اسكريبتات متنوعه بقلمي / إيمان شلبي

احببتُ جاهل ( البارت الثالث)

#احببت_جاهل
#البارت_الثالث

نعم ياختييي بتحبي واحد تاني ؟!!!

-احم ا ايوه ياماما هو الحب عيب ولا حرام ؟!
- لا انا مقولتش كده انما لما تحبي وترتبطي من ورا اهلك يبقي حرام طبعا وعيب ...

- بس هو جاي يتقدم
- يبقي  ابعتيله رقم ابوكي يحدد معاه معاد عشان  يتقدم  انما قسماً بالله لو عرفت انك بتكلميه من ورانا تاني هقول لابوكي وهو يتصرف معاكي ،قليله الربايه ....

قالت كلامها وخرجت من الأوضه وهي بتهبد الباب وراها ...

روحت قعدت علي طرف السرير وانا دموعي متعلقه في عيني ..
طول عمر ماما كده مش بتسمعني ،طول عمرها شايفه أن اي كلام بابا وأهلها بيقولوا عليه كأنه مقدس ..

العيله كلها شايفه أن الحب عيب وحرام وان الجواز لازم يكون صالونات وان البنت لازم تتجوز اي حد حتي لو مش علي مزاجها بس ميتقالش عليها معنسه ..

طول عمرهم تفكيرهم رجعي
حتي ماما زيهم ،تفكيرها زيهم ،مش بتسمعني ...

نفسي اكون زي البنات اللي مصاحبه أهلها ،نفسي احكي لماما كل حاجه من غير خوف حتي لو غلط بس احكيلها لاني عارفه انها هتسمعني وتعرفي الصح من الغلط ...

بس للاسف ماما ابسط ما عندها تروح تحكي لبابا تروحي تقول العيله كلها بنتي عملت كذا وكذا وتخلي الكل يلومني وتخليني اندم اني حكيت  وفضفضت معاها ...
عشان كده بقيت بسكت بكتم كل حاجه جوايا....

بس في النهايه هي امي وانا بحبها ،عارفه انها كمان بتحبني
عارفه انها بتخاف عليا بس حبها صعب شويه يمكن في نوع من القسوه لكنه حب ام لبنتها الوحيده في النهايه ....

تاني يوم

كنت واقفه قدام المرايه بسرح شعري بشرود وحزن وانا محتاره هعمل ايه في الورطه اللي حطيت نفسي فيها
منين هجيب حد يمثل أنه بيحبني ويخطبني عشان أهرب من جوازي من ابن خالتي ...

الشخص السمج ،ابتسامته الخبيثه كفيله  تعصبني ،نظراته المُريبه بتخلي كل ذره فيا تتنفض ...

منين اخترعوا اني معجبه بيه
منين وانا كل ما اشوفه أهرب في أي مكان واقفل الباب عليا من الرعب !

اخدت شنطتي والفون بتاعي وخرجت من البيت ..
نزلت اخدت اوبر ووصلت قدام الكافيه ودخلت قعدت وطلبت قهوه
كنت مستنيه " محمد" يوصل وانا بفكر بشرود ...

- اتأخرت عليكي انا اسف

- ولا يهمك اتفضل
- انتي كويسه ؟
- انا تمام تحب نبدء دلوقتي ولا ترتاح من السكه شويه ؟

- بس أنتي شكلك مش كويسه خالص
- خلاص بقي انت هتصاحبني ؟! كويسه ولا مش كويسه انت مالك

قولت كلامي بكل عصبيه وقله ذوق وهو قاعد يبصلي بهدوء ...