عقارب ذوي القربى

البارت الثلاثون

مها
ابوي وكع للكاع من شفته نسيت نفسي والي بيه رحت علي حضنته وانا اگول= بابا بابا اكعد شبيك
حسيت برجفه ونفسه قوي اجه نادر ومنذر شالو گالو خلي ناخذه للطبيب

اخذو واجت ام غسان وياها شروق وانا واخواتي صافنات وحده تباوع بوجه الثانيه گتلهن بتعب
= جيبلي حجاب خلي اروح وياهم
لزمتني ام غسان // وين رايحه ابقي ما بي شي
هزيت راسي واحچي بصعوبه = لا لازم اروح
روان // انا رايحه ابقي انتي

حسيت الكاع تفتر بيه ونفسي ثگييل احس الهوى انگطع شروق جابت ماي بارد شمرته عليه شلون ما كان انا
فزييت وانا اجر النفس بعدها راحت جابت ماي وصارت تغسل بوجهي وتگول // ان شاالله تنكسر ايده شيريد منج
ام غسان // لازم غاثاته واله ابوهن فقير
شروق // لا ام غسان هنه الفقيرات وهاي (اتاشر عليه ) تحتار شلون اتدبر العيشه
ام غسان //اي والله صحيح لازم جان سكران مو بوعيه

شروق // گومي مها ادخلي للحمام غسلي رجلينج مزلغات من كد السحل گومي
انا باوعت الرهف الي جانت بزاويه وتبجي وملاك الي تباوع وتغمض
شروق حاجت رهف //روحي جيبي الاختج دشداشه
راحت رهف جابتلي دشداشه وخلتها بالحمام شروق // ياالله حبيبتي روحي غسلي خلي انشوف شبيج واخذج للمستشفى
ام غسان // يا شروق يخليج نادر ترحين ابحدج
- - خاله نادر ويه البنات ما يحجي لان معتبرهن مثل اخواتي

رحت غسلت وجهي ورجليه وانا احس الماي يحركني ما اعرف من الضرب من الجروح والزراك الي
بوجهي لبست دشداشتي وطلعت وانا اشهك من البجي حاجيت شروق بصوتي المخنوك
= فدوه ام ضرغام خابري رجلج شوفي شبي ابوي
هزت راسها //اي هسه اخابره تعاي اگعدي
اتصلت باوعتلي وكالت //فصله شويه واخابر
هزيت راسي وگفت = لا لا خلي اروح اشوف شبي ابوي
شروق // اهدي على كيفج خلي نخابر ونفتهم

صارت تتصل لمن ما سمعتها //ها نادر شصار
- مو هاي مها تريد تجي
- اي هاي يمي
انطتني التلفون //هاج نادر يريد يحجي وياج
اخذته وكوه احجي = الو
نادر// مها ابوج بالمستشفى ضغطه مرتفع شويه ونجي لا يظل بالج
= يعني ما اجي
- - وين جايه هسه ما تحسين اله اجينه
= مشكور

وسديته ورجعت التلفون الشروق الي سالتني// ها بشري
= يكول شويه ويجيبونه ضغطه مرتفع
ام غسان // لا تخافيين خاله ما علي شي
باوعت الها = الله يسمع من حلكج ياربي ما بي شي

رحت على اخواتي وحضنتهن شروق كالت رايحه اتنيم ضرغام وبقت ام غسان يمنه وهيه تسولف شلون روان
ورهف نزلن عليهم وهيه تصرخ وتكول الحگو ابوي راح يحرك مها
وكل شويه سالتني //شبي شيريد منچن
جاوبتها = لان كتله على الايجار هوه ضربني
ام غسان //عزا شيريد بالمثل

ما جاوبتها اكتفييت برفع امتوني اندك الباب وراحت رهف فتحته دخلت روان وراها ابو غسان ونادر ومنذر
وهمه يحاولون ايمشون ابوي خلو بالغرفه البرانيه على فراشه واجت روان وهيه تكول
لگو ضغطه مرتفع انطو ابر ومدرر هسه استقرت حالته
= الحمد لله
سمعت نادر كال //تعالي عمو مها رايدج