المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 266:
في الحومة عند أيمن...
واقف قدام لمراية لبست فاست نتع كوستيم... شاف مع روحو زاد حل قفلة الاولى نتع لقمجة... طبطب الباب دار يشوف شكون قابلو حمزة...
ايمن: اهلا وش الاحوال...
حمزة: لعشاء كملنا الناس الكل بقاء غير لعشاء مع الولاد راهم الكل لتحت...
ايمن: طيبتكم ليزوم معايا...
حمزة: يخويا مش كل يوم عرس... خلينا نزهاو...
ايمن: جات الفرقة خلاص...
حمزة: ايه بداو يوجدو في رواحهم...
ايمن: حمزة مانوصيش شراب والخرطي هذاك مانحبوش...
حمزة: تهنى ياراجل راني وصيت وعاودت... بصح ظهرت عندك شعبية كبيرة...
ايمن: هههه هالا حاڨرني ولا...
قرب عدلو كول نتع فاست حمزة: جيت علامة...
ايمن: شوف كيفاه نهربو لتحت لا يحكمنا جيش انكشاري نتع لعجايز...
حمزة: هههههه راني طلعت بقدرة قادر عندك...
ايمن: تسمى درك نكملو لعشاء تخرج حليمة تحنيلي...
حمزة: ايه ايا قدامي خلينا نفرزوها سهرة طويلة...
ايمن: اصبر نهز تليفوني نصور بيه...
حمزة: هيا برك نصورك من عندي ومن بعد نبعتلك...
ايمن: هيا مريقلة...
هما حلو لباب ولقوهم في وجهم... حليمة وفضيلة وقامت دنيا بزغاريت... هبطو لبرا وين كانت طاولة نتع لعشاء واجدة والولاد واقفين يحكو بحداها...
حمزة: لولاد هيا للعشاء...
قعدو الكل مرة يحكو مرة يصورو لعشاء مانحكيش في دقيقتو ترقبع كل شيء... كملو هزو طاولة ودخلو لماعون لدار... كل واحد طلع لدارو بدل حوايجو... ورجع وين بدا شيخ يتستي في ميكروفون... وسانتي ديجا او يدندن...
يحكي بصوت عالي سفيان: لولاد نحب واحد مايقعد...
معتز: ياولدي غير يبدا وخاطيك...
قرب حمزة جيهة شيخ حطلو خمس مية الف يشيد على صاحبو قرب لوذنو وشوشلو ...
تصفااار عامل حالة... وايمن يضحك
شيخ: ويقولك هذي 500 الف من عند حمزة في خاطر خويالعريس ايمن بلبراكة وفي خاطر رجلةو لمة زينة... هبط من بحداه وبداء لغناء حومة كاملة تلمت عاملين جو... رشقية ماحبستش عياطهم وتصفير جو مش نورمال...
قرب سفيان لحمزة: نظن هذاك هو الوقت نتع الحنة...
حمزة: دوك نخبر خالتي حليمة...
سفيان: مريڨلة...
دخل لحليمة الي كانت واجدة تستنى فيهم هي وزهرة اختها...اما الباقي كانو عاملين سهرية ليهم خفيفة ... حطت خيمارها وعطاتو سنيوات نتع حلوة يخرجهم... وهذاك الي كان سبقها خرجهم وهي خبرت نساء بالي خارجين يحنو...راحو يجريو يطلو من بالكون وكاين الي وقفو قدام الباب حتى رجعلها حمزة عاونها في طبق الحنة... خرجو على زغاريط الي قلبت الحومة... وقعدو على راسطاولة بحدا ايمن... لولاد تصفق والي مدلها يديه تحنيلو وشيخ يغني... كملت ليه ربطتهالو وسلمت عليه... وكملت هي وزهرة للولاد لخرين...حنولهم بلواحد بلواحد... اما لعادة لازم صاحب لعريس يحط حبة بقلاوة كاملة في فم لعريس يخدعو بيها... وهذا الي عملو سوفي خلاهم يضحكو على ايمن الي يغفص فيها... وكل واحد من صحابو ييجي يعلقلو دراهم يباركلو ويروح ... تشياد مع شيخ ماحبسش... حتى هو ماحبسش من لغناء... صونا تلفون حمزة «سلطانتي » بعد شوي وهز عليها يحكي بصوت عالي...
حمزة: اهلا القلب...
ياسمين؛: لحس مش نسمع فيك مليح... بعد شوي على لحس
حمزة: حلي كام شوفي الاجواء...
ياسمين: اوكي...
عاو دلها كام هي تشوف اما هو مايشوفها نعتلها الحومة كيفاه قايمة وقاعدة... من بعد عاودلها تلفون...
حمزة: لعقوبة لينا...
ياسمين: إن شاءلله ... روعة الحالة لتم...
حمزة: ايه والله عرس زرابي وجاء خفيف ظريف...
ياسمين: هههه بصحتو...
حمزة: انا نخليك الحب من بعد نرجع نكمل سهرية...
ياسمين: كما تروح عيطلي اوكي...
حمزة: اوووكي...
رجع وين صحابو... كملو سهرية لصباح الحومة مارقدتش ...
