نوارة العميد سلطان

الحلقة 28

الحلقة 28

نوارة العميد سلطان
نوار وليت بالصوت قلتلو املا وعلاش درتي حالة و قلبتي عليا لدار خزر معايا و قالي واش رايك تكمليها و تعطيني كف ماشي خير ووقف وجاء عندي ولاو رجليا يضربو في بعض وهبطت عينيا قلتلو اسمحلي و الله غلطت والله ماقصدي نعلي صوتي عليك بصح انت فوق مرراني مظلومة بهدلتيني شفت مع يدو مزيرها تاع راح يضربني ممبعد قال استغفر الله قالي نوار لازم تديري حسب الانسان الي واقف قدامك ماشي غير انا اي واحد تديري لازم اعتبار للناس الاكبر منك والمرة هده سامحتك و تحكمت في روحي المرة الجاية قادر تخلصيها غاليا هزيتلو راسي بمعنى ايه قالي طلعلي راسك وعلاش خايفة مني قلتلو خاطر انت تخوف تبسم و قالي انا نخوف املا قلتلو ايه كي تزعف نخاف منك قالي حابة تعرفي شكون الي يخوف جرني من يدي للكوافاز ووقف ورايا وهزلي راسي بيدو و قالي شوفي شكون الي يخوف انا و لا انت شفت مع روحي لقيت روحي نخوف الماسكارا معمرة وجهي القلم الاسود من حاجي هابط حتى لخدي بالطول وليت كي الباندا قالي شفتي راكي تخوفي هههههههههههههههههه غطيت وجهي و خرجت نجري من البيت ولا يضحك عليا غسلت وجهي وهبطت لميت الكوزينة و لقيت اختي ايه تم غسلت معايا الماعن و قالتلي ربي يكون معاك راجلك باين واعر و الله خوفني تبسمت معاها و قلتلها غير هكا برك اليوم زعف هو ناس ملاح بزاف و راهو قبل تعيشو هنا معنا و اي حاجة تحتاجوها راني هنا هكا كملت وطلعت لقيتو راقد ومطفي الضو غير الضو تاع الفايوزة وقفت عند راسو و نشوف معاه و مع تفاصيل وجهو تبسم و هو مغمض عينيه قالي راح تباتي هكا ليلة كاملة قلتلو كيفاش عرفتي راني هنا وانت مغمض عينيك قالي منحتاجش عينيا باه نعرف بلي راكي عند راسي رحت بدلت قشي لبست بيجاما بالسروال هده هي ولات عادتي باه منونضش و نلقا روحي عريانة الصباح حكمت بلاصتي لعبت شوية بالتليفون و رقدت مرت الايام و سلطان تبدل معايا بزاف مولاش بارد كيما قبل ولا نهار طول ملي يجي من الخدمة و هو مدابيه نضل معاه في البيت كل مانقول نهبط يقولي لال اقعدي هنا خلينا من المشاكل تاع حنين كي نتقولو قلقت يقولي ارواحي يقربني ليه و يحطي فيديوهات تاع الضحك و لا يحط فيلم في لابتوب و يقولي تفرجي معايا ولا مركز بزاف في لبستي هه ضيقة هده قصيرة حتى لييرفات قالي ممنوع تهبطي بيهم قدام مهند وانا غير نساير فيه واغلب الوقت كي نكون ندور قدامو و لا نخدم في خدمة يقابلني و بقا غايس فيا كان زمان كي نلقاه يشوف معايا يدور راسو درك مولاش يدور راسي يبقا مركز معايا و عيني في عينو ولا جريئ اكثر حتى في لمساتو ليا ميضع حتى فرصة وانا وليت نتهرب منو خوفوني عينيه اية اختي ولات هي و حنين صحابات الروح لروح وحنين رجعت تخدم في الدار بعد ما طلبت السماح من سلطان حتى مهند قالنا تسامحو انا سلمت عليها و قلتلها سامحيني قالتلي كامل مممكن تخدعيهم بالبرائة تاعك انا متفوتيهاش عليا قلتلها قالها منهد بسيف عليك تسلمي عليها و تطلبي منها السماح جات تسلم عليا قلتلها انا سلمت ليك خاطر انا حبيبت ماشي واحد سيف عليا وشوفي انا مانحبك مانكرهك حبسي من المشاكل معايا و اتقي شري سكتها منهد و بهدلها وولات نقصت من الهداير تاعها و الشرات تاع كل يوم وولت ايه تعاون حنين في الدار اما ايمان عاقلة و ناس ملاح خلاص حبيتها اكثر من اية و عم الهدوء فاتو 22 يوم و اليوم راح ترجع ماما حبيبة من العمرة وانا وليتت طايرة بالفرحة توحشتها بززاف زيت الدار بالبلونات و الديكورات تاع الحفلات راح سلطان يستقبلها في المطار وجابها و جاء تلقيناها مع الباب دبحوها خروف عند رجليها دخلت جريت حضنتها و نبكي وحشتها موت قلتلهاا توحشتك يا ماما و الله الدار بلا بيك ظلمة متزيديش تبعدي عليا ولا تضحك و تقولي المرة الجاية نروحو انا و انت و سلطان قلتلها ان شاء الله وزادت حنين حضنتها و تبكي رحت جبتلهم يشربو عيطلي سلطان قالي مشفتيه البورتفاي تاعي ساعة و انا نحوس عليه باه نخلص مول لكبش و الدباح ملقيتوش قلتلو كان الصباح فوق لاكوافاز في بيت ماما حبيبة كي بدلتي كان تم قالي ازربي اطلعي جيبيه طلعت قلبت البيت تقلاب ملقيتوش
