عقارب ذوي القربى

البارت الخامس والثلاثون

مها
سمعت الاذان اياذن اريد اصلي بس شلون او وين صرت اردد الاذان ويه المؤذن واباوع للسما اريد من الله الفرج
الصراحه انا تفكيري واحساسي تقريبا انعدم لان بالاساس ما عندي اي هدف ولا افكر اب اي شي بس وين نروح
وشنو راح يصير بينه

باوعت بالحديقه وشفت واحد من العمال يصلي اتقربت منه وانتظرته ايكمل من خلص من صلاته گتله
= تقبل الله
هوه باوعلي ورد // منا ومنج
= عمو بلا زحمه رايده المصلايه اريد اصلي
هوه انطاني اياها انا رحت يم اخواتي وصرت اصلي بعد ان كملت لميتها واخذتها للرجال واتشكرت منه
جاوبني //العفو بابا
سالته = عمو رايده مطعم اهنا

باوعلي وهو رافع حواجبه // عمي بهاي المنطقه المطاعم غاليه
هزيت راسي هو جاوبني // بس اذا تردين اكو كشك ايبيع لفات واكله نظيف
= اي عمو وين
اشر اب ايده // تطلعين منا وتاخذين الشارع سيده وعلى ايدج اليمنى راح تشوفين فرن صمون ويمه كشك يبيع
فلافل وسمبوسه ومقالي
ابتسمت وجاوبته = شكرا الله يخليك
رحت يم اخواتي ولزمت ملاك واشرت الرهف = ياالله

طلعنه وهيه شايله الجنطه انا لازمه ملاك جانت اكو ستوته واگفه تبيع مخضر ملاك بس شافتها راحت عليها
واخذت برتقاله وتفاحه اضطريت اعتذر من البايع واشتري نص كيلو برتقال ونص كيلو تفاح وصرنا نمشي
لمن ما وصلنه للكشك شفنا هواي واكفين يشترون
صرنا على صفحه ورحت يم الرجال انطيته فلوس وكتله تلث لفات فلافل
وفعلا سوالي اللفات وانطيته الفلوس ورحت الاخواتي شفت محل يبيع عصير ابو الربع رحت جبت تلاثه وكعدنا
على صفحه وصرنا ناكل لان ملاك اكلت لفتها واحنه اذا نخليها اب ايدنا ونرجع للحديقه راح تاخذ اللفات ونصفى
بدون اكل

وليش كل احنه حزانه
لايشيل هموم گلبج
يكفي بس انا حزين
يكفي اشيل
همومج هموم الشماته ...هموم وكتي
وكلهن بهالرگبه دين
كاظم اسماعيل الكاطع

صرنا ناكل والنقال اب ايدي وكل شويه اتصل بخالتي والتلفون يرن لكن هيه ما تجاوب كتبت الها مسج
=خاله احنه ابغداد وما عدنا احد نروح له وما نندل وجاي اتصل وما تردين وانتي كلتي انتظريني جايه
شنو خاله بيج شي ليش ما تردين
رهف كلساع وسالتني //ها مها خالتي ما ردت
اهز راسي بالنفي واشوف بوجهها حزن وخوف اجاني مسج شفته من خالتي ابتسمت وجاوبت رهف
= خالتي ردت
رهف بفرح //شنو شتكول راح تجي تاخذنه
فتحت الرساله قريتها
- - خاله مها من سمع ابو جود بسالفة اختج منعني حتى اشوفچن روحي خاله العمامج تره محد يتحمل مسؤوليتچن

وجهي اتغيرت معالمه ورهف تسالني شكاتبه هيه اخذت التلفون وقرت الرساله باوعتلي وهيه رافعه حواجبها
وتهز براسها //اي مها مثل ما تگول خالتي نروح العمامي ياالله خلي نروح للبصره شعدنا اهنا
جاوبتها بيأس = بس نوصل ايكتلونه
هزت راسها //لا ما يسوونها اخذو البيت وكل شي ما راح انكلفهم شي انتي تشتغلين وانا هم اشتغل وادرس مسائي
لزمتني من ايدي //ياالله مها امشي خلي نروح
هزيت راسي بالنفي هيه گالت بعصبيه // اذا ما ترحين انا اروح ابحدي وانتي ابقي اصلا انتي وروان من زمان
اتخططن تجن البغداد الخالتي الي ما كلفت نفسها حتى تجي وتشوفنا لو تدلينه على مكان أمن