نوارة العميد سلطان

الحلقة 7

نوارة العميد سلطان
نوار درت ليها قلتلها راني موافقة و هي هزت راسها مابين يديها و ضربتها بتبسيمة و فتحتلي يديها تاع ارواحي ليا جريت ليها حضنتني و قالتلي متاكدة هزيتلها راسي ايه متاكدة يا ماما
حبيبة وليت نحظن فيها و نعاود و نزير عليها وقلتلها الف مبروك حبيبتي
نوار الله يبارك فيك وولات تضحك و بعدتني عليها شوية و قالتلي درك قوليلي من عند من نخطبوك قلتلها انت كل اهلي يا ماما وماعندي غيرك و انت المسوولة عليا
حبيبية يا عمري و عينيا يا بنتي بصح لازم يكون واحد من دمك و لحمك نطلبوك من عندو
نوار قلتلها كاين خالي بصح عندو 8 سنين ملي تبرا مني و طيشني عند بابا بصح واش نعمل معندي حتى واحد من غيرو قالتلي معليش حبيبتي باسم يتسمى خالك خلي تفوت على الاقل شهرين ولا ثلاثة على موت باباك وممبعد يفرج ربي و بعد ثلاث اشهر راحو خطبوني من عند خالي و في البداية فاروق ولدو دار حالة و مقبلش و قالهم انا نحبها و رايدها وبنت عمتي انا اولى بيها من الغريب و انا صغير و راح تزوجوها لواحد قد باباها بصح اول مرة دارهم يوقفو في وجهو و قالولو هي الي عندها الحق ترفض ولا تقبل و بزاف عليها الي شافتو من عندنا و من عند باباها منسيفوش عليها اصلا معندناش الحق هي دارتلنا الوجه وخلاتهم يجو يخطبوها من عندنا مراحش نكسرو فرحتها و نرفضو الراجل المهم رجعو الموافقة للسلطان جهزت ماما حبيبة للخطبة تاعنا و معاها الفاتحة جاتني على الصباح ماما حبيبة جابتلي لبسة و عيطت للحفافة حاستها جاية تخطب لولدها ماشي لراجلها و راح تطير من الفرحة عملتلي كيما اي ام تعمل مع بنتها مخلاتني نحتاج والو عرضت البنات تاع الميتم و منهم رشا و عرت شوية ناس من عندهم لافامي داتني للصالون كانت حاكمتلي موعد و بدلت تم في الصالون وهي تسمي و تقولي بي يبعد عليك العين مولات الصالون محبتش تكثرلي المكياج حسب كلام ماما حبيبة انا مليحة بلا مكياج وولات تقولي يشوفك سلطان يهبل عليك و انا محتارة كيفاش تحكي على راجلها و تقول يهبل عليك رغم متاكدة بلي قلبها مكسور ومحبتش تبين وصلنا للدار مع التزغريت تلاقاتني ام سلطان مراة كبيرة و بالزغاريت و وهي تسمي بالاسم الله و تقوول ربي يبارك و يبعد عليكم العين لقيت الدنيا شطيح و رديح و صحاباتي تاع الميتم فرحانين هوما تاني جراو ليا و يشطحو فيا وانا بالي كامل مع ماما حبيبة الي ساعة تضحك و ساعة تغيس مع الهولة الي صايرة وانا ولاو الدموع في عينيا محابتهاش تتقهر و نككون انا السبب شافتني عرفت مابيا جات تقولي حبيبتي افرحي هدا اول فرحك و مزال العرس واليوم فاتحتك ازهاي عيشي فرحتك كيما كامل لبنات و حضنتنتني وداتني قعدتني في الصالون و و الهوسة هديك في الدار حتى لقيتها جابتلي خمار ابيض ووقفتنيورا الباب و قالتلي راهو جاء السيد باه يفتحلكم كنت مهبط راسي و منشوف والو غير نسمع في الرجال يهدرو تخربطو مشاعري في الحضة هديك معارفتو لا فرح و لا حزن فرح لانني راح نعيش في دار مع عايلة و مع ماما حبيبة و الحزن على ماما ححبيبة الي راح تتقهر لانه مستحيل الي تقبل بالشي هدا وصل السيد عند الباب وقالي ردد مورايا قولي وكلتك نفسي وليت بسيف نخرج في الحروف من فمي وماما حكامة في صباعي و تقلي اهدري حبيبتي الرجال يستناو في الموافقة تاعك بسيف عاودتها وراحو وولينا نسمعوو فيهم يفتحو كملو ولاو الرجال يباركو لسلطان رجعتني ماما لبلاصتي وسط الزغاريت و الفرحة شوية و قالونا يدخل العريس يلبس الذهب للعروسة سترو النساء رواحهم بالخمارات حتى لقينا سلطان دخل اول مرة ننتبه ليه كان طوييييل و الطول تاعو عاطيه هيبة لابس كوستيه مفصل تفاصل عليه وتولهت بلي سلطان صح شباب سمر وعينيه كبار وملامحو رجولية وماضية
