نوارة العميد سلطان

الحلقة 59

الحلقة 59

نوارة العميد سلطان
نوار رحت لبيتي نبكي و بسيف نمشي كي طحت وجعتني ظهري قعدت غير نبكي و معرفتش واش درتلو حتى ضربني غطيت روحي ووليت محضنة المخدة و نبكي حتى بعد مدة لقيت ماما حبيبة دلت لقاتني نبكي قالتلي واش ياعمري وسلطان معلابالكش وين راح وليت نهدر معاها و انا نبكي قلتلها و الله ماعلابالي قالتلي وعلاش تبكي حكيتلها و قلتلها و الله مادرتلو والو يا ماما قالتي واش بيه اليوم هبل كيفاش يضربك مخافش عليك وعلى بنتو بلاك حاجة مقلقتو والله ماعلاباي واش بيه خلي ممبعد يجي ونهدر معاه قلتلها ماتهدري معاه لا والو خليك منو كرهت منو وقت مايحب يضربني ووقت مايحب يولي حبيب و يدللني يطلعني للسابع سما ووممبعد يخبطني لسابع ارض قالي ماعليش حبيبتي ساعفي و بلاك عندو مشكل وعذر غير ربي الي عالم بيه وراحت وخلاتني هي و حسيتها حايرة فيه رقدت حليت عيينيا على صوتو و هو يدندن و فرحان ويعدل في روحو قدام المرايا شافني تقعدت حتى لقيتو هز الفرد في زوج تاع سباطو و طيشهم عليا و قالي امسحيهم نلقاهم يلمعو خير من وجهك جاني سباط في وجهي و الاخر في كرشي وليت عيطت عليه قلتلو واااااااااش بيك هبلتي واش درتلك انا هز القرعة تاع الريحة و ضربني بيها و ناض يعيط عليا قالي نزيد نسمع صوتك نقتلك بلعي فمك من الوجعة تاع القرعة تاع الريحة الي جاتني في صدري حتى طحت في الارض و ضاق فيا النفس دلت ماما حبيبة و قالتلو واش بيك معاها واش دارتلك الطفلة قالها انت تاني بلعي فمك عليا ولا السباط الي ضربتو بيها نردهولك قالتلو واش بيك سلطان وعلاش تهدر معايا هكا واش درتلك انا واقيلا هبلتي راح ليها جبدها من شعرها ولاحها فوق السرير و وولا يخنق فيها قالها كون من اليوم تدافعي علي الحيوانة الكلبة هده نذبحك انت و هي تفوووووووه عليكم في زوج وخرج و خلانا كل وحدة منا حالتها تشكي لربي ولات مام حبيبة حاكمة راسها و مخلوعة فيه وانا وليت نبكي بالصوت و نندب في وجهي ورحت ليها حطيت راسي على كتفها و نبكي ولات حضنتي وتقولي يابنتي واش درتيلو قلتلها يا ماما والله و الله مادرتلو حاجة و الله ياماما قالتلي دقيقة درك نجي وناضت راحت لبيتها باه تهدر معاه لقاتو فاتح الخزنة تاعو تاع الدراهم ويجبد في الدراهم بزاف جات تهدر معاها هز يدو تاع حبسي خرج و خلاها واقفة و مخلوعة فيه رجعت عندي حضنتنتي
و قعدت معايا حتى رقدت نضت وقت المغرب صليت و هبطت معاهم بقينا نحكيو وجاء مهند وهو يتغل بحنين و هوما كي طيور الحب وقالها اليوم متطيبوش العشا عشاكم من برا وعلى حسابي خرج جابلنا العشاء و صدرنا الطابلة و قعدنا راح نتعشاو حتى لقينا سلطان دخل علينا بصح مكانش وحدو جاب معاه سناء وهي لابسة الابيض كوستيم و صابغة وجها بالمكيباج تخلعنا كامل و انا بقيت مخلوعة و عقلي فيه الف سؤال يدور وفي يدو فاليزة دورت لماما حبيبة قلتلها ماما واش راهو يصير هدرتهالها وصوتي يرجف من الخوف وقلبي ولا يوجع ردت عليا ماما و هزتلي كتافها بلي معلابالهاش ولات الحاجة تضرب في رجليها و تقولها حبيبتي سناء واش صاير لاختي يخي ماشي مريضة و تهدر هي تاني بخوف حنين قالت للحاجة مشكيتش كاينة حاجة ماشي مليحة شوفيها من وجها تضحك و لبستها حتى لقينا سناء قالت لخالتها ياخالتي مكان والو ماشي مليح وعلاش تفاولي على ماما قالتلها الحاجة املا واش صاير فهمني قالها سلطان الحاجة متعبيش اعصابك تعود تطلعلك لاطونسيونانا راني تزوجت بسناء ومنا ورايح راح تكون هي مولات الدار و هزلها يدها يشوف معاها باسهالها وكمل يقول راح تكون ملكة الدار و قلبي وهي تضحك و فرحاااانة انا مع سمعت الهدرة هده وليت نندب بالصوت و ماما حبيبة تخبط في صدرها و تقول هدا الي كنت خايفة منو يانوار قلتلك كون يتزوج بيها نعشيو في الطريق نتلاطمو والي خفت منو صار كيفاش ياسلطان عملتيها راك غالط في الموضوع لازم تكون كاينة غلطة سناء كانت اخر همك فهمني كيفاش حتى وفجاة تقولنا تزوجها و بدون سابق اندار وانا كنت مزالني تحت تاثير الصدمة مقدرش عقلي يستوعب الموضوع وفي هدرة سلطان نسمع غير في اما حبيبة و هي تعيط عليه و تبكي قالها اششششششششت منحتاج نسمع حتى كلمة زايدة من عندك كون تهدري اسبي روحك ميتة و اتقي شري قالتلو امو فهمنا ياولدي واش راهو صاير هدا كامل وقتاش خطبتيها ووقتاش تزوجتي بيها انت كنتي خدام ودرك تدخل علينا و انت متزوج قالتلها سناء واش بيك يا خالتي واش الهدرة هده نورمالمون تباركيلي وليتي تلومي فيه خاطر تزوج بيا قالتلها الحاجة نقول مبروك كي نعرف كيفاش وعلاش ووقتاش تفاهمتو و تزوجتيو بلا علمي وبلا رضايتي قالها سلطان مليت من النساء الي عندي و لقيتهم ميشرفوش وجه فقر وماشي من مستاوايا و سناء هي الوحيدة الي تناسبني و تحبني وانا نحبها
قالو منهد يا خويا اهدر حاجة معقولة كيفاش تقول نساويني ميسواوش حبيبة شريكة حياتك مثقلش بالدهب و مرتك الثانية بالحمل و صغيرة وبنت فاميا و يتيمة و علاش تكسر بيهم كيما هكا قال اسمعوني كامل منحتاج حتى واحد يتدخل في حياتي وانا كبير وندير واش نحب و سناء مرتي على سنة الله و رسوله و هده الدار دارها و الي يهدر معاها و لا يقلها ولا واحد يمسها و لوكان بكلمة و لو حتى يتخنزر معاها نحسبو تجاوز عليا شخصيا و مصيرو الشارع والهدرة هده ليكم كامل من كبيركم لصغيركم ............................. يتبع