اسكريبتات متنوعه بقلمي / إيمان شلبي

خطيبه أخي ( البارت الثالث)

#خطيبه_أخي
#البارت_الثالث
وكان مفروض محبكش ولو حبيت مبينش ودلوقتي خلاص همشي انا وقلبي اللي دايب فيك !

كان واقف في نص الفيله
بيبص لكل ركن بحسره بيودع كل مكان عاش فيه طفولته ،شبابه ،حبه الاول والآخير

بيودع ابتسامته اللي كانت بتخرج لتصرفاتها المجنونه المحببه لقلبه وهي بتتحرك يمين وشمال في الفيله بتجري ورا اخوها و ورا كارلا اللي دايما بيعصبوها

غمض عينه وهو بياخد نفس طويل نفس من بعده كل حاجه هتتغير كل حاجه هتنتهي

شبابه ،حبه، أخته ،حتي نفسه هتنتهي

بص لشنطه السفر اللي كانت جنبه وجرها وراه وهو بيخرج من المكان من بعد ما قرر أنه يختفي

هيرمي كل حاجه ورا ظهره حتي هي السبب الوحيد اللي كان مخليه يحب نفسه يحب الحياه هيرميها ورا ظهره

هيسيبها للزمن والايام تعرفها قيمته وقيمه وجوده في حياتها وحياه الكل

ركب عربيته وطلع علي المطار بعد ما حجز اول طياره طالعه علي لندن
بالرغم من أنه ميعرفش اي حاجه هناك ولا عنده شغل ولا عنده حياه

وكأنه مقرر يرمي حياته القديمه اللي مسابتش ذكره حلوه في حياته ويبدء حياه جديده مع ناس جديده ياعالم هتسبله ايه ياعالم نهايتها ايه !

..................................................
كانت قاعده علي السرير ضامه ركبتها لصدرها بتبص قدامها بشرود ودموع

وهي مش قادره تتخيل الحال اللي وصلت ليه علاقتهم اكتر علاقه كانت ناجحه اكتر علاقه الكل مراهن علي نجاحها في المستقبل حتي لو حصل ايه

لأن الكل عارف أن هما بيحبوا بعض من زمان من وقت ما كانت هي لسه بضفاير كان بيمر عليهم مواقف كتير ممكن تفرق اي اتنين عن بعض  لكن بحبهم وتمسكهم ببعض كانت كل حاجه بتعدي بابتسامه منها وبكلمه منه وكأن محصلش مشكله من الاساس !

لدرجه ناس كتير كانت بتحسدهم علي علاقتهم وبساطتها حتي وقت الزعل
وكأن الناس بتستكر الفرحه علي بعض !

غمضت عينيها وهي بتفتكر اليوم اللي عرض عليها الجواز قدام الكل بكل حب بدون خجل بدون تكليف

زين الراوي اكتر شخص معقد في نظر الكل جت هي وقعته حولته لشخص تاني شخص عاشق مُضحي شخص بيدفن الماضي اللي كله وجع وبيرتب للمستقبل معاها

كل حاجه اتغيرت في لمح البصر بعد ما كان اجمل يوم في حياتها انها واخيرا بعد كل اللي مروا بيه هتكون معاه في بيت واحد وقدام كل الناس اتحول اليوم لاسوء يوم في حياتها اتحولت أحلامها الورديه لكوابيس بتراودها كل ليله وهي شايفه نفسها بتموت وعلي أيده !!

فلاش باك

كانت قاعده في أوضتها بتلمس الخاتم اللي مزين ايديها بابتسامه رقيقه مرسومه علي وشها لكن بالرغم من فرحتها كانت حاسه بقبضه في قلبها حاسه ان في حاجه هتحصل