عقارب ذوي القربى

البارت الخامس والستون

عقيل
ما صدكت من ابو سبع كلي لكيتها رحت اركض قبله للسياره هو اجه وراي يمشي وانا اريده يستعجل
وصل يمي بقى واكف وباوعلي
عقيل على كيفك لازم نجيبها للبنيه بهدوء
جاوبته بقلة صبر :: هم كلي على كيفك اني شمسوي
بهاي تصرفك راح تخرب كل شي

:: تره مو مخبل رجال شكبرني وشكدني
اي وجاي ترجف على طفله
سكتت وباوعتله بعتب هزيت راسي وحچيت بقهر
:: بهاي صدك ارجف لان لكيت روحي لكيت بنيتي لكيت عمري
هز راسه // مفهوم عقيل انت شتريد
بدون ما افكر ::مها
اعرف وبعد
:: اريدها اريد اتسامح منها

صادق انتچى ع السياره // تدري عقيل ما شفتك بهيج موقف ولا يخطر ابالي انت هالشكل تسوي على مها
باوعتله وبعيني دموع :: يمكن عقاب او يمكن عوض
رفع ادي بالدعاء :: ان شاالله عوض
ياالله صادق
::اي
ركب يمي وهو ايكلي // شوف تسكت ما اقبل واحد يحجي ويه بنيه اني ولي امرها بدون ما يكون
بيناتهم شي رسمي

هزيت راسي وابتسمت بمراره :: بس كون تقبل اتسامحني كل شي تريده اسوي
صادق وهو يربت على چتفي // تقبل تقبل يراد الها صبر ومثل ما كتلك الزم اعصابك
هزيت راسي وساق صادق السياره وخابر علاء وفتح السبيكر //ها علاء شنو
بعدهي
ليش
بقى عدها هواي ما بايعتهن والظاهر لمن ما تبيعهن ياالله ترجع للبيت
اي ابقى راقبها ومن اكلك اشتري
اشتري كله
اي كله
صار ابو سبع

تقريبا وصلنا خابرعلاء كله يشتري وراح اشترا منها وخابرنه هي راحت تتسوك
وگفنا على صفحه وعصام خابر صادق الي كله خلي علاء وتعال الحكنا
بقيت كاعد اريدها تجي وصدگوني هذا حال اي واحد ينتظر لان الانتظار صعب وصعب كلش
ابو سبع كلي // اسمع عقيل اي موضوع ما تفتح وياها البنيه اكيد مجروحه ومقهوره منك
:: صادق انت شتكول
مثل ما سمعتني عندك بيت وتتفاهم وياها وانا موجود
:: اي يعني شتريد اسوي
تلزم اعصابك

هزيت راسي :: ما بقت اعصاب
اعرف الله يساعدك بس اريدك تتحمل
شفتها بمشيتها الخجوله وهيه لازمه ملاك من ايدها عبالك صار سنين ما شايفها اجيت انزل لكن
صادق لزمني وگلي // اوگف عقيل لاتتهور
ماسمعتله فتحت الجامه وصادق لزم ايدي حاچيتها :: اركبي مها
بقت متفاجئه وشفت الخوف بوجهها حسيت بيها ترجف مثل السعفه وكالتلي وهي خايفه
= استاذ انا سويت الي ردته مني

حاجيتها بتوسل :: مها اصعدي
ابو سبع كلي // عقيل على كيفك
ما اتحملت ردت ابجي جاوبته بتوسل :: گلها خلي تركب
فتحت الباب ونزلت ونزل ابو سبع من شافته خف توترها خصوصا من كلها //اركبي بابا لا تخافيين
ركبت هي وملاك وابو سبع يسوق وانا اريد بس اوصل للبيت ما اعرف شنو راح اكللها
ولا شلون اتاسف الها

وصلنه نزلت من السياره دخلت بدون ما اباوع الها لان اعرف صادق راح يحجي وياها
رحت للمكتب واحس بكلبي يريد يطلع وانا محتار شنو اگللها وشلون اتعذر منها