- بما انك النهارده اجازه عايزين نخرج
- ياريييييت بجد المدير بقاله شهر مطلع عيني في الشغل ..
- خلاص انا هقوم البس وفكري في مكان نروح فيه
- تمام في كافيه جنب الشركه حلو اوي وفي حفله النهارده كمان لو كده نروح هناك
- اشطا
قومت لبست دريس تايجر وحطيت ميك اب رقيق ولبست هيلز وفردت شعري علي ظهري
وقفت قدام المرايه اتفحص شكلي ،كان شكلي حلو اوي ،ساعات كتير بقف أسأل نفسي هو انا وحشه ؟! جسمي تخين مثلا وشي مليان حبوب ومش حلو ،طب طباعي مش حلوه ومحدش يستحملها ؟!
مش بلاقي اجابه صريحه ،انا حلوه وبشهاده كل الناس ،لطيفه بحب الكل ،بتعامل مع الكل بنيه صفيه ..
ساعات بلوم نفسي علي الطيبه الزياده اللي فيا ،بس في النهايه برجع واقول مانا لو كنت قاسيه زيه زي يونس مكنش حد حبني مكنش حد فضل معايا للنهايه!
اتنهدت بأرهاق وانا بيمر عليا اخر لقاء كان مابيني وبين " يوسف" من اخر مره قولتله اوعي تحبني وأنا مشوفتهوش تاني
،او بمعني تاني انا اللي قررت مشوفهوش !
بقالي شهر بالتقريب بخلص شغلي في الشركه وبطلع علي البيت
مبقتش اروح علي الترام ابدا كنت بحاول الهي نفسي بالشغل ومفكرش في اي حد ولا حتي يونس بقيت بشغل نفسي لدرجه الارهاق عشان احط دماغي علي المخده وانام من غير تفكير ....
- خلصتي يا ايمي ؟
- اه يالا بينا
وصلنا الكافيه ودخلنا كان في صمت تام مفيش غير صوت الميوزيك اللي كان بيعزفها شخص علي البيانو اللي في الكافيه ....
قعدنا علي طربيزه وانا بحاول اشوف الشخص بس كان قاعد بظهره ...
كان بيعزف وبدأ يغني ...
صوته حلو اوي ،غمضت عيني وانا سانده ايدي علي الطربيزه وبسمعه بكل انتباه ....
" يامعلمني الحب ياريتني ما اتعلمته معاك ولا شوفته ...ليه بتخدعني ليه خلتني انسي الدنيا واعيش بحلاوته !" 💔 "
كان صوته يشبه لعبد الحليم وهو بيغني الاغنيه بتاعته ..
كان يخلص اغنيه ويدخل في التانيه علي طول وكلهم لعبد الحليم وكأن اللي بيغني قاصد يتعب قلبي ،وفي الحقيقه ان مش لوحدي اللي كنت موجوعه ...
اللي بيغني كان بيغني بكل جوارحه كان صوته حزين اوي باين عليه مجروح واتكوي بنار الحب كعاده كل البشر ...
خلص والكل سقف بحراره حتي انا مسحت دموعي اللي خانتني كالعاده وبدأت اسقف وهو قرب منه شخص وساعده يقوم يقف علي عكازه ...
برقت عيني وهو بيلف ...
- ي يوسف
- ايه ده انتي تعرفي القمر ده؟
- ه هو هو يا ريماس ي يوسف اللي حكيتلك عنه
- بتهزري صح
كنت لسه هرد عليها بس لقيته بيبصلي وبيلف رأسه ثواني وبصلي تاني وهو باين علي وشه الذهول !..
أنت تقرأ
اسكريبتات متنوعه بقلمي / إيمان شلبي
Mystery / Thrillerمجموعه اسكريبتات رومانسي ،كوميدي،حزين ،بقلم ايمان شلبي هنا هتعيش معانا لو كنت حابب تعيط عليك وعلي اسكريبت باب الذكريات 🥲 عايز تضحك عليك وعلي اسكريبت احببت مجهوله 😂عايز محن وفقع مراره هتلاقي كتشير اوي😂عايز كله في اسكريبت واحد عليك وعلي ظننته خالي...
