"أثر الهناء حلم يا حمد"

البارت الثاني

حصه بالمطبخ  بعد ما ارسلت ساره وهي تغسل الفواكه:على خفة حملي الا اني احس بتعب في ظهري! مب طبيعي!!
زينه:اظنتس بتولدين ماعادتس بعيد انتبهي لروحتس وروحي اجلسي خلاص
دلال: يوه يا حصه الله يعينك صدق والله ان ودي تولدين وترتاحين من هالبطن والتعب من بعد فارس وانا اخاف من الحمل خوف إن شاء الله ذا اخر حمل لي
حصه: استغفري استغفري لا يستجيبها الله ثم تالي تبتسين هنا
زينه: اي والله اسكتي وش اخر حمل وش تبينهم يقولون عنتس؟ ماعندها الا ثلاث ويلحقتس كلام في صحتس
دلال: هو!! شعليهم!!!وانتم بعد اقول يلا يلا عطوني احضر السفره
زينه: الظهر حر برا افرشي السفره في المقلط وانا بصوت على خالتي تدخل
-نجي نتكلم عن المقلط هذا المقلط كان بالدور الثاني وما كان فيه الا دريشه بالواجهه تطل على الديرة كلها والدريشه كبيره وتتقفل ببابين صغار خشبيه وكان مقلط أكل بالنهار وبالليل محل نوم العيال كلهم-
سيف او خلونا نسميه ابو متعب: يا ام متعب
زينه: سم سم
ابو متعب: يلا الغداء زاهب
زينه: اي اي يلا حتى خالتي تحتريكم فوق وابو فارس جاء بعد
دلال:الله يخلف عليك يا اخوي ويكرمك الجنه ياكريم ليش تكلفت
ابو متعب: حق حق ياحبيبة اخوها والله يديم الافراح واللمه الحلوه علينا -طلع الدرج اللي كان مفروش فرش أحمر-
فلاح نزل لهم المطبخ:ماما بابا يقول عطونا الشطه
حصه:تلاقيها بالثلاجه روح جبها ووخر مني يلا
زينه: هو ام فلاح وراتس تهاوشين الولد مب زين لشخصيته وتراه كبير عيب عليتس
دلال:تعبانه؟ماهيب عادتك تهاوشين عيالك
حصه:والله مدري بس ظهري يوجعني بالحيل لكن بسيطه شكلي تنرفزت شوي
-بعد الغداء الرجال راحو يقيلون والأولاد بعد إلا حمد اللي كان عمره اربع سنوات ومنسدح تحت التلفزيون بالضبط وحاط رجل فوق رجل ويدينه تحت راسه ويناظر كرتون كابتن ماجد ويتحمس مع الهجمات وأمه جالسه تحني شعور البنات ساره ومزون وهيا ومتعب نايم على فخذ أمه والجده منيره نايمه بغرفتها اللي كانت قريب من الصاله وفاتحه الباب أما فارس فكان مقيل مع خاله سيف وحاط وجهه قدام بطن خاله ولام نفسه مره لدرجة أنه صار كأنه كوره وحصه اللي كانت تجاهد نفسها في أخر لحظات حملها ودلال تتقهوى وتسولف مع زينه-
بعد ما خلص الكرتون التفت حمد وانسدح على بطنه ويدينه على خدوده وهو يناظر عمته حصه:ليس تصيحين؟عدبه تدربس؟
حصه:يوووه يا زينه... ما اتحمل ما اتحمممل
دلال التفت على حصه وهي معرقه ووجهها يلمع :حصه يمه شفيك بسم الله عليك!!! صبر صبر اصحي أمي شكلك تولدين
حصه: ابي المستشفففى تكفون لالالاااااااا
حمد قام ينطط بفرحة عظيمة: ددداااتتتت عدبه دداااات دااات افتحي مطنس اسوفهاااا
-زينه طلعت ساره ومزون وهيا ومتعب صحته وطلعته وطلعو وهم خايفين وحمد ياللله طلع وبالقوة بعد كان متحمس لعذبه مره وكأنه يدري أنها بتكون حبيبة روحه وقلبه -
دلال:يمه يمه؟
