اسكريبتات متنوعه بقلمي / إيمان شلبي

اسكريبت ( البارت الاول)

-بس انا طلبت قهوه بس
-وانا اللي طلبتلك المولتن

لفيت لمصدر الصوت باستغراب وثواني وحطيت ايدي علي بوقي وانا بضحك برقه

-انت؟!
- فاكراني؟!
-طبعا
-ممكن اقعد
-اكيد

شد كرسي وقعد قصادي وسند أيده الاتنين  علي الطربيزه ...

- لسه بتسمعي ام كلثوم
- ايه ده انت عرفت منين ؟!
- صوت الهاند فري عالي
- اه سوري وانا بسمعها مبحسش بنفسي
- ولا يهمك علي فكره انا كمان بحبها جدا
- هي جميله واغانيها تتحب في الحقيقه
- عليها واحده " وعايزنا نرجع زي زمان قول للزمان ارجع يازمان ،وهاتلي قلب لا داب ولا حب ولا انجرح ولا شاف حرمان " 
بتجيب اجلنا كلنا

ضحكت برقه بالرغم من الوجع اللي جوايا وكأن الكوبليه ده بيتقال عشان يفكرني باللي فات وهي بتقول بنبره صوتها القويه " بيني وبينك هجر وغدر ،وجرح في قلبي داريته ،بيني وبينك ليل وفراق وطريق انت اللي بديته ! "

- علي فكره ميستاهلش
- هو مين ؟!

- اللي بتفكري فيه ميستاهلش زعلك محدش يستاهل يتزعل عليه

ضحكت بسخريه وانا بسند ايدي علي الطربيزه وببص في عيونه

-يبقي عمرك ما حبيت
-ومين قال كده ؟!
- لأن اي حد بيمشي من حياتنا يستاهل نزعل عشانه وخاصه لو كان في بينا ذكريات حلوه

- بس الأشخاص هما اللي بيهدموا مكانتهم في قلوبنا بنفسهم بيخلونا ننسي الحلو ونفتكر الوحش لأن الوحش هو اللي بيفضل معلم جوانا ...

اتنهدت وانا ببص لنقطه فراغ وعيوني اتملت دموع
كلامه مظبوط الوحش بيفضل معلم جوانا وكأنه جرح عميق اتلم لكن مازال آثره موجود لو بصيت عليه بتحس بوجع رهيب ...

- تحبي تحضري حفله ؟
-حفله ايه ؟!
- اوبرا
- اوبرا ؟ بحس بملل رهيب ديه ناس بتصوت انتوا ازاي بتسمعوا الحاجات ديه !

لقيته ضحك بعلو صوته لدرجه ان الناس اللي في الكافيه بصت علينا وانا قاعده وشي احمر وفي نص هدومي ...

- هو ده كل معلوماتك عن الاوبرا
- ايوه انا بشوفها كده
- امممم طب تحبي تسمعي ميوزيك  هاديه ؟
- ياريت جدا
- طب ثانيه واحده

لقيته قام من مكانه وراح قعد علي كرسي قدام البيانو اللي كان في الكافيه وبدأ يعزف ..

كان بيعزف بكل هدوء وهو مغمض عينه ...
الصمت عم المكان الأنظار كلها اتوجهت نحيته وهو بيعزف لأكتر اغنيه انا بحبها ...

تلقائياً لقيتني بغني بصوت هادي وسط الصمت وصوت الميوزيك ...
صعب عليا اداري حنين ،عاش جوايا بقاله سنين ،نفسي اتطمن بيك ياحبيبي ولو مش جاي هجيلك فين ؟!
ليل ونهار انا هستناك   قلبي في نار والجنه معاك شوق هيجيني وشوق هياخدني ومش هرتاح غير وانا وياك 💔 "