عقارب ذوي القربى

البارت الرابع والعشرون

من سمعت كلام روان حاچيتها بنتر
= اشش ونصي صوتج واذا عندج حچي انزلي جوه واحچي

هيه نزلت وحسيت بيها ضامه عليه شي او بيها شي رحت للبلوكه الي بصف بيت ام غسان صعدت فوكها بس لان
الدنيا ظلمه ما شفت شي نزلت واباوع الها جانت مندمجه وتغني وتباوعلي وتسوي حركات على اساس هيه مطربه
بلحظتها ابتسمت يعني روان قبل دقايق جانت ضايجه وخصوصا من ذكرت اسم امي وهسه تغني وتهز بجسمها
انا هزيت ايدي وانا اشوفها شلون شالت ملاك وصارت تحرك بيها وهاي الاخيره ما اعرف ليش اتضوج من روان

وهيه تكلها // انزلي انتي نمونه صايره عبالك فيل
وبليلتها اجت ام غسان وكعدت شويه يمنا وانا اشوف شلون روان اتاهل وتسهل وهيه فرحانه وشلون معتنيه بالكلاص
وبالجاي وتحچي بهدوء ام غسان كالت
اليوم الي سويتي ويه ابن نادر الشرطي محد ايسوي
= شلقصه خاله اي واحد عده معرفه ايسوي

ام غسان هزت ايدها // اتگول اي واحد ولج زلم مشوربه رادت تاخذه للمغيسل وانتي نقذتي حياته لو ما انتي
چان هسه الولد فاتحته منصوبه
رهف // اي لعد شعبالكم هاي مها مو حي الله
— اي بس لو تشوفين من اجه نادر شلون لزمها وموتها كتل المرته انا رحت فكيتهم رادت تموت ابين ادي
انوبه غدت زركه وانكطع النفس عنها

روان // يا صدوك
— اي وداعتج
رهف // صح حتى احنه سمعنا العياط بس عبالنه جهال بالشارع
— - ياجهال ذبحها ذبح وبعدين من رحت انا وام مهدي جيرانهم فكينا منها لو تشوفينه صار على صفحه ولزم
ابنه وصار يبجي عبالك طفل جاهل حتى ام مهدي غمت شروق

روان // منو شروق
= مرته اشبيج
- - ليش غمتها
- - غمتها باثنين اديها وگلت الها بيش ملتهيه جان الولد مات
= بعد قدر وراد يصير

- - ولو تشوفينه هونادر شلون صار يضرب على راسه ويگول انا ردت اشيلهم من المنطقه وحچيت اشكال
والوان وغلطت وسبيت تالي هيه صارت سبب نقذت ابني الوحيد
= الحمد لله طفل برئ ما اله اي ذنب
- - انوب هاي المسكينه مرته انغمى عليها وصار وجهها تكولين وجه ميت
= خطيه
- - اي مو عدها فتحه بالقلب ما ادري شني هوه اتلاحكها وانطاها علاج انوب ام مهيدي صارت تحجي علي
روان بضحك // شتگول
ام غسان // والله صدك اتكله خايب مشور بيك منساع الولد وهسه امه

