اسكريبتات متنوعه بقلمي / إيمان شلبي

نصيبي وقسمتي ( كامل)

#نصيبي_وقسمتي

انتي اتجننتي يافاطمه !! ،عايزه تفهميني انك رايحه فرح طليقك  عادي كده ؟!

التفت تقف امامها وعلامات البرود ترتسم فوق ملامحها ببراعه ، لتهز رأسها بتأكيد وتهتف بهدوء : متنسيش انه ابن خالتي يا يارا

يارا وقد وقفت امامها وعيناها تطلق شرارات الغضب من تلك العنيده صديقتها لتهتف بعصبيه مفرطه:ومتنسيش انك طليقته،  والناس كلها عارفه بده ،انا استحاله اسيبك تروحي ،انتي مش شايفه منظرك عامل ازاي؟! ، عايزه تقنعيه انه مش فارق معاكي ،غلطانه لعلمك بقي هو عارف ومتأكد انك لسه بتحبيه ، ومرواحك الفرح مش هيزود غير الوجع وبس !

فاطمه وهي تلتف مره اخري تقف امام المرآه وتستكمل وضع احمر الشفاه   وتتنهد بوجع :يارا لو سمحتي ،انا هروح ،خالتو عزمتني ومقدرش ارفضلها طلب

يارا بغضب وهي تقذف الوساده بجانبها ارضا :خالتك ديه معندهاش دم

فاطمه بغضب وهي تلتف لصديقتها :يارا لو سمحتي عيب كده ديه ،مهما كان خالتي

يارا بعصبيه وهي تتجه وتقف امام صديقتها مباشره:ياريت خالتك كانت بتحبك ربع حبك ليها ،

فاطمه بصراخ في وجهه صديقتها:ماهي بتحبني

يارا بصراخ اكبر:لو بتحبك ماكانتش عزمتك وهي عارفه ومتأكده انك بتحبي المحروس ابنها ،فوقي بقي من الاوهام ديه، خالتك طول عمرها مش بتطيقك ولا بتطيق امك ولا بتطيق حد فيكم ، خالتك ديه حربايه ،متنسيش ياهانم انها كانت السبب في طلاقكم ،ومتنسيش كمان ان هي اللي لعبت في دماغ ابنها عشان يتجوز واحده تانيه وانتي علي زمته لمجرد انك اتأخرتي شويه في الحمل ،ياريت متنسيش وترجعي عن الهبل اللي ناويه تعمليه !

فاطمه وهي تُجاهد لمنع دموعها من الهطول:ام وحقها تفرح بأبنها ، وانا مقدرتش احققلها حلمها واخلف عادي

يارا وهي تشد علي شعرها بغضب:انتي عايزه تجننيني يابت انتي؟! ، انتي مش عقيمه يافاطمه انتي زي اي حد بيتأخر شويه عشان يجيب بيبي في ناس بتتأخر بالخمس سنين انتي حياله سنه فوقي ،خالتك بتتلكك وابن خالتك زيها ،هو لو بيحبك وباقي عليكي كان وقف قدام الدنيا كلها ،كان فكر يروح معاكي للدكتور ويعالجك مش يسيبك ويروح يتجوز غيرك ! اآا

فاطمه وهي تقاطعها بصراخ ودموع:بس كفايه كفااايه

يارا وعيناها تدمع علي حال صديقتها :كان لازم تفوقي يافاطمه ، كان لازم تعرفي انك مش فارقه مع " سالم"

فاطمه وهي تقبع فوق الكرسي خلفها لتهتف بحشرجه :يارا ، كلميلي اخوكي

يارا وهي تمسح دموعها بتعجب: عايزه " فارس" ليه !

فاطمه وهي تمسح دموعها بقوه:عشان هيروح معايا الفرح

يارا وهي تفتح فاها بصدمه :هه