اسكريبتات متنوعه بقلمي / إيمان شلبي

انفصام ( البارت الثاني )

خرجنا انا وماما وبابا من العماره بصدمه مش قادرين نفسر اللي حصل فوق

يعني اللي فوق ده خطيبي ولا اخوه التوأم واللي المفروض مات وشبع موت !

اللي فوق خطيبي وعامل تمثيليه عليا عشان يخرج منها زي الشعره من العجينه ولا ده فعلا اخوه

طب ازاي اخوه ازاي ومحمد مأكدلي أنه مات من زمان في لغز كبير في حاجه غلط

لو كان اللي فوق خطيبي كان اتوتر وخاف أو علي الاقل مفتحش الباب ولبس نفسه تهمه

دماغي هتنفجر من كتر الاسئله بابا وماما حيراتين بيفكروا زي

عقلي مش قادر يبطل سؤال ورا التاني قلبي رافض يريحني ويبطل يدق بالسرعه الرهيبه ديه

كل حاجه ضدي كل حاجه غلط كل حاجه ماشيه معايا بالعكس

فوقت من شرودي علي صوت " اماني " وهي بتصرخ باعلي صوتها

بصينا لبعض احنا التلاته بحيره وتفكير في سبب صراخها المستمر

وثواني وكانت بتجري علي السلم وهي بتقول بخوف :
- عفررريت عفررريت الحقوناااااي

الناس كلها اتلمت عليها وهي بتصرخ وبتقول بهستريه:
- عفررررريت عفررررريت عفررررريت

قربت منها بصدمه :
- عفريت مين في ايه ؟

قربت مني وجسمها بيتنفض :
- خ خطيبك خ خطيبك طلع عفريت

- خطيبي ؟؟

قولتها بهمس وصدمه وهي بتهز رأسها اكتر من مره بهستريه:
- ا ايوه ايوه اللي فوق خطيبك

قربت منها وانا بهزها بعنف :
- عفريت ازاي في ايه فهميني

كانت لسه هترد عليا بس سكتت وكلنا سكتنا لما لقينا محمد أو مؤيد مش عارفه في الحقيقه !

كان نازل علي السلم بعد ما لبس هدومه وبيجري علينا وهو بيشد اماني من ايديها بغضب :
- انتي اتجننتي انتي ازاي تنزلي بالشكل ده ؟؟

كانت اماني بتترعش برعب حقيقي وهي ماسكه فيا وبتشد نفسها منه أما عني كنت ببصله بصمت وصدمه وقهره وحرقه قلب

كنت ببص لعيونه اللي باين فيها الغيره علي واحده متقربلوش ده انا خطيبته وعمري ما شوفت نظرات الغيره دي في عينه ليا !

هو مين ده ؟!
هو ده محمد خطيبي اللي بحبه ولا ده اخوه التوأم اللي مات ولا ده مين انا ليه حاسه نفسي في حلم أو كابوس مش عارفه افوق منه

- محمد أخيرا لقيتك انت كنت فين كل ده ؟!

لفيت لمصدر الصوت لقيت " وائل" صاحبه بيجري علينا بلهفه وقلق

بصله محمد وهو بيقول برفعه حاجب :
- محمد مين انت تعرفني ؟

كلنا تنحنا حتي وائل فتح بوقه وهو بيسأله بصدمه :
- نعم
وبصلي وهو بيسألني بحيره :
- هو في ايه