فص ملح و داب هبطت قلتلو ملقيتوش و الله قلب البيت قالي سقسي الحاجة وحنين سقسيتهم في زوج قالولي مشفناهش رجع عندو لقيتو هابط قالي جبدتلو من الدراهم الي في الخزانة نخلصهم و ممبعد حوسو عليه خرج و رجع قلنا درك نحتاجكم تقلبو الدنيا عليه تجيبوه من السماء ولا من الارض و يعيط علينا ولينا نتجاراو قالتلو امو وفيه الدراهم قالها فيه بزاف و المشكل فيه كواغطي كامل تاع المينيتار و كلشي تاعي طلعت انا و حنين للبيوت كامل فتشناهم في كل بلاصة والو وكانها نشقت الارض و بلعتو بقات غير بيتي قلت نعاود نشوف هزيت اريو قلت بلاك طاح وراه وشفت من التقة تاعي تطل على القاراج شفت ايه اختي تجري وتتلفت من ومن وطيشت حاجة في سيارة سلطان ورجعت تجري برمت حواجبي هنا مباشرة شكيت فيها قلت بنت رحمة واش راح تكون قديسة هبطت نجري ليقتها في الكوزينة وعاملة روحها تحوس خرجت من الباب تاع الكوزينة للقراج طليت من التقة تاع السيارة شفت البورتفاي مطيش تم تصدمت من العملة تاعها هزيت البورتفاي من السيارة و فتحتو لقيت فيه كوارج سلطان كامل بصح الدراهم مكانش خبيتو في صدري جيت ندور لقيتها كانت تطل عليا هربت دخلت وراها شفتها عاملة روحها تحوس عليها وانا درت روحي نورمال باه واحد مايشك ول يحس خليتها حتى ولات وحدها جبدتها من يدها و دخلتها للدوش وجها تخطف وولا صفرا وتبلع في ريقها من الخلعة هزيت يدي و نعطيها كف دورتلها وجها قلتلها وعلاش ياحيوانة صح انت ظهرتي بنت رحمة الكلبة مستحيل الزبل ينبت فيه الورد وانت عضيتي اليد الي تمدتلك وكلناك لبسناك مخليناكمش في الشارع كي الكلاب بزقتلها في وجها قلتلها بصح النكار طول عمرو يبقى نكار يالاوجه الفقر قالتي وعلاش واش درت انا قلتلها خيرتلك اسكتي كلمة منزيدش نسمعها اجبدي الدراهم ولا درك نعيطلهم و نقولهم هاهي السراقة قالي لال ربي يعيشك متفضحينيش وجبدتهم من صدرها و عطاتهملي قلتلها بهدلتي بيا ومتلعبيهاش خفتي خاطر كون جيتي تخافي متعمليش عملتك جبدت البورتفاي رجعت الدراهم فيه و رجعتو لصدري قالتلي نوار ربي يعيشك متقوليش لسلطان و الله يوليو كامل يشوفو معايا على انني سراقة جبدت يدي منها قلتلها احمدي ربي جيتي اختي خاطر كون نهدر راكي محسوبة عليا و راح انت يقولولك السراقة و انا يقولولي اختك السراقة خرجت و خليتها لحقتني وليت حابة نلقا بلاصة نحط فيه البورتفاي لقيتو برحي في الدخان يكمل قارو يشعل واحد موراه وماما حبيبة مسكين مارتاحت لاوالو وتحاول تلطف الجو لان سلطان وجهو ولا يخوف قالتلنا الحجة حطو الغدا نتغداو ومبعد نكملو نحوسو انا رحت للكوزينة وقفت مع حنين و هي قالتلي واش هدا الي في صدرك قالتلي ماشي هدا البورتفاي تاع سلطان قلتلها ولاش حاسبني سراقة و بدات تعيط جاء سلطان و ماما حبيبة قالونا واش كاين قالتلهم حنين والو بصح احنا جامي تسرقت حاجة في الدر ن نهار جاو البرانية تسرقنا تحاكمنا انا و هي بالهدرة حتى جاء ولا سلطان يعيط علينا بهدلنا في زوج سكتنا و كملنا سربينالاالغدا وتلمو كامل في الصالون نتغداو حتى لقيت ايه نطقت قالتي واش هدا الي في صدرك كامل قعدو يشوفو معاي وجهي ول صفر كي الحبة تاع القارص وخفت اول مرة خفت بالشكل هدا قلتلها مكان والو في صدري واش راكي تهدري عرفتها حابة تدور الحكاية عليا و تحصلها فيا ندمت على الي خبيت عليها قالت ماشي البرتفاي هدو جاي جلد و لونو مارون قالها سلطان ايه ناضت تجري وبون مقدمات لاحت يدها في صدري وانا حكمتلها يدها ونحاتلي يدي و جبدت البورتفاي انا قلبي قريب حبس كامل ولو يشوفو معايا ومخلوعين في نظرهم وليت سراقة هدا كامل من تحت راس اختي الي لميتها من الشارع .................................. يتبع