عقارب ذوي القربى

البارت التاسع والعشرون

وصلت للبيت دخلت اخذت الفلوس من الي ضامتهن وحسبت مال تلث تشهر ورحت اخذتهن الابو غسان
انطيتهن وفهمته كل ما يشوف ابوي يكله بلكي ينطي اقلها اضمن شهر الجاي

رجعت ودخلت للغرفه وروان بعيونها تساول اتقربت منها وانا اخزر بيها وضربتها راشدي
رهف نشغت بس روان صارت تعيط بوجهي // ولج ليش تضربيني شمسويتلج
كمشت شعري وانا هم كمشتها وحتى عضيتها بچتفها هيه صرخت //اااه
رهف كالت بعصبيه // كافي ملاك اتوترت

باوعت الملاك بقت ساده عيونها وتنود خزرتها الروان وكتلها
= انتي اليوم وين رايحه
هيه لازمه چتفها //وين رايحه
رديت بعصبيه = جاوبي انا سالتج
- - للمدرسه
= ومن حليتي
- - اجيت للبيت
= منو كايل للطبيب اريد ابطل

هيه ارتبكت جاوبتني بابتسامه خايفه // ها انا
= انتي ليش رحتي وليش ما كلتيلي
- - انا عبالي صدك مسافر وراجع وخفت ايطردج
= ليش رحتيله منين تعرفين هوه ما مسافر
- - انا شمدريني  زهراء صديقتي كالت اليوم راح ناخذ امي ونروح الدكتور مضر
- - جاوبتها لا ترحون الطبيب مسافر
- - هيه ردت شنو مسافر منو كلج البارحه بابا خابره على امي وگله جيبها اليوم اشوفها
- - سالتها زهراء انتي متاكده
- - طبعا متاكده دكتور مضر صديق ابوي
- - انا خفت خاف ايبطلج لو ايعيط عليج گلت خلي امر ع العياده واشوفه راجع من السفر لو لا

جاوبتها بعصبيه = عاد انتي رحتي
— اي رحت حتى شفت ام علاء بمكانج مره تدخل للطبيب ومره تروح الطبيبها
=. لا تغيرين الموضوع كملي
- - من رحت راسا دخلت حتى ما استاذنت ام علاء لان راحت هوه بس شافني سالني عليج وين اختج
- - جاوبته دكتور مو هيه تكول انت مسافر
- - هو رد عليه لا ما مسافر خلي اختج تجي تداوم
- - سالته ليش شبيها اختي
- - ما بيها شي عطت عليها على مود واحد من المرضى وهيه زعلت وما اجت هاي يومين
- - انا عاد جاوبته دكتور مها ما كالت ابطل كالت مسافر بس ما طول گالت مسافر يمكن يوم يومين وترجع
- - وهوه رد عليه بعصبيه وشنو انتظرها يوم يومين روان خلي اختج اتداوم وين تلگى شغل هالوكت
- - انا جاوبته ان شاء الله دكتور

= بس هوه ايكلي  اذا ما تداومين وتبطلين انتي ترحين بمكاني
هزت راسها // اي ليش الچذب انا ابطل واشتغل حالي من حالج
رهف // وحتى انا مها
باوعت الرهف باستغراب = انتي شنو ؟
رهف // حتى انا ابطل انتي مانه علينه بشغلج انا هم مو زغيره ابطل واشتغل وافيد نفسي واخواتي
اتفاجأت من كلام رهف جاوبتها = حتى انتي رهف الهدرجه اتشوفني مانه عليجن
روان  هزت راسها وصارت تبجي // اي واكثر ضربتيني وغلطتي عليه

رهف حضنت روان وگلتلها // كافي رونه لا تبچيين مها اذا تبطل بكيفها هيه ما قصرت واحنه هم لازم نعتمد على نفسنا
روان // رهف انا ابطل واشتغل وانتي ابقي بدراستج ومها خليها الملاك
ما اكدر احچي الاخواتي الي سوا وياي والي گاله اليه مضر وبنفس الوكت بعد ما اكدر ابطل اخذت ملابسي ورحت
للحمام بحجة اسبح لكن انا چنت ابچي من رد فعل اخواتي