عقارب ذوي القربى

البارت الثاني والعشرون

مها
سمعت صوت روان وهي ترد //ايي اجيت اجيت
فتحت الباب شفتها وهي تعدل بشعرها وفاتحه عيونها ع النص سالتها = ليش مسركيه الباب
  جاوبتني بتوتر //مو نمت وخفت احد يدخل سرگيته انتي شنو گلج الطبيب

اشوفها من تحجي وياي تباوع للسطح
=ما كال شي نفس الكلام بس انتي شعجب نمتي
- - ما اعرف چنت اقرا ودخت عاد نمت
هزيت راسي ودخلت للغرفه نزلت ملاك وانطيتها جبسها هيه كالت //شسوي عشا
= اسلكي شويه عدس راح نسوي شوربه

هيه راحت انا بقيت اباوع للغرفه بعدها احساس غريب گلي اصعد للسطح صعدت ما شفت شي سطحنا مكشوف
واكو بيوت اعلى من عنده والضوه علي يعني ماكو شي نزلت دخلت للغرفه اجت يمي رهف گالت
- سمعتي ذوله شنو حچو
=يا همه
- تره مو زغيره ذوله الشباب شيردون من عدنا
= خلي ايولون همه الشباب وين ما يشوفون وحده ايصچموها سدي الموضوع

- بس همه حچو علينه
=كافي رهف اسكتي وانسي

رادت تحچي خزرتها هيه سكتت رحت يم روان باوعتلي انا سالتها = شبيج شو مو على بعضج
- ما بيه شي ليش
= مبينه خايفه
هيه ضحكت //انا خايفه منين مو گتلج ما كو شي بس غافيه وفزيت لذلك خفت ليش شكو
= ماكو شي بس من اجيت اكو شباب حقراء صارو يسمعوني كلام

باوعتلي وعكفت حواجبها //ايولون شنو كالو
= لا هيج بس انتي ديري بالج من تطلعين للمدرسه ديري بالج على رهف
- ليش شبيها رهف
=رهف جاي تشب وحلوه
هيه بضحك // اي بس مو احلى مني ومنج

= احنه كبار ونعرف نتصرف بس رهف بعدها عقلها زغير يعني علميها تمشي وهيه مدنكه ما تضحك ما
تحچي بصوت عالي
- ان شاالله بس للامانه رهف كل ذني ما تسويهن اهم شي عدها الدراسه
رفعت اديه بالدعاء = الله يوفقها

اجه ابوي اتعشى وكالعاده مجرد ما كمل اكله طلع اعرف راح يشرب لكن الكلام الي سمعته آثر بيه هواي
بقى هذا حالنه اكثر العبئ عليه ورغم التعب چنت ادرس واحصل درجات وابوي نفس الشي يوميه خمسه
ومرات ينطي تلاثه ويجيب الخبز والخضره ويوم الجمعه نشتري السمج الزغار وربع اللحم نسوي مرتين
والدجاج نشتري وحده كل اسبوعين او تلاثه ومرات كل شهر وعلاج ملاك العبوه الوحده تكفي اسبوع صرت
اطلع من الفلوس العندي وكل ما ارجعها للطبيب اياكد عليه لازم ادخلها معهد حتى شويه تتاقلم ويه وضعها ويدربوها

جاوبته =دكتور مو اب امكانه ندخلها المعهد يريد كومه فلوس واحنه ما عدنا امكانيتنا ما تسمح
الطبيب اتعاطف وياي وصار ينطيني تعليمات اشلون اتعامل وياها وشلون ادربها وانو هو اياكد على تسجيلها
بالمعهد حتى همه ايدربوها وتتاقلم ويه الباقيين ومن ترجع لازم ابدي اراجع تدريباتها يعني لازم نستغل كل الوقت
حتى انخليها تنتبه
ومن عرف بظروفنا صار ايساعدني بحيث صرت اخذها اله كل اسبوعين وادفع مره وحده والمره الثانيه
يعتبرها مراجعه صار يدربها گدامي وينطيني برنامج التدريبها البرنامج سهل لكن بالنسبه الها صعب لان تركيز
ما عدها