اسكريبتات متنوعه بقلمي / إيمان شلبي

انفصام ( البارت الاول )

-خطيبك بيخونك مع صاحبتك الأنتيم

كنت قاعده مع اهلي بنتكلم وبنهزر وبنخطط لفرحي اللي فاضل عليه شهرين وفجأه الفون بتاعي اتهز بماسدج فتحتها بابتسامه واسعه علي اساس انها منه كالعاده

اختفت ابتسامتي وقلبي دق بسرعه وانا شايفه رقم غريب بيكلمني وباعتلي صوره خطيبي وهو في حضن بنت وبيقولي أن خطيبي بيخوني ومع مين مع أقرب صديقه ليا!

عارفين احساس الصدمه ،لا  عارفه اعيط ولا عارفه اتفاجئ ولا عارفه اعمل اي رد فعل ،كنت ببص الرساله اللي قرأتها اكتر من مره بجمود وصدمه احتلت كياني

ضربتين في الرأس توجع لا في الحقيقه هي تقتل مش مجرد وجع وخلاص

فضلت علي حالتي أكثر من تلات دقائق واللي لاحظ ده بابا اللي سألني باستغراب :
- مالك يا عائشه؟!

رفعت راسي وانا بهمس بصدمه:
- بيخوني

ماما باستغراب :
- هو مين ده يابت اللي بيخونك ؟

بصيت لماما والدموع بتلمع في عيني وانا بردد بنفس الهمس :
- بيخوني ياماما بيخوني مع صاحبتي

مكانش حد فاهم هو مين اللي بيخوني ولا حد فاهم ايه اللي حصل ووصلني للمرحله الغريبه ديه !

رميت الفون علي الارض وانا باصه قدامي بشرود

تقريبا ماما فهمت ان هي هتلاقي سبب صدمتي في الفون اخدته من علي الارض وفتحته وبصت فيه واول ما شافت الماسدج شهقت بعنف

بابا بقلق:
- في ايه ياوليه مالك انتي كمان

حطت الفون في وشه وهي مازالت في صدمتها وكانت صدمه بابا متقلش عن صدمتنا

فضلنا متنحين لدقايق مفيش حد فينا قادر ينطق حرف ولا قادرين نفسر اللي شوفناه في دماغ كل واحد حرب دايره وصراع بين القلب والعقل مبينتهيش

لقيت ماما بتقرب مني وهي بتطبطب علي رجلي:
- ولا تزعلي نفسك ده خاين ميستاهلش ظفرك

انفجرت في العياط وانا بترمي في حضنها وكأني كنت مستنيه حد يتكلم عشان أخرج كل الوجع اللي جوايا

- بيخوني ومع صاحبتي الاتنين خانوني انا عملت فيهم ايه أنا بحبهم والله معملتش فيهم حاجه وحشه ليه صاحبتي تبص لخطيبي ليه تاخده مني هي مستكتراه عليا  ليه انا عملت فيها ايه

فضلت اقول كلام مش مفهوم وانا بعيط بحرقه في حضن ماما اللي مكانتش عارفه تقولي ايه ولا تعملي ايه

لقيت بابا بيقرب مننا وبيحسس علي شعري وهو بيقول بهدوء ظاهري:
- معلش يابنتي ميستاهلكيش لو ربنا شايفه خير مكانش حصل كده
وبعدين ياعائشه احنا لسه متأكدناش مش يمكن يكون حد هو اللي عامل كده عشان يوقع ما بينكم اهدي ياحبيبي وتعالي نفكر بالعقل العياط مش هيفيد بحاجه !