اسكريبتات متنوعه بقلمي / إيمان شلبي

عاجزه ولكن ( البارت الاول )

#عاجزه_ولكن

لا ده فاته وفااااته رميناااه بماضيه وحكاياته ده فاكر دمعنا هنا علي خدنا هئ هئ هئ  يا تهيؤاته

- صوتك يقرف علي الصبح اخرسي شويه مش عارف اتخمد مش كدددده وبعدين هي مقالتش هئ هئ هئ بتاعتك دي

سندت بأيديها علي السور وهي بتنزل رأسها وبتبص علي البني ادم اللي في الشقه اللي تحتهم وهي بتقول ببرود :

- عندي سؤال بس ؟!

اتنهد بضيق وهو بيشاور لها بأيده تتكلم من غير ما ينطق حرف

سندت خدودها علي ايديها وهي بتبلع اخر لقمه في بوقها وبتقول ببرود اكبر:

- هو انا بغني في بلكونه بيتكم مثلا عشان كل يوم تصحي من النوم بشعرك اللي شبه سلك المواعين ده وتفزعني علي الصبح !!

فتح بوقه وكان لسه هيتكلم بس هي قاطعته يتساؤل:
- يعني ليه الواحد يصحي من نومه علي المنظر المرعب ده؟ يرضيك تبقي  واقفه تغني في أمان الله مع شويه الهواء الحلوين دول ومره واحده تلاقي عفريت بيظهر قدامك من حيث لا تدري؟ هل انت يرضيك

- عفريييت !!

هزت راسها وهي بتقطم قطمه  من الساندوتش اللي في ايديها:

- اه بص بقي يا عسل انا هقولك كلمتين حطهم حلقه في ودنك ؟ ماشي
ماشي أن شاء الله ،ركز معايا ركز معايا ولا مركز في الساندوتش اللي انا  مسكاه

- عندي سؤال بس قبل ما اركز في الساندوتش ا اقصد معاكي

رفعت راسها بغرور مصطنع وهي بتبص علي الساعه الوهميه اللي مكانتش موجوده في ايديها :

- اوك ياريت بسرعه عشان عندي اجتماع

- اجتماع !!
- ا احم متركزش

- اوكي المهم يعني هو انتي كان عندك ميول تبقي مدرسه ؟!

بصتله بأنبهار :
- ايه ده عرفت منين ؟؟

غمزلها بمشاكسه وهو بيقول قبل ما يخرج من البلكونه :

- اصل فيكي شبه من ميس انشراح

برقت عينيها بصدمه وهي بتجز علي أسنانها بقوه لدرجه كانت هتتكسر وبتقول من بين أسنانها :

- بقي انا شبه ميس انشراح ياحيوان ياللي مش محترم ده يابو ودان كبيره شبه الطاسه

- الله يسامحك طب علي فكره بقي   انا كنت هقولك صوتك حلو وقدمي في ذا فويس

بصت لتحت كان واقف وهو ساند أيده علي السور وبيضحك ضحكه خبيثه

- وحياه امك بجد عجبك ؟!

هز رأسه بجديه وهو بيكمل كلامه :
- اه بس ذا فويس انيمل ( بتاع الحيوانات) انا واثق انك هتفوزي

وشها كله بقي احمر وهي بتجز علي أسنانها وبتصرخ بجنون :

- طب وحياه امك اعتدال ما هسيبك يا زياد الكلب