المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 264:
الحومة قايمة وقاعدة... لولاد كل واحد من جيهة يجري... تسمع غير صوت عياطهم ومرة على مرة ضحكهم... حمزة وسفيان الي مركزين مع رجال كيفاه يركبو لخيمة(حنا نقلولو ڨيطون ههه) بحدا دار ايمن... ويديهم معاهم....
حمزة: سوفي جيب منا شويا...
سفيان: اواااه اكثر من هك مانقدرش...
دور راسو طالع على سلوم وقت شاف لكراسة يهبطو فيهم حمزة: اخووو اي جيبهم منا ...
###:قلت نحطهم منا حتا تكملو وندخلهم...
حركلو راسو وهبط بعدما ربط الي في يدو مليح... مسح لعرق من جبينو ينفخ... يشوف مع سفيان كفاه مزال حاصل...
سفيان: ارواح احكم معايا من هنا...
حمزة: اصبر نرد نفس زح...
سفيان: هيا مابقاش وقت دوك شوي ويروح ايمن من الحمام...
طلع بحداه حمزة: ايه حتى معتز من راح يشري مارجعش....(كملو ربطو الخيمة هبطو يشوفو معاها متبسمين )
سفيان: اووووه الحمد الله شيء لكبير فات...
حمزة: والله شيء صعيب وانا حاب نزوج في شهر...
سفيان: يا ولدي ضرب زي اخر...(دارو على حليمة تعيط...)
حليمة: حمزة دقيقة نسحقك...
حركلها راسو وقرب جيهتها: كشما حتجتي خالتي...
حليمة: روح اولدي قاتلك ماماك جيب صحونا خصونا من داركم... قول لسولا برك حكات معاها امك وفهمتها وش تمدلك...
حمزة: اوكي خالتي... هذا ماكان ماتحتاجي حتى شيء خلاف؟
حليمة: لالة ولدي كفيتو وغيتو ربي يعيشكم...
حمزة: بلا مزيتنا ايمن خونا...
ريتتلو على كتفو متبسمة وبقات تشوف معاه حتى دخل لدارهم عاد دخلت لدار لداخل طلت على لكوزينة... تحكي مع طباخة...
حليمة: زعمة نلحقو على الوقت...
ط: الالة حليمة كونك متهنية نلحقو ونخلصو ونحمرولك وجهي بربي...
تبسمت معاها حليمة: ربي يعطيك ماتتمني... راهي روايح تشهي يعطيك صحة انت والبنات...
ط: من غير مزية راه خيرك مغرقنا...
حليمة: مابقتيش تعاوديها رانا خاوة... انا سمحيلي نطل على صالة...
ط: براحتك حبيبة...
تمشات وين كانو جيران قاعدين مع جوجيتا وزهرة اختها سعيدة ووردة وبنات جيران ثاني عاملين غناء صوتو خفيف...كاين الي تغني مع لغناية والي تتمايل والي تصفق والي تشوف معاهم تتبسم وتعاود تهبط راسها للحاجة الي في يديها ... زاد دخلو عليها جيران اخرين كل وحدة وش جايبة معاها... سلمت عليهم بفرحة... تشكر وتعاود فيهم... عاملة الخير اكيد تلقى الي يعمل فيها حتى هي الخير... قعدتهم وضيفتهم من القهوة والحلوة الي كانت موجدة في سنيوة... ودارت تشوف مع جمانة الي كلاتها يديها...
حليمة: جمانة ياك قتلك ماتعبيش روحك غير وريلنا برك
جوجيتا: هذا وين حطيت بقلاوة نقص فيها...
حليمة: ايه هذا وارجعي لوراء ماتخلينيش نتغشش...
جوجيتا: خلاص هاااه...
شافت مع زهرة حليمة: هااا اختي نورمالمون كل شيء واجد ياك ماناقص حتى شيء للحنة...
زهرة: اقعدي ارتاحي برك هاك تشوفي كل شي مغلف في سنوات طبق الحنة واجد... ربطات شمع حلوة كل شيء في بلاصتو... راهم لبنات ماشاء الله عليهم... كل وحدة يديها ذهب...
حليمة: ربي يعطيني طول لعمر ونحضر في عراسهم الكل...
وردة: حليمة ختي مانسيتيش زهر ياك... باه ترشي بيه الحنة...
حليمة: ايه خلاص كل شيء...
شافت مع لبنات جوجيتا: حبيبات نعذبكم... تهزو هذو سنيوات الكل تستفوهم بحدا بعضهم... وتحطو اي حاجة تخص الليل لتم... حتى من بعد ما ندوخوش...
حركولها راسهم ناضو بلوحدة ستفوهم وصوروهم... زغاريت عاملة حالة... زادو للغناء ومرة على مرة يشطحو مرة يقعدو... مرة يوقفو معاها يشوف وش خصها... حتى دخل عليها ايمن بعدما جاء من الحمام... هي شافتو وبدات تزغرط وتبكي في نفس الوقت...
أيمن: علاه لبكاء درك...
حليمة: حمام لهناء ولدي... راني فرحانة وفرحتي مانمدها لحد...
حط كابة الي كان هازها من يدو وقرب حكم وجها بين يديه وبايها على جبهتها...
أيمن: ربي يخليك ليا يما... ماعدتش نحب نشوف دمعة من عينك...
حليمة: فرحانة وراس وليدي فرحانة تمنيت الحاج معانا درك...
ايمن: ربي يرحمو ويوسع عليه إن شاء...
حليمة: امين.. اطلع ولدي ارتاح شوي...
ايمن: ايه اني طالع يما... ولولاد ام يسحقوك... على لعشاء ولا وش...
حليمة: هاني رايحاتلهم... عندهم الحق حتى هو ادن المغرب...
ايمن: سامحيني في تعبك ميمتي...
حليمة: هههه خلاص اليوم وغدوة ونسلم العهدة تاعي لمرتك...
ايمن: تبقي دايما ملكة تاعي...
حليمة: ربي يخليك ليا يارب ويهنيك...
ايمن: امين امين...
