اسكريبتات متنوعه بقلمي / إيمان شلبي

خُطبه مؤقته( البارت الاول )

بس ديه تخينه ياماما ومش حلوه

- مش حلوه ؟؟؟ ديه احلي من القمر وبعدين ايه يعني تخينه

هو بضيق : بس انا عايز واحده تكون حلوه مش معقول همشي بيها قدام صحابي وهي حجمها أكبر من حجمي شكلي هيبقي ايه دلوقتي !

مامته باصرار: فداء خلاص احنا عطينا لأهلها كلمه وبكره هنروح نتقدملها ..

فداء بعصبيه: هو انا يعني مليش رأي ولا ايه ؟

مامته بهدوء : مين بس اللي قال كده ياحبيبي ؟ احنا هنروح نتقدملها وتتخطبوا فتره ارتحت كان بها مرتحتش يبقي كل شيئ قسمه ونصيب

فداء : وانا ايه اللي يجبرني يعني اتقدم لواحده مش بحبها ؟ كل فوله وليها كيالها اكيد هتلاقي واحد  زيها انما انا اتقدملها بتاع ايه انا جسمي رياضي وبشتغل في شركه محترمه واعرف بنات بعدد شعر راسي معقوله بعد كل البنات ديه اتجوز واحده تخينه شكلي هيبقي ايه قدام صحابي !

مامته بضيق : صحابي صحابي صحابي عايز تقنعني يعني أن صحابك مش مرتبطين بناس فيها عيوب ؟

فداء : ايوه ياماما بس هما بيحبوا بعض واللي بيحب مش بيشوف العيوب

مامته: وانت كمان كنت بتحب تسنيم وانتوا صغيرين

فداء بعصبيه وجنون : ياستي كنت طفل وبلعب معاها واحنا صغيرين والأطفال بتحب اي حد يسليها

مامته بضحك : تعرف ياواد يافداء انت مره ضربت عيل عشانها تعرف الجرح اللي في حواجبك ده كان بسبب تسنيم

فداء باستغراب ورفعه حاجب  : بسببها ؟!

مامته :اه والله مره في عيل ضايقها في الحضانه  واخد منها اللعبه بتاعتها وانت بقي اتعصبت وروحت عشان تضرب الولد ده قام مجمع صحابه كلهم ورنوك علقه انما ايييه اورجانك ...

فداء بسخريه: لا كنت حمش اوي بروح اهلي

مامته : بقولك ايه انا رايحه انام دلوقتي وانت اعمل حسابك بكره حضر اوتفيت حلو كده عشان تشرفنا قدام أهل العروسه انت عارف أننا صحاب ومشوفناش بعض من زمان عايزاك تشرفني ...

فداء : اوتفيت؟! الله يرحم

مامته: اتلم ياواد ديه البت سلمي أختك هي اللي علمتني كل شويه تقولي انا رايحه احضر اوتفيت للكليه ماشاء الله عليها مش فالحه غير في اللبس تيجي تسألها في حاجه في المنهج تعمل عبدو الاهبل ...

فداء بفخر: تربيتي طمر فيها التربيه البت ديه

مامته وهي بتلوي جانب فمها : تربيه طين علي دماغك ودماغها انا داخله اتخمد ..

فداء : تصبحي علي خير ياست الكل بتموت فيا

خرجت مامته من الاوضه وهي بترطن كالعاده وهو اتنهد بضيق وخرج البلكونه يشم شويه هواء ..