💎المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 283:
بعدما رتاح في بيتو... هبط للكوزينة لقاها مظلمة فوت يدو على شعرو... طلع راسو لأعلى دروج... كانت خيالها في دار محسسهم بلامان... تنهد لبس فاست وهز parapluie خرج قدام الباب وفتحها لمطر خيطين من سماء... خرج تلفونو وطلب ايمن شكون من غيرو يقدر يفهمو... حمحم وقت سمع صوتو...
حمزة: سلام
ايمن: وعليكم سلام وش حوالك رجلة...
حمزة: حمدالله على كل حال... قلي فارغ نڨصرو شوي...
ايمن: ايه هاني جاي...
حمزة: اني بحدا باب دار...
قطع تلفون وحط في جيبو... جبد ڨارو شعلو وجبد منو... يشوف مع الي رايح ولجاي... هز راسو على الباب نتع ايمن كما خرج... قربلو سلم عليه وكمل يتكيف...
ايمن: هبطنا للقهوة ولا تحب نهبطو للڨراج عند سوفي...
حمزة: اطلع في طموبيل برك مش قادر نهبط للقهوة...
شاف مع وجهو مش عاجبو حركلو راسو وطلعو لزوج في طموبيل...
ايمن: غير لخير خويا وش كاين...
تنهد من اعماق قلبو حل كارو نتع طموبيل ورمى دخان وعاود قفلها... يضرب بصوابعو على فلون...
حمزة: تأكدنا من مرض الوالدة...
ايمن: عندها سرطان؟
حمزة: امم عندها نحس في يديا ورجليا مقصوصين...
ايمن: مزالني مش مأمن خالتي وردة لمراة لقوية هذيك يطيحها لمرض...
حمزة: انا منيش مصدق...
ربثلو على رجلو: ابتلاء من عندي ربي متقنطش من رحمتو... خلي ايمانك بيه قوي عمرو يخيبك... وخالتي وردة راح تبرا وترجع احسن من قبل..
حمزة: هذا الي نتمناه...(سكتو لزوج مدة...لا أيمن قادر يخفف عليه ولا حمزة قادر يحكي...)
حمزة: الاصعب العرس ولعقود سمانة جاية... ماعرفتش وش نعمل وزيد متعاركين من عرفت بالي خبات عليا مرض يما... وانا مش قادر نحكي معاها...
ايمن: من نيتك حمزة طفلة خبات عليك لانهم هما الي قالولها مش هك قلتيلي... تحبك وفي نفس الوقت كانت مخيرة ماتحكمش عليها من وجهت نظر نتاعك برك... علاه هي تقبلاتك بيك بعيوبك وصابرة عليك... علاه ماشكاتش منك بلعكس كانت نعمة في حياتك تاخد رايك ومحترماتك...اللهغالب كاين وقت وين لمراة تكون فيه وفية لاهلك ثاني لانها مش راح تعيش غير معاك حتى هما راح يكونلها نصيب ولو حتى صغير تعيش معاهم...لوكان جات خبرتك كانت راح تخسر طرف ثاني لانو مش راح يتفهمها وراح يحطها قوادة...اما انت حبيبها وراجلها اكثر واحد ادرى بيها وراح تتقبل منها هذي لحكاية مش تدور عليها كما هك ... خمم مع روحك مرأة كيفها ماتصلحش تعمل فيها هك نرمالمون تزيد تقرب منها اكثر مش تبعد عليها...
حمزة: ياولدي انا ومش فاهم ولا حامل روحي... حتى نفهمها هي...
ايمن: انت راجل لازم تتفهم وتحط كل حاجة في بلاصتها... كما العرس مثلا تناقش معاها فيه ياك كل حاجة بالمكتوب وكل حاجة من عند ربي مقدرة...
مسح على وجهو بيديه لزوج: تعرف ضايع وضيعت بنت ناس في جرايري...زيد دراهم الي هزهم معتز... تعبي وشقايا ساكت غير في جال يما مش حابها تقلق عليا... راني في دوامة جاتني من لبلايص الكل...
معتز: غلط بزااف ماكانش عندو لحق يعمل هك لحق تصرف بتهور كبير وستر ربي مرض خالتي وردة الي خبسو والل راكم قاعدين تحوسو عبيه وصل ولا كلاه الحوت...
حمزة: مافهمتش عقليتو وين رايح بيها مخلطها من جوايه الكل لاصحبة تصلح ولاخدمة قدر يركز فيها... راقد كما لوليا في دار... وعملتو الي خسارتو وخسرتني الحمد الله منعو دراهم الي حاطهم في لبنك والا نلقى ريح ... باه راح نقابل لمرأة انا درك وش راح نقلها... مانقدرش نعملك عرس كما تحبيه خويا سرقني...
ايمن: ماتخممش رجلة مزالولي صرفات من العرس نعاون خويا بيهم...
حمزة: ماجيتش نحكيلك باه تعاوني ايمن... يكفي انك تسمعني ان شاء الله ربي يحلها من عندو...
ايمن: شوف نقلك حاجة لحلال ربي يبارك فيه... انت إنوي بقلب صافي مايكون غير لخير... ويزيك باعناد وجفى عيط لمرتك رضيها... راه نكون قاعدة على جمر...
حمزة: بربي ان شاء الله... من بعد ونشوف كيفاه... وانت وش حوالك مع العرس...
ايمن: وش راح نقلك طفلة نعمة تربية عاقلة ورزينة ليمات الي قعدت فيهم معاها زدت تعلقت بيها اكثر... وقت نسمعها تشايخ مع حليمة وضحكهم واصل لفوق عندي نحمد ربي الليل ونهار... على خيار امي عرفتها في لحلال ما خيبنيش ربي.... ساعات تدلل كما نساء الكل اما تعرف خوك مرة نحبك ومرة نرخف وهيا فاتت.. اما على لعموم مليحة الامور...
حمزة: هههه والله من هدرتك ولمعت عينيك غير مليح زواج... شهيتني نزوج انا ثاني
ايمن: هههه خير لبر عاجلوه...
حمزة: غير نتهنى على الوالدة ومن بعد ساهل كل شيء سماط معادش ليه طعمة...
ايمن: ليزوم مانوصيكش ماتخليش الفجوة تكبر بينكم وترجع الحساسيات ياك خديت موقت عاقبتها... يكفي هك ماتخشنش راسك...
حمزة: وش راح نقلك ربي ورحمتو...(صونا تلفون ايمن شاف معاه وشاف مع حمزة )
ايمن: وزارة داخلية تطلب نشوف وش تسحق...( حركلو حمزة راسو وهز عليها ايمن ) سلام
جميلة: ايموني وينها طماطم راح الحال باه ندير بيتزا...
ايمن: هاني هابط مانطولش عليك...
جميلة: باهي نستناك...
قطع معاها وحك لحيتو يحكي
ايمن: انا نهبط نقضيلهم من بعد نتلقاو...
حمزة: مريقلة راجل....