سلطان مع دخلت لحت عيني شفت الطفلة كانت غيرة ومليحة بزاف المكمون تاع جماها برائتها كلشي فيها ظريف حتة في لاطاي تاعها تاع وحدة صغيرة معندها تى مفاتن تاع مرا وتكسر خاطري عليها نفسي مقدرتش تتقبلها مراة كي قعدت حداها حسيتها بنتي ماشي مرتي خاصة كي كمتلها يدها و انا نلبسلها في الخاتم حيت يدها صغيرة تاع بوبية هنا حسيت روحي مجرم في حق الطفلة هده الله يسامحك يا حبيبة هده منقدرش نشوفها مرتي مستحيل تولهت مع روحي غايس في افكاري
نوار لبسلي الحخاتم و ممبعد عاولي الخاتم نلبسهولو معرفتش واش من صبع ووليت نلبسلو فيه في صبعو تاع الوسط وزادتني التوتر ولا قلبي يخبط بقوة لدرجة انني وليت نسمعو وخايفة الناس يسمعوهولات تقولي ماما حبيبة لالا ماشي هداك الصبع الاخر و انا مت في قشوري و هوما يضحكو معايا على اساس اني صغيرة و منعرفش و صح هديك هي الحقيقة حتى بابا ولا مرة حكملتلو يدو ولا علابالي وين يلبسو الخاتم تحرجت حتى لقيتو هو طبق صباعو كامل و خلالي غير الصبع المناسب شفت معاه لقيتو يتبسملي باه يطمني بسيف فات الشوط تاع الخاتم و جاني الشوط الاصعب تاع يوكلني و نوكلو لاتارت الي جايبينها و فيها اسمي و اسمو انا مهبطة راسي لقيتو حكملي يدي من الخلعة وليت نجبد في يدي زير عليه باه فقت مع روحي بلي لازم نقسموها مع بعض قسمناها و هو مغرف صغيرة حايب يوكلني بسيف حليت فمي جيت نوكلو و يدي ترعش خفت غير نطيح الطرف تاع القاطو و يتوسخ كي شافني هكاك عاود كملي يدي باه نلقا الطريق لفمو واش الرجفة هده الي حاكمتني ملي شفتو
سلطان كرهت من الشكليات هدو الطفلة حسيتها خايفة زادو قالونا تشربها العصير انا هنا خرجت و انا متقلق في عمري ولا حسيت روحي نضحك و حبيبة الي حطتني في االموقف هدا خرجت و خليتهم واقفين كون نكمل هكا نحبس كلشي و نعل بوها من ابوة الي توصلني للتمسخير هدا حتى لقيت حبيبة تعيط ورايا قالتلي وين رايح و ندوور ليها بوجه حكل قلتلها التمسخيرة هده تحبس هنا جايبتلي وحدة معترف اليمين من اليسار و تقولي تزوجها هده انا متاكد 100/100 مفاهماش واش معاناها زواج يا حبيبة هده كون فرضا انا نتقبلها هي البوسةكون نبوسها تموت من الخلعة مرانيش صغير باه نظل نلعب في التمسخيرة هده قالتلي انا مدرتش هدو الحوايج على جالك انت انا حبيت هي تعيش كل اللحضات تاع خطوبتها و فرحتها تعيشها كيما اي طفلة في عمرها متكسرهاش يا سلطان الطفلة اليتيمة و من اليوم هدا ولات مسوولة منك متبخلش عليها بعطفك و حبك و حنانك متخليهاش تحس بلي انت مجبور عليها و مع الوقت راح توالفها و توالفك على وجهي يا سلطان مسحت وجهي و قلتلها راح نكمل فيها يا حبيبة بصح على وجه اليتيمة هده و نشوف الفكرة تاعك وين راح توصلني و ترسيني.......................................... يتبع