الفستان الاسود حلو عليكي 🖤
كانت فاتحه الواتس في الشارع مستنيه صاحبتها تنزل عشان يروحوا الكليه سوا
اتفاجئت بالماسدج الغريبه ديه!
بصت علي الفستان الاسود اللي كانت لبساه وحطت ايديها علي بوقها وهي بتضحك برقه
لفت يمين وشمال يمكن تلاقي صاحب الماسدج لكن مشافتش حد
" هظهر بس مش دلوقتي "
بعت ماسدج تانيه خلتها ترفع حاجبها الشمال باستغراب
هو شايفها ؟!
" انت مين ؟!"
ابتسم بهدوء وهو بيسند ظهره علي الكرسي ورجله الاتنين علي سور البلكونه
" واحد "
هي برفعه حاجب واستنكار
" بجد كنت مفكراك واحده!! "
" وكمان دمك خفيف "
" طب غور بقي بخفه دم اهلك اللي علي الصبح ديه"
قالت جملتها واخدت نفس طويل وهي بتعمل بلوك للرقم بغيظ اصل هي خلقها في ذمه الله ومش ناقصه وجع دماغ
- ايه ده مالك مكشره ليه علي الصبح
قالتها صاحبتها وهي بتقرب منها باستغراب
- واحد بعتلي ماسدج بيقولي الفستان الاسود حلو عليكي
صاحبتها برفعه حاجب :
- ايوه فين المشكله ؟؟
- بقوله انت مين بيقولي واحد لا بروح خالته كنت مفكراه واحده ظريف البيه
صاحبتها وهي بتضحك عليها بقوه :
- وطبعا كالعاده اترزع بلوك
هزت راسها بفخر وكأنها عملت إنجاز :
- ومش بس كده لا وكمان بوشكاش محفوظ بيضحي وشتمته
ضربت صاحبتها رأسها بيأس من تصرفاتها المجنونه والعنيفه مع كل الشباب وكأنهم بالنسبالها وحوش كل ما حد يقرب يتفاجئ برفض وبلوكات ومش بعيد ضرب !
- يابنتي انتي مش هتبطلي حركاتك المجنونه مع كل الشباب ديه ؟!
- توء
- هتعنسي جنب امك
رفعت حاجبها باستنكار :
- ياسلام وهي كل بنت مش بتكلم شباب بتعنس ؟!
- لا يا نيره بس انتي حرفيا معاملتك مع أي شاب صعبه فيها ايه يعني لو كان لينا صحاب شباب ؟!
- فيها أنه حرام يا سجي
- احنا مش بنعمل حاجه غلط كل حاجه بحدود
- حتي لو كان بحدود حرام برضو كنت بفكر زيك لحد فتره قريبه اوي لحد ما بابا قالي أنه حتي لو بتتعاملي بحدود ممكن مع الوقت تحبي اللي قدامك ساعتها الحدود هتتشال ساعتها ممكن تعملي اي حاجه حتي لو كانت غلط لأن مشاعرك هي اللي بتحركك اكتر من عقلك ودينك وعادتك ...انا مش ملاك لكن بحاول ،بحاول ابعد عن حاجات كتير كنت بعملها زمان يمكن ربنا يهديني للطريق الصحيح
أنت تقرأ
اسكريبتات متنوعه بقلمي / إيمان شلبي
Mystery / Thrillerمجموعه اسكريبتات رومانسي ،كوميدي،حزين ،بقلم ايمان شلبي هنا هتعيش معانا لو كنت حابب تعيط عليك وعلي اسكريبت باب الذكريات 🥲 عايز تضحك عليك وعلي اسكريبت احببت مجهوله 😂عايز محن وفقع مراره هتلاقي كتشير اوي😂عايز كله في اسكريبت واحد عليك وعلي ظننته خالي...
