اسكريبتات متنوعه بقلمي / إيمان شلبي

عالم افتراضي ( البارت الخامس والآخير)

#عالم_افتراضي
#البارت_الخامس
قال جملته ولسه هيخرج أتصدم لما آسر اتكلم بهدوء :

- لؤي كفايه لحد كده

لف لؤي وهو بيبرق بتحذير ل آسر اللي قرب منه وهو بيحط أيده علي كتفه

- انا اسف يالؤي بس اختي متدمره كفايه كذب لحد كده
قولها الحقيقه ريحها وريح قلبها
عن اذنكم انا خارج برا

قال جملته وخرج وسابهم

كانت قاعده علي طرف السرير باصه عليه ،والدموع متعلقه في عينيها ،مش قادره تستوعب وجوده

معقوله ؟!

معقوله احساسها طلع صح ولؤي عايش ،معقوله بعد كل التعب اللي شافته في السنه ديه يطلع عايش !

ولما هو عايش ليه اخترع كذبه موته اللي دمرتها
اللي كانت بتموتها كل دقيقه وكل ثانيه بتمر عليها
ليه مرحمهاش ،ليه مرحمش قلبها ،ليه مرحمش عينيها اللي دموعها مكانش بتجف وهي مستنيه في أي وقت يخبط عليها الباب ويقولها انا هنا اهو انا عايش

ليه قلبه كان قاسي عليها للدرجه ديه لدرجه أصبحت فيها مريضه نفسيه

قامت وقفت وهي بتقرب منه ببطئ ،اشتياق ،خوف

خوف يطلع كل اللي هي فيه حلم زي كل مره
خوف أنه يختفي فجأه وكأنه سراب !

ومع كل خطوه رعشه قلبها بتكون اقوي
روحها بتتسحب ،دموعها بتزيد لحد ما وصلت قدامه

رفعت راسها تبص في عيونه واول ما عيونهم اتلاقت حست برجفه ،كهربا في جسمها

في الوقت ده أدركت أنها مش في حلم ،ادركت انه قدامها وأنها خطوه وتقدر تلمسه من غير ما يختفي ويصبح سراب

قربت ايديها اللي كانت بتترعش من وشه واول ما لمسته شهقت وهي بتبعد خطوه لورا وبتتنفس بسرعه

جسمها كله جاب عرق ،هزت رأسها بهستريه وهي حاطه ايديها علي بوقها

- لا لا م مش معقوله لا

قرب منها لؤي خطوه فبعدت خطوتين وهي مش قادره تستوعب أنه واقف قصادها

لوهله افتكرت نفسها بتتخيل وجوده

غمضت عينيها بقوه وهي حاطه ايديها علي ودنها وكأنها بتحاول تمنع أي صوت يوصلها !

أما عن لؤي قرب منها وهو بيشيل ايديها من فوق ودنها وبيهمس برقه :
- وحشتيني

وعلي عكس توقعاته زقته وهي بترفع ايديها وبتضربه كف
كف قوي غير متوقع صوت صداه رن في الأوضه

ومن بعده كان في صمت !

ثواني من الصمت والنظرات اللي خارجه من عين كل واحد فيهم
نظراتها اللي كأنها سهام بتخرج لقلبه مباشره ،وفي المقابل نظراته البارده الخاليه من اي تعبير