اسكريبتات متنوعه بقلمي / إيمان شلبي

ساعه القدر( البارت التاني)

#ساعه_القدر
#البارت_التاني

قريت الماسدج وطلعت اجري علي البيت
كنت خايفه لاول مره احس اني ضعيفه اوي كده

كنت قاعده في اوضتي ماسكه في أيدي ساعه براند كانت شكلها شيك اوي

غمضت عيني وسمحت لدموعي تنزل وانا بفتكر سرقتها ليه
أنا مش حراميه ولا عمري كنت حراميه انا كنت هرجعله الفلوس بس مش دلوقتي

للاسف محدش هيقدر يفهم انا ليه عملت كده

سندت راسي علي السرير وانا بعيط بحرقه
حطيت ايدي علي بوقي عشان أكتم صوت عياطي

خايفه حد يسمعني ساعتها لو بابا أو ماما سمعوا وسألوني مالك هقولهم ايه ؟!

بنتكم حراميه !!!

فات اكتر من ساعه وانا علي الوضع ده
بفكر ازاي ابرر اللي عملته قدام الشخص اللي حظي وقعني فيه ،شكله مش سهل ابدا

نمت مكاني من غير ما احس وانا بدعي بقلبي قبل لساني أن ربنا يسامحني علي لحظه اتغلبت فيها من الشيطان وسمعت كلامه

محستش بنفسي غير تاني يوم الصبح قومت علي الساعه ٤ العصر

ياااااه للدرجادي محدش بيهتم بيا ؟!

كل ده نايمه في اوضتي من امبارح الساعه ١٠ بليل حتي محدش فكر يدخل يسأل عليا

ساعات كتير بحس اني عاله عليهم حمل كبير اوي يتمنوا يخلصوا منه ..

عمري ما حسيت اني بنتهم في يوم من الايام ،طول عمري اسمع عن حنان الاب حضنه اللي بيحسس الشخص بالأمان والسند بس في الحقيقه عمري ما جربته ابداً

كنت اسمع عن الام صاحبه بنتها منبع أسرارها حضنها اللي بيشيل حمول كتيره من علي قلوبنا طبطبتها ،كلمه منها تزيح هم جبال بس برضو عمري ما جربته

مسحت دمعه نزلت من عيوني وقومت اخدت شاور واتوضيت وصليت وبعدين لبست وحطيت الساعه في علبه وغلفتها بشكل شيك وخرجت عشان أقابله

وصلت الكافيه ودخلت اول ما دخلت عيني وقعت عليه ..

كان قاعد بيبص في الفون بتاعه واول ما دخلت رفع راسه وكأنه حس بيا !

قربت منه وانا بترعش بالمعني الحرفي
كل ما اقرب خطوه احس ان روحي بتتسحب مني وكأني بقرب من ملك الموت

قام وقف وهو بيحط أيده في جيبه وبيبصلي من فوق لتحت بتفحص وكأني عروسه و بيقيمني

اخدت نفس طويل وانا بخرج الساعه من الشنطه وبمدله ايدي وانا بقول بهدوء عكس التوتر والخوف اللي حاسه بيه

- اتفضل ا انا اسفه
- امممم حراميه بس شيك

قالها بسخريه وهو بيبص العلبه اللي كانت متغلفه بشكل حلو