عقارب ذوي القربى

البارت 80

(عقارب ذوي القربى )
بارت 80
بقلمي # آنيين الليل #
//////////////////////.
ام اديب
من شفت مها اجتني شفت الكسره بعينها ومن راحت الرهف رجعت مكسوره اكثر اكثر
وهيه تشوف شلون اختها الي تعبت عليها والي سوت المستحيل حتى بس توصلها شلون اتنكرت الها
اعترفتلي هيه تحب عقيل وتحبه هواي لكن يمكن بسبب الظروف الي مرت بيها وخوفها على اخواتها
كبتت هذا الحب بكلبها لذلك من شفتها شلون رجعت مكسورة خاطر من رهف وتبجي ومتندمه لان
ضيعت عقيل قررت اساعدها

بالليل اتصلت اب ابني اديب وطلبت منه يجي وهو فعلا اجه فهمته انو يعرض الكشك للبيع
ومها قبلت وما عارضت اصلا فهمته يبيعه بيش ما كان لكن هو ما وافق وكللها
ما نستعجل ابيعته لان يكسرون بسعره ابيعه على كيفي
وراح ابني بعد ان اتشكرت منه مها

الصبح گعدت سويت ريوك كعدت مها شربت شويه حليب ورجعت اتمددت واني ويه
ملاك اتريگنا
بعدها فهمت مها راح اتسوك وما اطول وشغلت التلفزيون الملاك وطلعت اتسوكت خضره
وفواكه وسمج
رجعت لكيت مها منظفه البيت وغاسله المواعين وصرت احجي عليها

-اني مو كتلج ارتاحي لاتسوين شي
=خاله ضجت لان بس متمدده حركت رجليه
-ياالله انتي روحي يم ملاك اريد اطبخ
= خليني انا اطبخ
- اذا طبختي معناتها راح تشبعين من الريحه هذا اذا ما لعبت نفسج روحي اكعدي وانا اطبخ

راحت وانا صرت اطبخ سويت الها مركة سمج لان اعرف الحامل شگد تشتهي ومن صبيت
الغدا ما اوصف الكم شلون شفت الفرحه بعيونها واكلت من خاطر رحت للمطبخ شربت كوب
جاي لان مها خطيه تلعب نفسها منه واجيت اتمددت يمها
الساعه بتلاثه ونص سبحت واخذت ملاك هم سبحتها وبدلت الها ورجعت شفت مها گاعده گتلها
—- مشطي الملوكه

هيه باوعتلي وهزت راسها يعني وين ابتسمت وحجيت // راح اخذ ملاك ونروح للحديقه شويه نغير جو
اذا تحبين امشي ويانه
  هزت راسها = لا خاله ما اريد روحي انتي بس ديري بالج عليها
- لا توصيني وانتي لاتفتحيين الباب الاي احد اني من اجي افتحه بالمفتاح مالتي

طلعنه انا وملاك واخذت تكسي ورحت البيت عقيل ردت احجي ويا واشوف شنو يكون رده عليه
وصلت شافني عصام الي استغرب من جيتي وسالني
- خير خاله خو ماكو شي
ابتسمت بوجهه ورديت // لا ماكو شي رايده اشوف عقيل
عصام بتوتر // خير خاله ست مها زينه

  هزيت راسي // اي الحمد لله ما بيها شي اني جايه اشوف عقيل موجود مو
   عصام جاوبني بقلق // هو توه اجه

- تمام لعد بلغه بس عصام اترجاك ما اريد مها تاخذ خبر اني جايه لهنا
  هز راسه // مثل ما تردين
- توعدني عصام
- اوعدج خاله
- ياالله بلغه
جاوبني بهدوء وهو مبتسم // تامرين امر

شفت عصام خابر عقيل وهز راسه فتحلي الباب وبايدي ملاك الي تريد تهد ايدي حتى تلعب بالحديقه ة
عصام دخل قبلي وفتحلي باب الصاله الخارجيه وكلي // هسه الاستاذ يجي
ابتسمتله // مثل ما وصيتك ما اريد مها يصير عدها علم
اطمني خاله