ضحكنا على كلامها وراحت ام غسان وانا اتوسلت بيها تبقى تتعشى (وهمزين ما بقت ) لان عشانه يادووب ايكفينه
من طلعت ام غسان رهف گالت /. دورو التلفزيون خلصت نشرة الاخبار والمذيعه ام غسان
انا ضحكت وروان زمخت عليها وهيه اتگللها //  ولج عيب مره جبيره فووك ما تجي وتطل علينه
رهف // بس مو هيج سطرتنا فلان هيج وعلتانه هيج وذاك كتل مرته وذيج اتعاركت ويه عمتها لا واحلى شي
احلى شي
مها تتوسل بيها تبقى تتعشى ويانه غير انتحر انا الفلافل شگد صارلي مشتهيتها وهاي تريدها تبقى تتعشى
روان // امداج تبقيين ام بطن وبس اتهمين بيها
- - اي ليش اچذب انا من اشبع اسيطر وعقلي يتوازن واصير اركز بدراستي
روان // الخاطر الله شلون غثيثه
عرفتهن راح يتعاركن = كافي وياالله خلي نتعشى
راحت روان جابت الفلافل والجاي وصرنا ناكل وانا اسوي قطع زغار من الصمون واخلي بحلك ملاك
راحت روان تغسل الصحون وانا اتمددت بعد ان طلبت من رهف اتنصي التلفزيون وغفيت ما كعدت اله
اب آذان الفجر
گمت اتوضيت وصليت ورجعت اتمددت حسيت بحركه بالمطبخ عرفت ابوي هوه مرات يحب يشرب جاي
رحت كتله وانا منعسه واتثاوب = صباح الخير
- - صباح النور
= انا اسويلك جاي روح ارتاح
هوه رجع الغرفته سويتله چاي وخليتله صمونه وجبنه هوه اكل ويباوعلي سالني //اليوم تاخذين ملاك للطبيب
هزيت راسي = اي بابا
- - والطبيب ما يرادله كشفيه
= اخذت راتب نص الشهر من الطبيب
- - ما سوينه شي راتبج راح الملاك
= اي بابا خلي ايروح ولا تبقى ما نعرف شبيها
- - هسه ايكلج حساسيه ويكتب الها عصاره
هزيت راسي بدون ما احچي ويا ما اعرف مرات احس اب ابوي ما يحبنه يكرهنا وبالاخص ملاك ومرات احس بي
شگد حنين ويخاف علينه
ندهت البنات الي گعدن وهنه متململات واتريگن وشربت ملاك حليب وجاي وخليتهن ايبدلن ومن طلعن من
الغرفه رحت للفلوس واخذت منهن واكول الله يرحمج يابيبي هواي ساعدتينه
طلعنا وانا الطريق كله افهم بروان شلون تتصرف ويه المرضى وصلت روان للعياده ورحت فتحت غرفة
الطبيب وهويتها
وبعدها رحنا انا ورهف الدكتور ثائر ولگينه ناس جايين قبلنه المهم رقمنه چان سته بين ما اجه الطبيب ما اسولف
الكم على كمية الاحراج الي سوتها ملاك بحيث حتى حجابي شكم مره وخرته من شعري وصل سرانه ودخلنه دكتور
ثاىر بس شافني ابتسم بوجهي  // هاا وين اشو گطعتي
= دكتور بعد شسوي ما عندي مجال
هز راسه  // دكتور مضر هواي يحمد بيج ويگول كلش مرتبه حتى اتندمت گلت لو مخليج يمي
= لا دكتور تره علاوي خوش ولد وهم امرتب
باوع الملاك وسالني // ها شلونها ؟
- - نفس ما هيه وانا ماشيه ع العلاج بس نفس الحركه زايده مو ناقصه
شلتها وانا لازمه ايدها =  دكتور شوف هاي الحساسيه بدت اب ايدها وهسه صارت ابطنها
هو گلي  // الزميها
شاف الحساسيه وسالني // اتحگها
= اي دكتور مرات انا احاول احكها على كيف لكن هيه اتحكها الى ان يطلع الدم
- - شكد صار ؟
= تقريبا شهر
الدكتور هز راسه ورجع كعد وره الميز وكلي // شوفي مها (وجر نفس ) ملاك يراد الها تسويلي تحليل وهذا
التحليل ما ايسوونه بالمستشفى العام لان يدزونه  المختبرات ابغداد
فتحت عيوني بخوف بس هوه ابتسم // على كيفج التحليل هذا يعرفون من خلاله الاكل الي ايضر بالدم ويسوي مثل
هيج حساسيه  يعني تصير زيادة معادن بالجسم انا كتبت الج ورقه للدكتور هو اهنا بس دكتور واحد مختص بهيج
تحاليل مهمه
هزيت راسي = اي دكتور اسوي
الدكتور // التحليل مكلف شويه وبين ما يسوي الطبيب ويدزونه العينه المختبرات بغداد ياخذ بين العشر تيام
الى الاسبوعين
= هاا دكتور ؟
- - انا هسه راح اكتب الها عصاره خليها الها بالليل ادهنيها بعد ان تغسليلها وتنشفيها كلش وهذا شراب بس
بالليل تستعملينه ايهدىها ويخليها تنام وما اريد صوت عالي ولا هوسه يمها
هزيت راسي وسالته // يعني مي خالف ما اسوي التحليل هسه
- - اي عادي بس حاولي لا تتاخرين ها وقبل لا انسى لاتاخذيها ابحدج للطبيب خلي يروح وياج رجال يلزمها لان
ما راح اتسيطرين عليها
= ان شاالله دكتور مشكور
هو ابتسم ودك الجرس اجه الولد گله //علاوي رجع الكشفيه
= بس ما يصير دكتور
- - مو شي مهم وحتى العلاج  لاتدفعين فلوسه
= لا هيج هواي
- - مو هواي روحي سوي التحليل وارجعيلي