#احببتُ_جاهل
#البارت_الاول
- بتعرف تقرأ وتكتب ؟
- افندم؟!
- بص حضرتك انا في كليه تربيه وشرط عشان اتخرج اني اعلم واحد مش بيعرف يقرأ ويكتب القرايه والكتابه ويدخل امتحان محو الاميه ولو نجح فأنا هنجح لو سقط انا هسقط وحسبي الله ونعم الوكيل في الكليه ها بقي مقولتليش بتعرف قول لا وحياه امك قول لا انا بلف من الصبح علي حد أعلمه والله بص اعمل نفسك جاهل وانا أعلمك
ضحك وهو بيحط أيده في جيبه وبيهز رأسه بحيره ...
- يعني بذمتك ده منظر واحد جاهل ؟
هزيت راسي بنفي وانا بتنهد بضيق وتعب ..
- انا اسفه عطلتك
- ثواني طيب
- نعم ؟
- ا احم هو لازم المشروع ده يعني مفيش بديل ؟
- للاسف اصل كليه كامبردج فرع الشاطبي اللي احنا مش هتعتمد تخرجنا غير بالمشروع ده
- اممممم شكلك بتلفي من بدري
- بقالي يومين وحياتك كل الناس بقت متعلمه دلوقتي ومعاها شهادات من كليه الطب ..
- طب تحبي اشوفلك حد ؟
- وحياه امك ؟
ضحك تاني بس المره ديه بصوت اعلي ..
في الحقيقه ضحكته حلوه اوي خطفت قلبي هو شخصياً خطف قلبي !
- وحياه امي
- ا احم انا اسفه بس انا تلقائيه بقي هههه اسفه ايه الهبل اللي انا بعمله ده ا احم طب بص حضرتك رقمي اهو لو لقيت حد هحبك
- ياريت والله
- يحرق لساني عايز قطعه كده ا احم قصدي هدعيلك هدعيلك يالا سلام باي بونسوار تشااااو ...
قولت كلامي وجريت من قدامه وانا مش عارفه انا بعمل ايه ؟
مش عارفه ليه اول ما شوفته اتوترت قولت كلام مش مفهوم مع اني مش كده ابدا
أنا حد عاقل جدا احم بصراحه مش اوي يعني هو انا ساعات ببقي مجنونه انا بكذب اصلا ياجماعه انا معروفه بين شلتي بالهبله ...
- ها عملتي ايه لقيتي حد ؟
- لا ياماما لا انا تعبت بجد
- معلش ياحبيبتي أن شاء الله خير
- يارب ها بقي ياست الكل عامله اكل ايه ؟
بصتلي باستغراب وهي بتضرب كف فوق التاني بجنون
- عوض عليا عوض الصابرين يارب
واحده عندها مشروع تخرج ومش لاقيه حد والدنيا بتخرب فوق دماغها وبتسألني عامله اكل ايه؟
- الاه يعني أمتنع عن الاكل والشرب عشان الكليه الكاريزما يعني ولا ايه ؟ ياكش تولع الكليه اهم حاجه صحتك يارايق
- لا وانتي الصادقه صحتك جميله كل يوم عند الدكتور ..
- انا اصلا جزمه اني واقفه بتكلم معاكي بعد كده جيبي حد يجيب حد يكلمني عشان انا مش قليله في البلد ديه
- امشي يابنت الهبله من هنا
- حبيبي يابا الله يخلييييك
ومع آخر جمله لقيت شبشب طاير في وشي لا ياجماعه عادي ده شبشب ماما حصل خير ....
..........................................................................
- طب وانت هتعمل ايه ؟
- مش عارف بصراحه
- وانت ايه اللي ورطك الورطه ديه يابني ؟
اتنهدت وانا بسندي ايدي علي المكتب وبفتكر شكلها ..
عيونها الخضراء ،شعرها الاصفر الطويل ،ملامحها البريئه
عفويتها ...
ضحكت من غير وعي وانا بفتكر شكلها وهى بتحكيلي عن الكليه بسخريه ...
