عقارب ذوي القربى

البارت السادس والعشرون

مرحبا
التصويت كلش كلش ما يشجع الواحد ع الكتابه
///////////////////////////////////
مها
اتفاجئت من كلام رهف سالتها
= عيدي الگلتي
هيه فتحت الباب حتى تتاكد من روان ما موجوده گالت //مها انا شفتها اب ايدها نقال ونقال من هذا الحديث

رفعت راسي وغمضت عيوني وانا اجر نفس = شلون شفتيها
- - گلتلي ديري بالج على ملاك انا صاعده فوك اجيب ملابسي اتذكرت انا شريت قميصي والصدريه وهيه ما غسلت
اي ملابس ردت احاجيها بس اخذني الفضول صعدت على كييف شفتها ابايدها نقال وتباوع بي وبعدين خلته على اذنها
بعدين سمعت بابنا اندك حييل انا بسرعه نزلت لان حييل اندك

= اي ومنو اجه
- - گلت منو كلي على باب الله
باوعتلها وانا انفخ = اسمعيني رهف ما چنج گلتيلي شي خلي افتهم هاي منيلها
- - اريد اكلج شي
= شنو
- - لا ماكووشي
لزمت ايدها وحاچيتها بنتر = كولي رهف

هيه تلتفت //روان دووم من چنه سوا قبل لا تنقلينه تمشي وياي دووم تضحك وتسولف وتمشي بعيد عني وحتى
الشال تخلي نص شعرها طالع
= ها وهسه جايه اتكليلي
- - انا اكثر من مره نبهتها وگالت هيه حالها حالج واصلا انتي شايفتها وتدرين هيج تلبس وما تحجيين

= انا من تطلع اشوفها شلون تخلي الشال وتلم شعرها ومن ترجع مو صعبه تعدل الشال وشفتيني شكم مره عدلت شالها
رهف بخوف // عفيه مو تگليلها انا گتلج
= لا بس ما شفتيها وين ضمت النقال
- - اي بجنطتها مال المدرسه
= تمام روحي انتي

دنكت وانتجييت ع الكاونتر وهزيت راسي وانا اتحسر واكول = ياربي منين الگاها من ابوي من ملاك لو انوبه روان
جريت النفس وطلعت شفتها كاعده ع التلفزيون اجيت يمها = شنو جاي اتباعيين
- - ما عندي بس المسلسلات التركيه صرت مدمنتهن
= مو دراستج اولى
- - اوو هم كلتي دراستي مها تدرين بيه اضوج من الدراسه
هزيت راسي = ادري بس اهم شي تنجحيين من السادس بلكي معهد كليه

ردت باستهزاء // ها معهد كليه والله بطرانه
= اي اعتبريني بطرانه وادرسي
- - عمي روحي نامي وارتاحي انتي تعبانه
هزيت راسي = اي رايحه وانتي مو تتاخرين
  ... بس تخلص المسلسه ويشرف ابوج اجي يعني وين اروح

دخلت للغرفه واخذت الجنطه بسرعه وفتشتها ولگيته چان نقال حديث لا تستغربون اذا كلت ما اعرف افتحه  وانا اريد
اسد الجنطه بالخانه الثانيه مالت الجنطه حسيت اكو شي صلب فتحت شفت علاگه بسرعه طلعتها ورحت للمطبخ
فتحتها وجانت المفاجأه شفت سوارات حلا وكلادتها ومحبس عرفت بان روان هيه الي ماخذه ذهبات حلا والي
اتهمني ابوي انا ماخذتهن

بلحظتها صار كلبي يدك من الخوف بدون شعور ردت اروح اواجهها بس گلت ليل يجي ابوي ومن ايشوفهن
راح تصير  مشكله ويبسط روان واكيد ياخذ الذهبات يبيعهن ويشتري بيهن عرك
خليتهن بعلاگه ثانيه وضميتهن داخل سطل التمن هيج اجتني الفكره ما اعرف ليش رجعت للغرفه واتمددت على صفحتي
اجت هيه ورهف انا سويت روحي نايمه