المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 294:
عملت دوش اسطوري غرقت روحي بلبرفان... ولبست لكوستيم طليت من طاقة لقيت لولاد الكل بطموبيلات فاتحينهم وصوت لغناء يتسمع لاخر الحومة... رجعت شفت مع لمرايا عدلت لقمجة تاعي... هزيت ساعة لبستها وحطيت جال ستكيت شعري... لبست سباطي وهبط مع لولاد قفلت دار ووقفت معاهم... روبلتها بشطيح اليوم ليلة عمري نحب نجنح نطير في سماء... تصفاق تصفار فليميجان حالة حالة... ركبنا في طموبيلات وديمارينا طول لدار ياسمين... نستنى غير وقتاه نشوفها... وصلنا لقينا رجال واقفين قدام دار سلمنا عليهم... كريم يحاول فينا على لعشاء اما كنا ديجا متعشيين... وقفنا شوي مع بعض حتى نشوف في اختها صغيرة عيطت لكريم حكات معاه في وذنو... فهمت لحكاية هبطت راسي حكيت خشمي رفعتو على جيتو...
كريم: هيا نسيبنا اختي تستنا...
حركتلو راسي مشبت وراه عيطت لسولا قلتلها اني طالع لقيتها قدام الباب تستنى فيا اول ماشافتني زغرطت... وتشعبطت فيا درنا سلفي...
سولا: هيا ندخلك عند عروستك صورو وماتطولوش مزال سهرة طويلة...
جراتني وراها دخلت وقفلت الباب... قربت جيهتها مانيش مصدق عمري ياسمين لابسة لغوب بلونش وليا...
حمزة: سلطانتي راني نوم ولا راكي صح بحدايا...
ياسمين: زيد تبت تحب نقرصك باه تامن...
هزلها طرحة باسها من جبينها...
حمزة: لا خلاص أمنت... بانتلي نهزك ونهربو مكلاه لخرطي الي مزال نديروه
ياسمين: حمزةةةة
حمزة: روح حمزة عينين حمزة...
بعدت عليه وقت دخلت photographe... تتبسم....
####: هيا درك نديرلكم صور ومن بعد تخرجها...
عملنا كما قالتنا وشبك ايدو مع ايديها... خرجو على صوت زغاريت قعدوهم على كرسي مخصوص ليهم مقابلتهم لبياس مونتي... صورو معاهم غير لقراب برك ووقفو قصوها مع بعض وكلها وكلاتو شربها وشرباتو...عملو حالة بشطيح تقول لاراهم عرسان.... مع dj هولت الحالة... حتى جبدها من يديها مخرجها... وصلت حدا باباها وقفت مقابلاتو...
عثمان: مانوصيكش على بنتي حطها في عينيك...
حمزة: متهني لحاج راهي آمانتك واجب عليا نحافظ عليها...
قرب باباها باسها على جبينها وهرب مابقاش لتم واقف... ركبها حمزة في طموبيل وقلع لدارهم... اول ماوصل هبط فاليز نتعها... ودار جيهتها حللها الباب مدلها يدو حكمت فيها... طلعو في دروج وقف قدام الباب هات المفتاح الالة حرمتي عليا ندخل لدار قبل لانجيبك...
ياسمين: اممم نحل انا الباب وانت غمض عينيك...
حمزة: يهديك ربي امراة زارب على روحي وش مزال نغمض ثاني...
ياسمين: هيا برك...
حمزة: الله لا يعطينا مايغلبنا... هاني غمضت عيني...
حلت الباب دخلت ودخلاتو معاها وقفت قدامو... طلعت بساتو على خدو فتح عينيه...
شموع وورد في كل بلاصة... اسهم صغيرة محطوطة على الارض بالونات حمراء ... شاف معاها تبسيمتو ماليا وجهو...
حمزة: وقتاه وجدتي هذا الكل...
ياسمين: البارح جيت انا وسلمى... شمع ماتخافش روشارجابل على هذي ضوهم خفت مابقاش قوي...
حمزة: مايهمش فرحان بيهم وبيك وبكل حاجة عملتيها نرمالمون انا الي نعملهم...
ياسمين: هههه حبيت نعكس طبيعة المرة هذي...
هزها بين يده خلاها تعيط
حمزة: اشششت صدعتيني...
ضربتو على كتفو ياسمين: حرام عليك فجعتني...
حل باب البيت دخل وحطها يشوف مع سرير مع طاولة الي موجدتها الفاكهة لعصير... عاملة حساب كل شيء... حضنها عاصرها عندو...
حمزة: يارب يدوم فرحتنا يارب...
ياسمين: يارب تعرف يالي انا اليوم اسعد وحدة في دنيا...
بعدلها خصلة من شعرها مفوت ابهامو على شفافها: وانا اسعد راجل في دنيا هذي الكل محظوظ بيك وممنون الي عرفتك...ممنون لصدفة الي جمعتني باحلى مرأة واحلى عروسة شافتها عيني...
حطت شفافها على كفو يدو بساتو ياسمين: تعرف حبيبي بالي انا وانت تعريف لتناقض...
انا لي منأمنش بالمعجزات و طول عمري غالقة على روحي و بعيدة على ناس و نتا لي ديما واقف معايا و عمرك تخليت عليا سني وسنك وحاجاااات بزاااااف مختلفة فينا... اما ثيقتي فيك وحبي كانو في محلهم
حمزة: راك عمري وروحي وقلبي ونفس الي نتنفسو عمري نخمم نتخلا عليك ...دائما راح نبقى منك وليك
بعدت عليه مسحت دمعتها ياسمين: هههه بكيتني... نروح نبدل ونتوضى ونجي نصلو ...
حمزة: وانا نسبقك نتوضى قبلك....
كملو صلاة وقفت تشوف معاه عضت شفتها مكمشة عينيها حاكمة ضحكة هزت صحن الفاكهة...
ياسمين: هيا نكملو سهرة في صالة نتفرجو على شيء حاجة...
حمزة: شوف اسيدي جاي شاقي من دارنا لهنا باه نكمل سهرة في صالة على tv ياو تحلمي...
هربت تجري وهو لاحقها صوت ضحكهم مالي دار...
