عقارب ذوي القربى

البارت الخمسون

مها
بهاي الايام الي بعد الحادث كنت خايفه لا علا او ام صفا يرجعون ايئذوني فچنت من اطلع امشي بسرعه حتى اوصل
وارجع للبيت بسرعه مرات يتهيأ الي راح تجيني ام صفا وتخطفني وتاخذني العلا الي اكيد راح تنتقم مني فاابقى
طول الليل سهرانه ومرات ما انام
ومن اروح البيت عقيل نفس شغلي اقوم بي واسوي العقيل الكهوه

اغسل للحجيه واوكلها واطلعها للحديقه واسويلها مساج وانطيها علاجها واغير فراشها
اما عقيل فنفس ما هوه حتى مرات اكول معقوله هوه نفسه الي شفته ابيت ابو سبع
ارجع اسكت واعاود الشغلي

وبدت المدارس وداومت رهف بالاعداديه بعد ان انطاني ابو سبع فلوس واشتريت الها ملابس جدد والي بقى
من الفلوس ضميته حتى اخذ الها چاكييت للشتا
وملاك عد ام اديب الصبح اروح اشتريلها شغلات من المحل ومن ترجع رهف الظهر تاخذها وتروح
للبيت تنتظرني
اكثر من مره حاولت ويه ام اديب انطيها الخمسين الي زيدها الي عقيل لكن هيه رافضه وتكلي ملاك ما تسوي
شي بس تباوع للتلفزيون وتاكل جبس وتكرز حب بالعكس لكت شي تلتهي بي لان تحس بالوحده

فمن قبضت مريت بالسوك واخذت الها (قطعة قماش جديده وشحاطه وشال) بالبدايه ما قبلت لكن من گلت
هنه هديه قبلتهن
اباوع للجبه مالتي عتكت كلش قررت اشتري عبايه اسلاميه بالي بقن من فلوس ملابس رهف واعوضهن من اقبض
وفعلا من رجعت من بيت عقيل رحت اشتريت عبايه اسلاميه صدكوني من اول محل اخذت عبايه سوده بسيطه
ما بيها شغل ورجعت وبطريق احمد الله واشكره لان ملاك يم ام اديب الي ما تقبل تاخذ اجره

ورهف بالمدرسه اقلها خلصت من ملحتها وانا ما بطلت بقيت يم ام عقيل وضامنه الي راتب وياها وجبة غدا
الي والاخواتي
وبقيت بهذا روتيني بس الصبح اتريك واسوي الكهوه وبعدين ابلش شغل الحجيه

مرات استاذ عقيل يطلب كهوه وره الظهر اسويله ومن ادخل للغرفه بعد ان اخذ الحجيه للحديقه ما اطلع منها الى
ان تجي الممرضه وتستلم مني فما اعرف من يطلع او اذا احد اجاهم لكن خلال هاي الفتره صار  شي حلو
انو ست غدير جابت ابنيه وفراس سماها احلام الي عرفته من ام نوزاد انو غدير ما قابله على
اسم احلام لكن خابرها عقيل وكللها احلى اسم ومن سالته شلون كللها ادمجيهن (احلام فراس )

اتعجبت يعني عقيل حتى ما راح الزوجة اخو يتحمد الها السلامه والي عرفته بعد اسبوع من ولادتها جابها
فراس هيه والطفله بالليل العقيل حتى يشوفها وعقيل ما قصر باسها وانطاها مبلغ گال الامها هاي الها
ومبلغ ثاني السلامة غدير  وراح خلا الطفله  بحضن امه الي ما چانت منتبهه الشي
واهم شي انو انا ما صرت اشوف علا ولا ام صفا

مرات من ابقى ابحدي والحجيه نايمه اتذكر سيف الي ما اعرف عنه شي راح يصير شهرين
وابقى اسال بنفسي = ياترى بعده عد كلامه لو اتبدل
= هم يتذكرني
= هم اشتاقلي
وارد واكول = الشهرين راح ايخلصن واكيد راح يرجع ونشوف شراح يسوي
مر ع الحادثه اكثر من شهرين وسيف ما بين صرت احجي ويه نفسي
= اكيد لو جاي چان على الاقل اجه وشاف الحجيه
= يجوز مددو الدوره
 
اخذت كلام ام نوزاد انو ما اسال عن شي ما يخصني والي يردونه نعرفه راح نسمعه تلقائيا لذلك
انا انتبهت بس الشغلي ويه الحجيه ومن استاذ عقيل يريد اسويله كهوه اسويها واقدمها واطلع لان صار
يطلبها مني اكثر من مره وعرفت هذا الشي بدل الخمسين الف الي زيدهن على راتبي