عقارب ذوي القربى

البارت الثامن والسبعون

عقيل
من عرفت قصة مها  واكثر الي سمعته من روان عرفت شكد مها اتاذت بحياتها
من هيه طفله بسبب تصرفات امها وطمع عمتها وعدم احساس ابوها بالمسؤوليه اتجاه بناته
وبسبب خيانة عمامها

اتعجبت شلون هيج بنيه بعمرها جاهدت واتحملت مصاعب يمكن رجال عدهم قوه وقدره
ما يتحملون الي شافته
كبرت بعيني لان ما انجرفت رغم الصعوبات والمغريات رغم الحرمان الي عاشته
قارنتها بلقاء والي سويته الها وكيف جازتني بخيانه وخذلان
صرت مجرد ما اشوفها او اسمع صوتها كلبي يرجف وانا اباوع الها بتصرفاتها العفويه
ولمعة عيونها وخجلها وخوفها مني

صرت اعشقها بجنون وقررت ارجع الها كل شي واول شي ارجعه كرامتها

وخلي كل واحد اذاها يتندم من الي سوا بيها لان مها هيه بس الي خسرت

بديت بروان والي خليتها تهاجر بلا رجعه وتنسى انو عدها اخت اسمها مها
وباي وقت لو مجرد تفكر بالرجوع راح تدفع الثمن غالي

وبعدها قررت ارجع بيت حليم المها ومها بس
لان هيه الوحيده الي تعبت واتاذت وتحملت فووك طاقتها
والي هو حقها هيه ابحدها

اهنا بالبدايه لازم اني ما اكون بالصوره لذلك كان اتفاقي ويه ابو سبع
وفعلا بلشنا بالخطه  وصادق لحظه بلحظه على اتصال دائم وياي

بالاول سافرت واندليت العنوان ورحت شفت البيت رغم قديم لكن موقعه تجاري
شفته مطلعين منه محلات عرفت بعدين انو هذني ماخذيهن سليم ومعين
وانو مو من السهوله راح يتخلون عنهن لذلك صار لازم اتصرف بذكاء وحذر  واول شي سويته
   اندليت مكان عملهم  وبما انه حلا معلمه فصار من السهل التعامل وياها
وهنا شفناها انا وابو سبع وعرفنا وقت حضورها وطلعتها ويامن وشلون
وبلشنا الخطه

بيوم صادف حاله الظهر طلعت تمشي ويه اثنين معلمات ويتفارقن بنقطه قريبه من بيتها
اهنا بدا شغل صادق وهيه تمشي اتقرب عليها وحجى وياها بتعب // العفو ممكن تساعديني

باوعتله بعصبيه لان ما كانت منتبهه   هيه شافته وهو لابس الدشداشه البيضه
والغتره البيضه ويه العكال والساعه الذهبيه والتقال والسويج حلا انبهرت
ردت وهيه مصدومه
- - احم نعم
رد عليها وهو يمسح العرك من گصته
- - اذا امكن تساعديني اني هبط السكر عندي وباي لحظه اوكع
فتحت عيونها // ايي فهمني شتريد
رد عليها وهو يتنفس بصعوبه ويمسح العرك من كصته
- - اي شي حلو اخلي بحلگي وياريت تمشين ويايه توصليني السيارتي

هيه فتحت عيونها وهيه تشوف شخص يتوسل بيها حتى اتساعده
  - تمام امشي اهنا ارتاح

  اشرت ابايدها وراحت قبله للمحل دخلت وكلتله وهيه اتاشر على كرسي // ارتاح اهنا
دخل مستغرب بتساؤل وحلا ابتسمت وكالت // محلي هذا ولا يهمك استريح
قربت الكرسي وكلتله // دقيقه واجيك
راحت وغابت شويه ورجعت بايدها عصير وحلقوم وجكليت خلتهن گدامه
هو اخذ حلقومه اكلها وشرب عصير وجر نفس وگللها // شكرا ما اعرف شلون اجازيج
حلا بابتسامه // لاتحجي هالشكل ما سوينه اله الواجب