عقارب ذوي القربى

البارت التاسع والستون

مها
شفته نزلن دموعه لان سالته على ابنه بقيت صافنه ورجعت كل شي كدامي
يعني الصوره الي بغرفته هو ابنه
وملابسه الي بالكنتور
وهذني الي خالهن ع الفراش الي بالكاع

بقيت ساكته لان الموقف مو مال كلام
وكف على حيله وراح للغرفه بدون ما يحجي
هالانسان شكد حامل ضيم وشابع قهر

رحت للغرفه اتوضيت وصليت
كل فكري ويه عقيل وشنو الي صار وخلا مكسور الهالدرجة
طلعت للحديقه لان احس بنفسي اختنكت
صرت اخذ شهيق وزفير باوعت شفت ملاك الي اجت عليه تركض وتضحك

حضنتها حيل وهي تكهكه وهم حاضنتني عبالك مفاركتني صار اشهر
حاچيتها = هالايام مقصره وياج

اكيد ما فهمت كلامي الشي الحلو انو ملاك تفرغ طاقتها بالركض
واللعب رحت گعدت ع المرجوحه وانا افكر بكلام عقيل

شفت الباب انفتح ودخل عصام وهواب ايده علاليك اثنين مال اكل
رحت ورا وشفته مخليهن ع الطبله باوعتله وكلت ويه نفسي
=اي عصام وانت شنو قصتك وهذا الحزن الي انت بي شنو سببه هذا الييت مليان اسرار

اخذت علاكه وفتحتها ورتبت الاكل ع طاولة الطعام الي بالصاله الثانيه
ورحت دكيت الباب حتى يجي ياكل مره والثانيه سمعت صوته :: فوتي

دخلت شفته كاعد ع القنفه وخال رسغ ايده على كصته اتجرات ورحت
كعدت بصفه وانا اسمع بس انفاسه واشم ريحة الدخان
جريت نفس وحجيت
= جابو الغدا وحضرته

بقى بسكوته ما جاوبني رديت كلت
= ياالله خلي نروح ناكل
جاوبني وهو مغمض ::ما اشتهي
= حتى انا بس لازم ناكل ولو شويه حتى نبقى عايشين مو هذا كلامك

وكفت وهو جر نفس وكام وياي طلع وانا ورا كعد ع الكرسي وانا كعدت بصفه
وصار يشرب بالشوربه وانا اباوع اله
كان الغدا عباره عن صينية دجاج بالفرن وياها تمن وحشو ومخلين صحنين دولمه
مع المقبلات والخبز
انا اكلت دولمه وسويتلي لفة دجاج وصرت اكل

اما عقيل فبقى صافن اخذت قطعة دجاج وقربتها من حلكه هو باوعلي اخذها
واكلها بوجهه ابتسامه باهته
باوعتله وعرف من نظرتي اريده ياكل واعرف انو ما يكدر لكن لازم
اخلي ياكل شويه خصوصا وهو اتخبل ع التدخين

شلت قطعة دولمه بالخاشوگه وخيتها بحلكه صار ياكل بيها
واشوف بعيونه دموع وحزن
وكف وانا وكفت سالته = شنو اسويلك جاي لو گهوه
هو رد عليه :: اتغدي مها
هزيت راسي = خلص شبعت
:: بس انتي ما اكلتي
= حتى انت ما اكلت
:: اني متعود
=خلص شبعت
:: رح ارجع اكعد بس حتى تاكلين
هزيت راسي = لا لان اذا انت ما تاكل انا هم ما اكل

جر نفس وراح الغرفته وانا لميت السفره وخليت بحلكي دولمايه چانت طيبه
ورحت سويتله كهوه والي هم دخلت لكيته كاعد خليتها كباله هو كمل جكاره
وشعل ثانيه وسحب منها نفس سالني
:: اشو ما عقبتي عليه لان ادخن
بلعت ريگي = مرات انشوف شي ايضر بس يساعد الواحد حتى يرتاح