- هيييي روحت فين يابني ؟
- هه ولا حاجه
- طب هتعمل ايه يافالح انت تعرف حد اُمي ؟!
- اممممم لا هفكر
- ايه يامعلم هي الصناره غمزت ولا ايه؟؟
- مش عارف
- ايه لا متقولش لا لا مؤمن بييييه بجلاله قدره عجبته بنت لا انا مش مصدق نفسي ياجدع
- بس بس ايييه بلاعه واتفتحت
- حلوه؟ شكلها عامل ازاي هنروح نخطبهالك أمتي احضر البدله ؟
- ايييييه كل ده قوم يالا امشي من هنا
- يابني ده انا مصدقت حلوه؟!
- حلوه بس ديه قمر
- طب ايه
- ايه.
- هتعمل ايه يعني
- مش عارف بس عايز اشوفها تانى عايز اتكلم معاها وأعرفها اكتر
- الموضوع مش بالساهل كده لازم تخطيط
- طب اعمل ايه تصدق انا ثانيه وكنت هقولها انا جاهل عشان تعلمني
- اممممم طب ما تعمل كده
- اعمل كده ازاي ياغبي هي عرفت اني مش جاهل
- انت مش قولتلها هتشوفلها حد ؟
- اه
- اشطا احنا نغير شكلك نهائياً ونطلع شهاده انك مش متعلم وتكلمها تقولها ابن عمي مش متعلم وعايز يتعلم وبكده تقدر تقرب منها وهي مش هتشك لأن شكلك هيتغير ولو شكت هتقولها أنا وابن عمي زي بعض !
- يابن اللعيبه ايه الدماغ ديه ؟
- اي خدمه يامعلم يالا كلمها
- تمام
مسكت الفون بتاعي عشان ارن عليها ..كنت متوتر اوي لاول مره اكون متوتر كده ...
طول عمري مش بفكر في الحب طول عمري لما اشوف بنت كنت بمشي من مكان تاني عندي عقده من الحب والجواز بسبب اهلي ...
لحد ما شوفتها لاول مره اشوف بنت مغيرش طريقي لقيتني مشدود ليها بشكل مش طبيعي لقيتنى بروح نحيتها ومن وقتها وصورتها مش مفارقه خيالي !...
- الو
- الو مين معايا؟
- مش عارفه صوتي
- اللهم طولك ياروح بقولك ايه يا اخ انا خلقي ضيق ومش طايقه نفسي هتقول انت مين ولا اقفل في وشك ؟
- اهدي بس اهدي انا اللي قابلتك الصبح
- مين برضو انا قابلت الصبح صحابي وبعدها روحت لعم عبده بتاع الفول وبعدين روحت الكليه قابلت الأمن اللي يسدوا النفس وبعدين دفعتي كرتونه البيض في حد ذاتها و....
- بس بس اصبري انا اللي سألتيه بتعرف تقرأ وتكتب ولا لا
- اااااه افتكرتك
- احم انا لقيت حد عشان تعلميه
- اُحلف
- هههههههه اه والله بصي هو ابن عمي وانا عرضت عليه الموضوع و وافق
- طب تمام حلو جدا جدا اتفق معاه علي معاد وياريت يكون في اقرب وقت اللهي تنستر هسقط ..
- بكره الساعه ٦ كويس
- طب مش تسأله الاول ؟
- هه م ماهو قاعد قدامي اهو وموافق
- طب تمام بكره أن شاء الله في كافيه *** الساعه ٦
- تمام باي يا انسه
- شهد اسمي شهد
- تمام ياشهد باي
يُتبع
# إيمان_شلبي
أنت تقرأ
اسكريبتات متنوعه بقلمي / إيمان شلبي
Mystery / Thrillerمجموعه اسكريبتات رومانسي ،كوميدي،حزين ،بقلم ايمان شلبي هنا هتعيش معانا لو كنت حابب تعيط عليك وعلي اسكريبت باب الذكريات 🥲 عايز تضحك عليك وعلي اسكريبت احببت مجهوله 😂عايز محن وفقع مراره هتلاقي كتشير اوي😂عايز كله في اسكريبت واحد عليك وعلي ظننته خالي...
