عقارب ذوي القربى

البارت الخامس والعشرون

مها
اتفاجآت بسؤال ام غسان لكن انا بسرعه جاوبتها  هيه بقت شويه وصارت تسولف ويانه ع الجوارين  وعلى مرت
ابنها الي ما تشبع من الخلفه تريد كل سنه تجيب طفل لان تغار على زوجها وتريد تلزمه بالجهال
واحنه نسمع ونرد بكلمة اي

وصارت تحچي على منذر الي شالع گلبها وما تدري يمته يستعدل من سوالفه واصدقائه الي مو خوش اوادم
جاوبتها = خاله خلي ايكمل دراسه لو خلي يشتغل ويه واحد من اخوته لو من معارفكم
هيه ردت عليه // ملينه منه لا بالمدرسه فلح ولا بالشغل ملتم على شلة سفله والعام راد غسان يرمي لو ما انا وگعت
سالتها = يرمي ليش ياستار

هزت راسها // اي خاله لان على اساس اتشارك هوه ويه واحد بشغلة ارصده تالي يوميه ايكل للرجال اجيبلك
الفلوس والفلوس من غسان سوده عليه لامهن فلس فلس والرجال ملاكي غسان ومعاتبه ليش ما دزيتلي الفلوس
غسان خلاها ابكلبه وراقب منذر چا غير المصخم طلع يلعب بيهن اقمار وبذاك اليوم لو تشوفين شصار بينه
ياالله انا استاذن هم ياالله اروح
طلعت وراها واگلها = بعد وكت
- - لا ياعيني هم ياالله

شفت بوجهها كلام واتعمدت تتاخر بالمشي سالتها = خير خاله
- - كل الخير يمه بس اريد اكلج شي ولا تعتبرينه تدخل
= لا خاله كولي انتي تمونين
- - احبيبه خاله انتي اشوفج مكسور ظهرج وتشتغلين وتبقيين لليل ديري بالج على ابوج
سالتها باستغراب = ليش خاله شكو فهميني

هيه جرت نفس // خطيه ابوج ما يلحك على عيشتكم انتن مدارس وهاي الطفله علاج ذاك اليوم اجه العمج ابو
غسان واخذ منه مية الف حتى يسوي تحليل الاختج وهم گبل چم يوم هم اخذ ميه يكول علاج وملابس الچن

انصدمت من كلامها ما گدرت ارد عليها يعني ابوي الى متى هالشكل يسوي بينه
بلعت ريگي وجاوبتها بابتسامه = خاله الي احصله من الشغل يادوب يكفي شغلاتنا انا والبنات انتي هم تدرين احنه بنات
وشگد نحتاج
هزت راسها // اي والله حقج انا كتلج لان ابوج ندري بي يشرب وخاف انتي ما تدرين هو ماخذ فلوس من عمج
رديت وانا اهز براسي = لا خاله شنو ما ادري احتاجينه الملاك وهو گلي راح ادبر من ابو غسان وانا ان شاالله باسرع
وكت اسدد الفلوس
هيه ابتسمت // حبيبتي مو عبالج على مود الفلوس بس كلت اخلي عندج علم
= هذا هوه خاله انا ادري اب ابوي اداين منكم الله يكثر خيركم انتو ما قصرتو اعتبرو الفلوس چم يوم يمكم

رجعت وكل شي ضايك بعيني شفت روان شالت استكان الجاي وراحت للمطبخ رحت وراها سالتها وانا اتنفس قوي
= ويامن جايه
هيه سوت نفسها ما مهتمه // ويه دكتور مضر گلي ليل امشي اوصلج
= انا مو فهمتج تصعدين ويه الحجي وهوه ايوصلج
= ما لگيت سياره وصادف مر وشافني وعرض عليه ايوصلني
= ما تدرين ام غسان ما ينضم بحلگها شي

ردت بعدم مبالاة // - - ادري وما عليه بيها
= اسمعيني روان بعد لاتركبين ويه الدكتور والا اگلچ اساسا بعد لا ترحين للعياده اصلا  انا اداوم
- - انا من يمته رايحه للعياده لو ما انتي گلتي على مود ملاك
= ملاك هذا هوه مسويتلها حميه تبقى وياج او ويه رهف وانتي ابقي انتبهي الدراستج
رحت للغرفه اجت وراي وكالت // مها تدرين بيه ما احب المدرسه حبيبتي انتي ارجعي ادرسي وانا ابطل
واخذ مكانج بالشغل لان عجبني هواي