نوارة العميد سلطان

الحلقة 45

الحلقة 45

نوارة العميد سلطان
نوار قلت لرشا تشافي نهار كنت نحدر فيك منو شوفي الثقة تاعك واش راح تعمل فينا قالتلي و الله يا نوار حسسني بالثقة و الامان و انا يتيمة نحوس على الحنان و الامان قلتلتها انت صح حيوانة و حمارة وغبية كيفاش اصلا جابهم الصور كون ماشي انت الي رسلتيهم قالتلي و الله بعتلو غير تاعي كيفاش حتى نبعتلو تاع البنات الاخرين ااا ياربي واش المشكل هدا المصايب تحوس عليا بالريق الناشف نتهنى من ححاجة تخرجلي حاجة من تحت الارض قلتلها بلاك راهو يهدد فيك برك و هو معندوش قالتلي و الله حسب ماشرحلي و قالي كانه كان معانا حتى وصفلي واش لابسين يا نوار حكالي بالتفاصيل الدقيقة قلتلها اعطيني رقمو خلي نهددو بلاك يخاف و يبعد علينا وادا مفادش معاه الهدرة نهدر عليه لماما حبيبة و سلطان قالتلي لالا ربي يعيشك يا نوار قالي كون تخبري كاش واحد راح ننشر الصور تاعكم كامل و الفيديوهات قلتلها متكونيش جبانة و هو يستقوى عليك خليني نتصرف و نهدر معاه و الا راح نقول للسلطان و هو يهتم بالامر هدا قالتلي ربي يعيشك متهدريلهمش و الله يوليو يشوفوني منسواش و نطيح من عينيهم و قادر يقولولك متزيديش تتواصلي معايا نهائيا قلتلها انت صح بهلولة حابة تتفضحي و احنا كامل معاك و الله كون يسمع سلطان يقتلني و حتى البنات الي معانا كاين متزوجين و حضرو راح يتطلقو من وراك و من ورا مرتضي تاعك
عطاتني الرقم تاعو عيطتلو اول ماهز عليا قلتلو اسمع يا خويا انا علابالي بلي معندك لا صور ولا فيديوهات و علابالي انت راك تخوف في رشا برك واش حاسب معندها حتى واحد واقف في كتافها امالا اسمعني و حط في بالك بلي راجلي عميد في الشرطة وراح يديك مورا الشمس املا بعد على رشا سمعتي ولا لالا انا سكت و هو ولا يضحك بالصوت قالي شطورة و كنت حاسبك جبانة و خوافة بصح ضهرتي شجاعة املا اسمعي مني يا زينة لكان تهددي فيا راجل سلطان السباعي العميد هده مراحش يخدمك هدا راح يرجع الفضيحة اكبر وانا كنت حاير كيفاش نوصلك و جيتي ليا وحدك وادا كدبتي ااني معنديش الصور و الفيديوهات درك نبعتهملك وانا من الخوف وليت نبلع في ريقي قلتلو وانت درك واش تحتاج مني و من رشا ووعلاش تهدد فيها قالي كنت حابة نتلاقاها برك بصح درك محتاجك انت ومحتاج نشوفك قلتلو واش تحتاج مني وعلاش تحوس تشوفني نجوم السما اقربلك مني قالي اقسم بالله راح ننشر الصور و كون تهدري لسلطان ولا مرتو ولا اي واحد و الله مانحرمكم لا انت لا رشا ولوكان تصرالي حاجة راح ينشرهم غيري و راني حدرتك و قد اعذر من اندر وليت نبكي قلتلو حرام عليك انت معندكش خواتاتك معندكش امك وتخاف عليهم ربي يعيشك متفسدليش حياتي و الله مانقصني مشاكل و انت واش حايب منا قالي شوفي نوعدك ادا جيتي ولا ماتقولي لاي واحد راح نعطيك الصور كامل و نمحي كلشي م عندي ولا من شاف ولا من دري قلتلو واش تحتاج مني كي تشوفني قالي محتاج تعطيني دراهم نحتاج خمس ملايين تجيبيهملي قلتلو نخليهملك في كاش بلاصة ماشي لازم انا الي نجيبهملك قالي انا هدرت هدرة و منعاودهاش تجيبيهملي لقدام الفارماسي الي في العنوان ....................... وغدوة انت حددي الوقت وكون متجيبيهمش و الله ننشر الصور و الفيديوهات وكون تجيبي كاش واحد معاك ولا انا تصرالي حاجة او علابالك واش يصير ومتحسبيش نهدد برك راح نفد و اكثر من هكا حتى المونتاج نخدملك بيه فيديوهات و نحطهم في مواقع اباحية وانت فكري مليح هيا باي باي يا زين و كوبا عليا و انا وليت نبكي بالصوت ممبعد عيطت لرشا و قلتلها واش هدرلي الرخيس تاع مرتضى قالتلي مستحيل نخليك تغامري بحياتك بسبتي كوبات عليا وولات تعيطلو هو محبش يهز عليها و ممبعد عاودتلي وهي تاني نبكي و مقهورة خاطر كانت متعلقة بيه بزاف و تحبو و خدعها و وورطني انا تاني معاها ولينا انا و هي نحوسو على حل للمشكلة هده كي ملقيناش حل قلتلها لازم نهدر لسلطان هو الي يقدر يعاونا
قالتلي لالا يا نوار متروحيش انا نروح وحدي انت متزوجة و بالحمل و راجل معروف نخاف يسمع هدرة هكا ولا هكا راح نسببلك مشكل هذا مرتضي ميخافش ربي قلتلها و الحل يا رشا منقدرش نخليك تروحي وحدك قلتلي خلي غدوة نروح و نتفاهم معاه ونحللو و نداريه بلاك يحن قلبو و يحبس علينا ممن التهديد هدا ولوكان نبوسلو رجليه قلتلها انت مهبولة كيفاش تروحي وحدك هدا كلب وعلابالي واش ناوي بقينا نهدرو حتى قنتها باه نروح معاها و اقل خطر نعيطو لسلطان بقا غير مشكل واحد كيفاش راح نخرج من الدار و هي كيفاش تخرج من الميتم و غدوة اصلا الدار معمرة خاطر خطوبت مهند وحنين قلتلها نعيطلو و نقولو اجلها قالتلي جربي عيطتلو قلتلو غدوة مستحيل قالي كون متجيش غدوة ننشر الفيديوهات و قعد يتحلف و يحلف قلتلو خلاص غدوة غدوة وراح نرجعلك الخبر على الساعة شحال و كوبيت عليه قلت غدوة كي تبدا الخطبة كامل راح يتشغلو و انا نديرلهم كاش عفسة نخرج ربع ساعة و نرجع بلا مايفيقو بيا و رشا قلتلها راح نهدر مع ماما حبيبة تجيبك معاها باه تحظري الحفلة و هكا راح نخرجو في زوج من هنا مع بعضانا تفاهنا كوبيت معاها و انا في حالة تاع قلق ربي الي عالم بيها .............................. يتبع