اسكريبتات متنوعه بقلمي / إيمان شلبي

احببت جاهل ( البارت الرابع )

احببت_جاهل
#البارت_الرابع

صحيت تاني يوم الصبح ..
اخدت شاور سخن ولبست هدومي ونزلت الكليه
كان لازم احضر النهارده ...

وصلت ودخلت من باب الكليه ،كان لسه بدري اوي
روحت قعدت علي السلم وحطيت الهاند فري في ودني وانا قاعده ابص علي البنات ...

كانوا شله بنات كتير واقفين يحضنوا بعض مبسوطين وبيضحكوا ...
ابتسمت بحزن وانا بشبك ايدي في بعض بحاول احسس نفسي اني مش لوحدي بالرغم اني دايما لوحدي !...

يمكن انا خجوله شويه ؟!
يمكن بخاف اقرب من الناس واحبهم
يمكن بخاف من فراق حد غالي عليا !

مكنتش قادره افهم نفسي ،طول الأربع سنين كليه مصاحبتش حد
مش فاهمه العيب مني ولا منهم ؟!

- انتي قاعده لوحدك ليه طيب ؟؟

لفيت لمصدر الصوت باستغراب وثواني وضحكت وانا بهز راسي بحيره ...

- عادي اتفضلي

لقيتها قعدت جنبي وهي بتمدلي ايديها بمرح : اسمي سما

- وانا شهد
- عارفه باربي

ضحكت وانا بسألها باستغراب : مين باربي ؟!

- انتي الدفعه كلها مسمياكي باربي
- انا ؟!
- ايوه يابنتي انتي شبه باربي جدا

ضحكت جامد  وانا بهز راسي بحيره

- تشبيه غريب والله
- بالعكس تشبيه يليق بيكي جدا
بس انتي طلعتي لطيفه اهو اومال الناس ديه بتقول عليكي رخمه ليه؟؟

بصتلها بحزن والدموع بتلمع في عيني : هما مين ؟

بصتلي بندم وهي بتحط ايديها علي ايدي : ا انا اسفه اوي

- ولا يهمك بس انا مش رخمه ولا حاجه
انا مش بحب اقرب من حد
معظم البنات اللي هنا مش بتحبني من غير أسباب،  والباقي بيحاولوا يتقربوا مني عشان انا دحيحه في نظرهم !..

هزت راسها وهي بتقول بمرح : سيبك ديه ناس بصورم انتي قمر ولطيفه وانا حبيتشك خلاص وهنبقي صحاب

- ده شرف ليا ياجميل
- ياخرابي ياناس هو في حد قمر كده؟
- اه انتي
- روحي الهي تنستري انا اخر مره حد قالي كلمه حلوه من ٧٣ باين

ضحكت جامد علي رده فعلها باين عليها بنت لطيفه ...
فضلنا نحكي وقضينا اليوم مع بعض لحد ما خلصنا المحاضره

- يالا بقي ياستي نروح ناكل
- لااااا انا عندي مهمه قوميه لازم اعملها

بصتلي وهي بتقفل عينيها نص قفله وبتقول باستغراب : مهمه !

هزيت راسي وانا بقول بضيق : الشاب اللي بعلمه عشان محو الاميه

- اااااه صحيح ده انتي فكرتيني انا النهارده هبدء اول درس لعمو بتاع الفراخ ...