عقارب ذوي القربى

البارت الثامن والعشرون

مها
اجتني روان وهيه اتكلي
- - هذا رجال ايكول اريد اختج وتعالي وياها
سالتها باستغراب = منو ما عرفتي
هزت راسها // لا ما اعرفه بس هوه مبين شخصيه وطاگ

خزرتها ولملمت حلكي = يعني يمته اتجوزين من سوالفج بعدين شنوهوه يعرفني
- - لا من فتحت الباب سلم وكلي انتي مها
جاوبته لا كلي صيحيها وتعالي وياها

رحت للباب بعد ان عدلت شالي وسديت الغرفه على ملاك فتحت االباب شفت رجال داير وجهه وسيارته تلمع
ودشداشه نظيفه ولابس چفيه وعكال صرت وره الباب بس طلعت راسي وانا اكول بكلبي = اكيد غلطان بالعنوان
حمحمت وكتله = اح احم اتفضل رايدمن

هوه دار عليه شفته رجال چبير اكبر من ابوي بس نظيف ونازك والعطر سابقه هوه باوعلي وكلي //انتي مها
هزيت راسي = اي عمو اني
هوه جر نفس وحجى // يمكن ما تعرفيني
= لا والله ما اعرفك منو حضرتك

بلحظتها اجت ابالي هواي اشياء بعضها احلام هوه رد // اني السيد الي يشتغل عنده ابوج
انا بابتسامه = اهلا عمو السيد اهلا بيك
هوه هز راسه وكلي بعد ان جر نفس = والله ياعمو على گولتج ما اعرف شگلج
خوفني اكثر جاوبته = عمو شكو شصاير
عض على شفته ورد // انا من اجاني ابو مصطفى وسولفلي ظرفكم اتعاطفت وياكم خصوصا وهو گلي انتو بس بنات

= اي عمو وانت ابد ما قصرت
- - اعرف بنتي بس ابوج
رديت باستغراب = شبي ابوي
نفخ // ابوج يابنتي مو خوش انسان

جمد الدم بكل جسمي يمكن لو انطك مية رصاصه ما تطلع قطرة دم مني صرت ارجف وريكي يبس عرفت ابوي
مسوي شي مو زين هوه استردف من شافني حتى عيوني غوركن وما كدرت احجي
- - ابوج يابنتي صار اكثر من اسبوعين انا طردته من الشغل لان مو بس يشرب هذا شي راجعله گلت يشرب ابيته
وبالليل لا ابوج حتى بالنهار صار يشرب
= عمو بعد هذا حظه

هز راسه // اي ما كلت شي واتغاضيت عن هواي امور لكن هوه مد ايده على رزقي وانا طردته
انا راسا لطمت خدي ونشغت هوه هز راسه // اي والله يابنتي ما جنت اهنا وانا مخول عمالي لان امامن بيهم
وهوه حمل الواحد بضاعه بستوته تلث تيام يوميه ياخذله بضاعه ومن اجه الرجال يريد بضاعه والفلوس طلب
عليهن مهله انا طالبته بالفلوس مال الحمل القديمات گلي دازهن ويه ابوج الي من حاچيته نكروگال
الرجال چذاب ما منطيني ولا فلس صدكيني حاچيته ابيناتنا لكن ابوج مصر انو الرجال ما منطي
انا گلت يجوز الرجال متوهم لكن خابرني ورحت علي وشغلي الكامرات وشفته وهوه ينطي الابوج الفلوس
واجهته وسكت

انا قاطعته وانا ارجف = عمو الله يخليك لا تخبر الشرطه ويسجنون ابوي انا انا جاي اشتغل واسددك بس
لاتسجنه الله يوفقك يجوز هوه احتاج العلاج اختي ابوي ما يمد ايده
السيد هز راسه // لا بابا مو هذا موضوعي انا لو اريد اسجنه يمكن بنفس اليوم او حتى گاومته عشائريا انا اكتفييت
اطرده لكن الي صار اول البارحه هوه الي خلاني اجي
= شنو عمو شصار ؟

- - رايح يم العلاوي مالتنا وجايبله شكم واحد زعطوط ويشربون ويعربدون ومن جايهم الحارس متعاركين ويا
اتصوري الحارس يكل الابوج حليم عيب هالشكل تسوي هذا المكان بيوم من الايام اكلت منه خبز ايرد ع الحارس
اليوم احركه واخليهم ايجدوون انا يطردني
وصار يغلط ويسب ويفشر عليه وعلى اولادي ويحجي كلام ما صار
الرجال الحارس مخابر عليهم المفرزه ومن شايفينهم شاردين
المشكله يابنتي من سمعو اولادي متحلفين بي گوه لازمهم يكولون اله انلزمه ونجنزه