نوارة العميد سلطان

الحلقة 48

الحلقة 48

نوارة العميد سلطان
وار قلتلت لسلطان ماشي صوري انا فقط صور البنات تاني تاع الميتم في حفلة عيد ميلاد رشا المشكلة معلابالناش كيفاش حتى وصلو ليه ورشا مبعتتهمش قالي و الحل يا مدام نوار معناها الصور تاعك راهم عند راجل غريب شبع فيك شوفان و معلاباليش وقتاش نوض الصباح نلقا ليفةطو تاعك معمرين الفايسبوك .........استغفر الله ياربي قلتلو و الله ماشي انا ومعندي حتى علاقة كي سمعت دخلت في صدمة و ووليت غير نبكي و معرفتش كيفاش نتصرف قالي وعلاش مهدرتيليش كون راني تصرفت ولا انت المهم تخشني راسك والي في بالك تعمليهو مهامك حتى واحد قللو و الله و الله حبيبت نهدرلك بصح هو قالي حتى ولوكان حكمتوني و صراتلي حاجة كاين الي راح ينشرهم كون تصرالي حاجة و قالي اعطيني الدراهم و نمحيهم بشرط لازم واحد مايكون علابالو كون تهدري ننشرهم ووليت نبكي خاطر خفت على السمعة تاعي و تاعك قلت ادا المشكل تخلاص بخمس ملايين وواحد مراح يسمع نخلصها ونرتاح خير ملي نتبهدلو كامل قالي انت صح غبية وحيوانة انا واش تشوفي فيا قدامك انا راني عميد في لابوليس عندي 15 سنة و انا في هدا المجال كون تشوفي واش فات عليا من الاشكال هدو مجرمين و سفاحين ارهاب مغتصبين و سرارقة مخكك هدا كيفاش يخدم و ضربني على راسي هدا ماشي مخ هدا عقل دبانة تصوري انت خرجتي ليه قتلك و لا خطفكم و لا دارولكم كاش حاجة كان قادر يخطفكم و يطلب فدية و انت مراكيش براسك انت راهو كاين في كرشك روح اخرى مسوولة عليها و امانة عندك كيفاش تخممي انت ونسيتي انا معروف راح ترجعيني راسي منقدرش نهزو مابين الرجال قلتلو و الله من الخوف موليتش نخمم نورمال قالي اااااااه يا ربي وعلاش انت كاش نهار فكرتي نورمال شحال من مرة وانا نهدر و نعاود ارواحي قوليلي اي حاجة اعتبريني باباك خوك صديق اي حاجة المهم ارواحي قوليلي انا كبير عليك و راح نعرف نتصرف و نحكم عقلي خير منك قلتلو و الله اخر مرة و الله ربي يعيشك المرة هده فوتها و الله مانزيد نخبي عليك حاجة قالي واش تفيدني انا اخر مرة تاعك و ليفوطو تاعك معلاباليش عند من راهم ولا واش دايرين بيهم قلتلو ادا نعطيك الرقم تاعو تقدر تجيب عنوانو ومعلومات عليه قالي و الله انت صح غبية او باين درك حرق لابيس و لا غالق التليفون و مشكيتش شاري لابيس باسمو بصح معليش جيبي الرقم باه نحاول نعرف عليه معلومات قلتلو الرقم راهو في تليفوني وتليفوني معلاباليش وينو قالي مراكيش كاتبتو في ورقة قلتلو لالا قالي خاطر تليفونك راني كسرتو قلتلو نقول لرشا تعاود تمدهولي قالي اعطيني رقم رشا قلتلو دقيقة نروح للبيت نجيب رقم رشا جيت نفتح الباب محبش يتفتح ممبعد تفكرت بلي المفتاح في صدري ولا زعفان مني و غلبتو الضحكة قالي صح غبية وينو المفتاح قلتلو هنا دخلت يدي لصدري وليت نفتش عليه ملقيتوش قالي نحي لغوب و فتحي سوتيان تاعك تلقايه فتحت عينيا على الطول قلتلو لالا راني لقيتو وعلاش نعري روحي لقيتو داير للهيه و يضحك عليا غير كتافو يتحركو من الضحك وليت ننفض في رحي حتى طاح المفتاح فتحت الباب و هو قالي خفي راح تجلطيني بكمية الغباء الي عندك راكي مدية فيها ميدالية الدهبية وليت نجري رحت جبتلو الرقم عطيتهولو يعيط يعيط متهزش قلتلو معرفتش الرقم كتبلها ميساج قالها انا نوار هزي عليا وليت قربت ليه و حضنتو و قلتلو علابالك ضريتيني بزاف و زيد قريب طلقتيني و خفت تسمح فيا و انت وليتي حياتي كاملة سمعتو تنهد و بعدني عليه و قالي مزالني زعفان منك وراح نبقى زعفان حتى تتبدلي انت و تبدلي طريقة تفكيرك و تكبري عقلك حتى لقيت رشا تعيط كوبا عليها و عاودلها و حطلي التليفون في وذني
الو رشا عودي ابعتيلي الرقم تاع مرتضى واي حاجة تعرفيها عيه قالتلي درك نبعتلك الرقم نحالي التليفون من يدي وصل ميساج برقم تاع مرتضى عيط لواحد قالو درك نبعتلك رقم جيبلي المعلومات تاع مولاه عنوانو اسمو واش يخدم اي حاجة عليه جيبهالي و كوبا قلتلو ان شاء الله تحمو و تظهر الحقيقة قالي اخرجي درك عليا انا اصلا واش استفدت منك غير وجع الراس خرجت و انا قلقانة منو و نتمتم عليه ونقول مهبول يعرف غير اخرج عليا و غبية و حيوانة ووليت غير نعيب عليه و دخلت لبيتي وكملت نهدر و الله مانزيد نهدر معاه حتى تجي و تطلب السماح مني و الله نوريلك يا ولد فضيلة حتى سمعت صوت ورايا تاع ماما حبيبة و هي تقولي وامو مسكينة وعلاش تدخلي فيها بالموضوع و تضحك عليا قالتلي و كلمة الاعتذار انساي تسمعيها من عندو قلتلها وعلاش راهو غلط معايا و ضربني و محاولش حتى يعرف الحقيقة هو يعرف غير يضرب و يسبني وزدت حضنتو و هو معمر روحو ريحة بسيف تحملتو و هو شايف روحو عليا وهي غير تضحك عليا فات النهار هدا وعلى اساس هو رايح يبات في الخدمة كنا نتعشاو حتى لقيناه دخل علينا ووجهو يخوف و عينيه نار ولا يحوس عليا بيعينيه وكي جات عيني في عينو عرفت بلي كاينة موصيبة حطيت الفرشيطة من يدي و بلعت ريقي ووليت نرعش في بلاصتي عيط عليا و قالي اطلعي راني الفوق و طلع يجري في الدروج كمت في يد ماما حبيبة ووليت نبكي قلتلها و صوتي يرعش و الله ياماما مدرت والو قالتلي الحاجة امو واش بيه الايامات هدو نهار كامل و هو منارفي واش كاين يا نوار والله خايفة عليه تطلعلو لاطوسيون قالتلها ماما حبيبة ان شاء الله ميكون والو
يتبع