وقف وراها حط دقنو على كتفها من غير مايلصق فيها واخد مسافة...
حمزة: وشبيها مريتي وش حابة تحكي...
ياسمين: معليه نزيد نصبر يوفى لعرس نتع صاحبك.. ونحكو اوكي،...
حمزة: لا ماعنديش منك عشرة احكي نسمع فيك...
دارت جبداتو من يدو وقعداتو وقعدت مقابلاتو...
ياسمين: راح نقلك من الاخير... تنازلت على دعوة الي بيني وبين الياس... بقات مشكلتو مع دولة لتزويرو للاوراق هكذا خبرني المحامي...
عقد حواجبو شاف معاها مدة: وهذا شيء مقلقك ولا مافرحك مافهمتش بانتلي احسن قرار خديتيه... انك تنازلتي علىةدعوة هك يبقى لمولاه ويتحمل مسؤوليتو غلطتو...
هبطت راسها تلعب بصوابع يديها: خفت تتغشش وقت ماشاورتكش... لانو ليمات الي فاتو كل كنت لاهي...وبابا ضغط عليا نسقط دعوة لانو الوقت مش لصالح الياس...
حمزة: بصح هذا موضوع يتعلق بعايلتك...عليك تخبريني مش تتناقشي معايا فيه اوكي حبي... مانيش غول حتى تخافي مني يكفيني لاحترام الي بينا
حركتلو راسها متبسمة: يعيشلي راجلي... اما وهك نحبك تسامحني عملت خطوة وانت ماكنتش حتى تشاركني فيها...
حمزة: تعرفي بالي نحبك وكل مرة نتاكد من حبي ليك واني نكون معاك اكبر نعمة عطهالي ربي...
هبطت راسها حاشمة: وانا من اول ماشفتك كنت متاكدة انك راجل المناسب ليا لولا فارق لعمر الي فشلني نكون معاك وخلاني نيأس ... اما #المكتوب عطى كلمتو وخلاني نكون ليك ومن غير منازع...
تبسم بشر ووقف ضرب على رجليه: اهااه راه بدا العد تنازلي (غمزها راح لباب)
ياسمين: لواااش...
حمزة: الي بالي بالك حبي...
ياسمين: حرام عليك كون خليتينا نزيدو فيه شوي...
حمزة: نو دبري على روحك انا عرسي نديرو في وقتو... هيا سلام نكمل قضياتي...مزال اليوم برك ونتلهى بحبي اوكي...
ياسمين: اوكي تهلالي في قلبي...
تبسم ليها: في عينيا....
