نوارة العميد سلطان

الحلقة 5

نوارة العميد سلطان
نوار كي مشيت و خليت فاروق رحت ركبت و ممبعد تفكرت حاجة قلت لماما حبيبة معليش دقيقة و نرجع قالتلي غير الخير لقاتلها دقيقة برك و كي نجي نحكيلك رحت لخالي و قلتلو خالي قول للرحمة تهز قشها و بناتها و يخرجو من الدار سمانة نلقاك جبتيلي المفتاح للميتم و رحت و خليتو واقف مخلوع في قراري ورجعت للسيارة
سلطان جات حبيبة و ممعاهاش الطفلة لقيتها فرصة باه نهدر معاها قلتلها انت من كل عقلك جايبتلي طفلة كون كي تزوجنا جبنا طفلة راهي كبيرة عليها و تقوليلي اتزوج بيها انا كنت حاسب تجيبيلي مرا عادية في العشرينات لقيتك جايبة الطفلة الي مع دخلت للسيارة قالتلي عمو
حبيبة ياسلطان متحكمش عليها من المنظر انا الطفلة هده ربيتها و نعرفها مليح وانا مستحيل نجيب اي وحدة و نزوجهالك انا جايبتلك هده خاطر عندي ثقة فيها و ربيتها و نحبها
سلطان بصح الشي هدا ميسمحلكش باه تظلميها بزواجها بيا انا الي في عمر باباها ووهي صغيرة قالتلي لالا انت متعرفش مصلاحتها اكثر مني انا من زواجها بيك راح نوفرولها معيشة هانية و راح انت تكون ليها اب و زوج و سند و هي راح تكون ليك ام ولادك و حبيتك وعلابالي راح تحبها و تحميها و انا راح نكون امها و راح نكون ام ليها وولولادها الي راح تجيبوهم انت و هي علابالي هدرتي صعيبة تتقبلها اي مراة بصح انا ماشي كيما كل النساء انا نحبك و نحبها ربي يعيشك سلطان اقبل و اله يجي النهار الي تشكرني عليها و الله خلينا نكونو عايلة كيما الناس و لكان على عقلها تقول صغيرة و زعطوطة عقلها كبير متشوفش مع شكلها حاول تتعرف فيها و تقيم عقلها و انا علابالي فيك من اول نظرة تعرف الانسان الصالح من الطالح احنا نهدرو هكا حتى لقينا نوار جاية قالي سلطان خليها على ربي
نوار طلعت للسيارة و قلت عمو اسمحلي طولت عليك
سلطان شفت مع حبيبة بنص عين و كانني نقولها راهي تقولي عمو
حبيبة تبسمت معاه وغمضتلو عينيا بمعنى طمن بالك ودورت لنوار قلتلها حبيبتي على راحتك مهما طولتي تلقاينا نستناوك
نوار تصوري يا ماما حبيبة بابا خلالي الدار و الحانوت و السيارة وكامل كتبهم باسمي كان حاسب روحو راح يعوضني بيه معلابالوش بلي الي كنت نحتاجو منو ماشي الدراهم و لا دار و لا السيارة الي كنت نحتاجو الحب و الحنان و الاهتمام و السند تاع الاب و تعمرو عينيا بالدموع خاطر كان قلبي معمر
حبيبة حبيبتي نوار ترحمي عليه و ادعيلو بالمغفرة هو باين كان ندمان على عمايلو باين كان ضعيف بزاف قدام مرتو و على العموم ربي راح يعوضك مستحيل راح تعيشي كل حياتك وحدانية ولا نظلومة ربي راح ينصرك و معلابالك واش مخبيلك ربي
سلطان كنت نسمع وساكت والطفلة صح باينة نية و تعدبت بزاف في حياتها وصح محتاجة اب في حياتها حسيت بكل كلمة قالتها حتى لقيت حبيبة قالتلي حبيبي سلطان هبطنا انا و حبيبة في الروستورون هديك الي قدامنا قلتلها وعلاش قالتلي عندي هدرة مع نوار و غمزتلي و تبسمت عرفت حبيبة راح تهدرلها و تقترح عليها موضوع الزواج تنفست تاع واحد معندو واش يهدر و هزيتلها راسي تاع ايه
نوار كي سكت و انا نبكي ولات ماما تهدر مع راجلها المشكل يحكيو بالالغاز و انا مفهمت والو محبيتش اصلا نخمم خاطر الي فيا يكفيني بصح الي حيرني في واش حابة تحكي معايا ماما حبيبة قتلني الفضول هبطنا قدام مطعم باين كلاس دخلنا قعدنا في طابلة و ماما حبيبة غير تشوف معايا و باينة حابة تهدر حاجة مهمة قالتلي ناكلو ساع و ممبعد نحكيو و تبسمت معايا بكل حنان طلبت انا بيتزا و هي تاني مع بيبيسي كلينا و طلبت قهوة ليها و انا جابتلي تحلية و قالتلي حبيبتي حابة نهدر معاك بشرط متقاطعينيش علابالك يا نوار بلي كل طفلة مهما طولت و قصرت مصيرها الزواج و خاصة الي في الحالة تاعك يانوار معندها ىحتى واحد و الزواج هو السبيل الوحيد باه تقدر تستقر و تدير عايلة و تستقر وراجل يحميها و يكون ليها سند و عون
نوار هي تحكي و انا مخلوعة في ماما مخليتهاش تكمل هدرتها و قلتلها ماما حبيبة بصح انا مزالني صغيرة حتى لقيتها حطت يدها على يدي و كمشت عليها و قالتلي ياعمري ساعات الحياة تجبرنا نتخدو قرارات مصيرية و احنا صغار علابالك علاه خاطر كاين فرص متجيناش كل يوم وكي نكبرو نندمو الي متستغليناش هدوك الفرص وانا مهدرتلكش الهدرة هده على الزواج غير خاطر علابالي الي راح يتزوج بيك راح يعيشك ملكة و يسعدك و يكون ليك كل حاجة تمنيتيها في الحياة و يعوضك على الحرمان الي عشتيه قلتلها بصح شكون هدا الراجل يا ماما قالتلي راجلي سلطان ......................................... يتبع