اسكريبتات متنوعه بقلمي / إيمان شلبي

خطيبه أخي ( البارت الثاني )

#خطيبه_اخي
#البارت_الثاني

- كنت عارف انك مجنونه وهتعمليها

قالها بهمس وابتسامه خبيثه وهي واقفه مغمضه عينيها بقوه وضاغطه علي ايديها بتحاول تمنع نفسها تلف وتضربه قلمين علي وشه وبعدها تحضنه

- بصيلي يا مي

هزت راسها بنفي وهي ماسكه في فستانها بتوتر

- بقولك بصيلي يامي متخلنيش اتعصب عليكي

مي بنبره صوت أشبه بالبكاء:

- عايز مني ايه

لفها ليه وهو بيصرخ في وشها بجنون

- عايزك عايز تكوني معايا عشان بحبك

دموعها نزلت مقدرتش تكتمها اكتر من كده حطت ايديها علي بوقها تحاول تمنع شهقاتها وانتفاضه جسمها وهي بتقول بكلام غير مفهوم :

- انا مش عايزاك سيبني انا مش عايزاك مش بحبك مش عايزه اعرفك تاني انت خاين و و عايز تنتقم مني ا انت عايز تموتني انا بكرهك مش عايزاك أنت مريض هتموتني ز زي ما قتلت مراتك انا مش عايزاك سيبني انا مش عايزه اموت اا ارجوك سيبني في حالي ا ارجوك

كان واقف يسمع كلامها بصدمه وذهول
لاول مره يشوفها خايفه منه اوي كده لاول مره يحس أنه وحش بالنسبه ليها ،للدرجادي شيفاه مجرم عشان تقول الكلام ده !!

هو مقتلش حد هي متعرفش اللي ورا الكواليس محدش عارف اي حاجه عنه لكن حتي لو متعرفش ازاي تفكر فيه بالشكل ده ؟!
للدرجادي هو شيطان

بصلها وهو بيتكلم بعتاب :

- للدرجادي شيفاني وحش  ؟!

بصتله بشر وهي بتجز علي أسنانها وبتقول كلام دخل قلبه زي الرصاص :

- واكتر انت مش بني آدم انت شيطان يازين شيطان قادر تخدعني وتخدع غيري عشان يحبوك واول ما نتجوز تنتقم مني تقتلني بالبطئ انا بكرهك يا زين علي قد حبي ليك كرهتك

بعد عنها وكأنها وباء وهو بيقول بشرود :

- هو اللي قالك كده صح ؟!

بصتله بقرف ومردتش عليه فزعق بصوت هز أرجاء الأوضه عفوا المكان كله

- ردي عليا هو اللي قالك كده مؤنس اللي قالك كده

- اه ولو عندك كرامه سيبني امشي انا واهلي

قالتها وهي بتقرب منه  بترفع رأسها وبتبصله بقرف وكره لاول مره يشوفه في عيونها هو كان طول الوقت بيشوف لمعه حب خارجه ليه لمعه ترجي بأنه يقرب ميبعدش وكأنه الحياه بالنسبالها لو بعد هي تنتهي كان مستغرب أن في حد ممكن يحبه بطباعه عصبيته المرعبه  بروده في كل وقت ملامحه الخاليه من اي تعبير قلبه الفاضي من اي مشاعر حب

كل ديه حاجات تخلي الكل يبعد عنه يكرهه جت هي كسرت القاعده جت هي برقتها وتفاهمها جنونها ساعات خلت قلبه يعلن دقاته الاولي مستسلم لحب عصف بكيانه أعلن خضوعه التام ليها هي وبس