💎🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 253:
حمزة:شوف معتز شوميزي هذي خرجت على دجين هذا...
معتز: دور نشوفك (وقف قدامو طلعو وهبطو ) اممم نظن خرج
حمزة: او خرج ولا ما خرجش مش نظن...
معتز: انا عجبني مع فاست تخرج علامة...
حمزة: ايا مليح مالا... شوف ساعة قريب 15:00مابقاش وقت...
معتز: زارب هههه طفلة مش راح تهرب...
(دخلت عليهم سولا اول ماشافتو ناضت تزغرت عينيها يلمعو من الفرحة لي ...)
سولا: الله يبارك على خويا كفاه خرج شبااااب...
حمزة: شوفي انت خرجو على بعضاهم...
سولا: ياولدي اليوم تشوفك دوخ...
حمزة: ههههه ياخوفي انا نشوفها ندوخ...
معتز: طحتي على راسك بلكعبات الكل...
حمزة: #مكتوب وش نديرو...
سولا: ميزو قولي شكون رايح معانا...
حمزة: قلت لخالتي حليمة تجي مع عمتي وانت ومامامعتصم والولاد وفيها الف براكة...
سولا: هذاك هو مالا... ماقلتوليش كفاه جيت انا...
معتز: باشعة ترهجي
خرجتلو لسانها سولا: الغيرة وكي تهدر...
حمزة: ايا طيري اختي دايما شابة... ماطولوش ما بقاش الوقت...
سولا: خلاص رانا واجدين مازلتو غير انتم...
معتز: انا هابطين مالا...
حمزة: سولا اختي تأكديلي من لحوايج الكل واجدين...
سولا: تهنى خويا والله شفتهم وتاكدت منهم اكثر من مرة مش مرة وحدة ماتنساش شريتهم الكل على يدي...
حمزة: نعرف ربي يخليك ليا كون مش انت نحصل هاك شفتي يما ماحبتش تقضي معايا...
قربت مسحتلو على دراعو سولا: واجبي هذا خويا وماما مع الوقت تقنع...
حمزة: إن شاءلله يارب...
معتز: هيا بلا دراما اخرجي خليني نلبس ولا تحبي نتعرا بحداك...
سولا: خماج ما نعرف منين جاباتك ماما...
معتز: اخرجي اخرجي لا نكسرلك هذاك الفم...
سولا: خرجت سامط هذا...
حمزة: نهار كامل كما القط والفار...
معتز: اممم نحب نهبلها والله بلا بيها سامطة... مانتخيلهاش تزوج وتخلينا...
حمزة: مزالها صغيرة تكمل قرايتها صح ونخمم نمدها ولا لا...
معتز؛: ههههه راح تخلى عرسة لهنا...
حمزة: هههه صعيب ندمها لاي واحد...
معتز: في هذي عندك الحق...
حمزة: ايا خلينا نهبطو راح الحال...
معتز: اهبط انت دوك نلحق...
هبط لتحت هما شافوه وناضت حليمة وعمتو يزغرطو... قرب جيهة امو باسها من جبينها...
حمزة: راح تروحي وانت مكشبرة... مش راح تزغرطي لولدك...
وردة: مش قادرة حلقي يوجع فيا...
حمزة: صاار وريدة مستخسرة فيا تزغريطة... يالا مي؟ متي نحب وحدة تزعزعلي خاطري...
حليمة: هيا وردة ماتخليهاش في خاطرو...
شافت معاه من بعد طلقت وحدة خلاتهم الكل يتبسمو في نهاية يطغى قلب الام...
بوجمعة: لكان كملتو يالا طموبيلات يستناو...
هزو لحوايج الي راح يهزوهم معاهم... حمزة يوصي في سولا ماتنساش حتى حاجة... وقف على كل كبيرة وصغير يحب يفرحها كما اي وحدة... ععانت بزااف وتستاهل تاخد فرحتها كاملة... مهم يعمل الي عليه... فرحة مش سايعاتو واخيرا راح يلبسها الخاتم وتكون حلالو... بعدما حتى هو تعب على كل تفصيل في علاقتهم...
خرجو في رحبة صوت زغاريط عامل حالة...ركبو الكل في جو من ضحك شايخين على حمزة... بعدما تاكدو من كل شيء... وبدات طموبيلات تصوني ... حومة كامل خرجت تطل عليهم...
