اسكريبتات متنوعه بقلمي / إيمان شلبي

احببت مدمن ( البارت السابع والاخير )

الجزء السابع 🖤بقلمي إيمان شلبي 🖤

كان حالته مرعبه ،جسمه كله عرق ،بينهج بسرعه رهيبه ، كنت دايما اشوف المدمنين في التلفزيون بالشكل ده يصعبوا عليا مع اني عارفه أنه مجرد تمثيل  بس عمري ما كنت أتوقع اشوف اقرب حد ليا بيعافر ،بيموت قدامي زيهم ،عمري ما كنت اتخيل اتحط في الموقف ده !

طب هعمل ايه ،هتصرف ازاي ،هسيبه يموت ،هسيبه يعافر لوحده ،ياريتني ما كنت رميت المخدرات علي الارض انا السبب في اللي هو فيه

دموعي نزلت وانا بحاوط وشه :
- قاسم حبيبي قاسم بصلي

كان مغمض عينه وهو بيهز رأسه بهستريه وبيهرش في دراعه وجسمه كله :
- مش قادر يارغده مش قادر ابعدي عني

هزيت راسي وانا بقول بدموع :
- لا مش هبعد هفضل معاك هنعافر سوا

لقيته زق ايدي وهو بيقوم يقف بغضب :
- بقولك ابعدي عني ابعدي روحي الاوضه واقفلي الباب علي نفسك انا مش مسؤول عن اللي هعمله هيكون خارج إرادتي ابعدي عني يارغده ابعدي

مكنتش فاهمه كلامه كنت ببصله بخوف وهو متشنج وعروق رقبته بارزه
مكنتش قادره افهم ليه عايزني ابعد عنه هو ايه اللي ممكن يعمله ويأذيني؟!

قررت افضل مكاني وأشوف هنوصل لايه انا مش جبانه انا بحبه وهفضل جنبه لآخر نفس فيا طول مانا بتنفس هفضل بحاول هفضل معاه مش هسيبه لوحده أبداً لاني ببساطه محبتش ولا هحب زيه معنديش حد اخاف عليه غيره حتي نفسي مش خايفه عليها

- عاااااا

صرخت بفزع لما لقيته بيهبد دماغه في الحيطه بجنون مره ورا التانيه.

جريت عليه وانا ببعد دماغه اللي متغرقه دم وبصرخ في وشه بفزع:
- ليه ليه بتعمل كده حرام عليك

اتفاجئت لما اترمي في حضني وفضل يصرخ بهستريه :
- مش قادر مش قاااادر يارغده عايزه جرعه انتي السبب انتي السبب لو مكنتش رميتي اخر كيس مكانش حصل كده حرام عليكي

دموعي كانت نازله علي خدي وانا بضمه وبهمس بوجع:
- انا اسفه اسفه ياحبيبي حقك عليا

بعدت عنه بفزع لما سمعنا صوت الباب بيخبط بعنف

بلعت ريقي وانا ببصله كان واقف باين عليه التعب بس بالرغم من كده شاولي بثبات اني متكلمش

- هششش ادخلي جوا واقفلي الباب علي نفسك

- بس

قاطعني وهو بيبصلي بتحذير:
- اسمعي الكلام يارغده بسرعه

هزيت راسي اكتر من مره ودخلت وقفلت الباب بس فتحته نص فتحه

أما عنه اتنهد وراح يفتح الباب بثباته المعتاد

برقت بخوف وانا بحط ايدي علي بوقي لما شوفت واحد داخل هو وكام شخص باين عليهم الحراس بتوعه