اسكريبتات متنوعه بقلمي / إيمان شلبي

اسكريبت ( كامل )

اسفين يافندم بس العدد مكتمل 
- لا بتهزر صح اكيد بتهزر ده انا كنت مستنيه النهارده بفارغ الصبر

هزلي رأسه بأسف وهو بيقول برسميه: اسفين بس حضرتك جايه متأخر ومفيش مكان

- ط طب بص مش مهم اقعد انا ممكن اقف عادي بس بليز خليني احضر د ده النهارده عيد ميلادي حتي ياعالم

- اسف يافندم مينفعش وكل سنه وحضرتك طيبه

هزيت راسي  بحزن وخرجت من المكان وانا بحاول إداري دموعي
روحت قعدت علي اقرب كرسي وانا بدفن وشي في أيدي وبعيط
كنت بعيط بحرقه اللي يشوفني يقول عندي ميت

في الحقيقه مكنتش فاهمه ايه سبب عياطي
او يمكن فاهمه بس بحاول اكدب نفسي

اول عيد ميلادي يعدي عليا واحس اني وحيده اوي كده ،حتي حظي مكانش محالفني المره دي وكأن كل حاجه أصبحت ضدي !

- يا انسه انتي كويسه ؟!

هزيت راسي وانا مازلت دافنه وشي في أيدي وقولت بهمس يكاد يكون مسموع

- انا كويسه شكرا

- ا احم لو محتاجه مساعده انا

- خلاص بقي قولتلك شكرا

قولت جملتي بعصبيه وانا برفع راسي وببص للجهه التانيه وانا  وبمسح دموعي بقوه
مكنتش حابه حد يشوفني وانا كده مبحبش احس اني ضعيفه

انا فعلا مش ضعيفه انا قويه وهعدي اليوم هعديه كأنه يوم عادي زي كل الايام

هلغي فكره أنه عيد ميلادي وهتجاوز الشرخ اللي في قلبي
هتجاوز  الاحساس بالوحده

- طب تحبي تحضري حفله ؟!
لفيت راسي باستغراب ولسه هتكلم
الكلام وقف وانا بقوم اقف بصدمه وبرمش عيني اكتر بذهول وبقول بهمس

- يوسف اكرم ؟!

لقيته ضحك وهو بيعدل الجاكت بتاعه بحركه غرور مصطنعه

- الشهره ديه غريبه ياجدع لا اوعي تقولي انك كنتي بتعيطي عشان تتصوري معايا

بصتله وانا بضحك وبقول بحزن

- كان نفسي بس الظاهر أن مليش نصيب

- بتهزري ؟ لا بجد بتهزري يعني انا واقف قدامك وبسألك بقالي ساعه مالك وبتقولي مفيش نصيب اصوت ؟!

ضحكت جامد علي رد فعله وانا برفع عيني وببص في عينه العسلي وبقول برجاء

- يعني ممكن اخد معاك صوره بما أني مش هحضر الحفله !

- طبعا ممكن بس سؤال ليه مش هتحضري

اتنهدت  وانا بضم شفايفي في بعض بحزن وقوه بحاول امنع نفسي اني اعيط

- عشان مفيش مكان

بصلي  بملامح خاليه من اي تعبير وهو بيبص للحارس  اللي كان واقف علي الباب وبيهزلي رأسه بغموض