الجده منيره بعدت شيلتها من وجهها والتفت: دلال؟يمه شبلاتس مختبصه وش هالوجه؟؟؟
دلال:يمه حصه تطلق شنسوي؟؟
-الجده منيره فزت وهي لابسه قميص اكمامه قصيره للعضد كذا وكان يعتبر من ضمن العرا سابقًا أو لبس نوم يعني ولكن مافيه وقت تبدل-
الجده منيره: الحمدلله بسيطه بسيطه عطيني مويه يا دلال وهاك المناشف ونادي لي زينه هي تعرف كل اللي ابيه يلا يلا
حصه:تككفييين يا خالتي احس بها احسسسس بتطلع اااااهههه يا ظهههررررييييي
زينه: حصه حصه ناظريني لا يغمى عليتس ناظريني نبيتس صاحيه عشان تولدين وترى خالتي ولدتني على عيالي كلهم معليتس
الجده منيره: زينه افتحي رجلينها اوسع وخلاص ياحصه !! علامتس تراتس مب بكر! الوضع هين وانا امتس اذكري الله
حصه كان خوفها من الولاده في بيت شعبي وبدون دكاترة:ييممممممااااااااااهههههههههه لالالالالالا-ولابعد هالصرخة الا فرحة غمرت البيت كله وكان قدوم عذبه على الدنيا مختلف مختلف مختلف جداً وكأنها أول بنت في العايلة أو كأنها نجمة طاحت من السماء-
حمد أول ما سمع بكاء عذبه ركض لعمه وأبوه وهو يدف أبوه ويقول: بابا داااات عدبه دااات دات
فايز فز: وش تقووول يا ولد؟؟
ابو متعب التفت وكان فارس في حضنه وقام يشيله على كتفه وينزل: شصاير شفيكم؟؟؟
فايز يدق باب الصاله: يمممه شصاير؟؟؟ دلال شفيه؟
دلال وهي ماسكه البنات ولا زال منظر ولادة حصه في بالها رغم انها أم لطفلين لكن اول مره تشهد ولادة طبيعية بحياتها:حصه ولدت ...
فايز: هنااا؟؟؟؟؟؟ليش محد صحاني فيكم؟؟؟
حمد اللي كان بعالم ثاني وبيطير والدنيا مو شايلته وكل اللي يقوله (داات عدبه داات عدبه)
ساره ومزون وهيا ما كانو فاهمين الوضع لكن عرفو ان عمتهم حصه تعبانه وشعورهم فيها حناء للحين
طلعت الجدة منيره وعذبه بين يدينها وعيونها مغورقة دموع:سميتها عذبه يا فايز وانشهد انها عذبه روح ووجه ما صاحت الا بنعومه عشان تعلمنا انها حيه ابروشها يا امك واجيبها لك وحصه طيبه لكن مغشي عليها من الروعه ههههههههه
فايز: يمه!! انا مو فاهم شيء وش هالولادة السريعة وحصه شلونها ومتى ولدت!!
الجده منيرة: قلت لك هالبنت نسمة ويسرة وسهله
زينه طلعت ومعها الاغراض : مبروك يا ابو فلاح مبروك هالبنوته الحلوه الله يجعلها من البارين والصالحين يارب
سيف:مبروك مبروكك الله ينبتها نباتاً حسن مبروك ياخوك
فايز بفرحه غريبه غمرته:الله يبارك فيكم ويخليكم عطوني بشوفها
سيف: شوف مرتك بالاول
زينه: اي والله ودي توديها المستشفى يشيكون من باب النظافه بس ولاخالتي ما بعد شغلها شيء هههه الله يخليها يارب
فايز دخل على حصه وهي تعبانه ومغمى عليها وصحّاها:قومي يا حصه قومي جاتنا بنت تاخذ العقل ماشفت زينها بأحد قومي يا ام عذبه
حصه تتلفت بتعب:عطني اياها عطني بضمها
فايز:راحت امي تروشها وبتجيبـ...هذا هي دخلت هلا هلا يا ابوتس
الجده منيره: مبروك ما جاء لتس يا حصيص قومي يا امتس قومي شوفيها تهبل
-زينه دخلت المطبخ تسوي عصيدة تمر على طول لحصه أما دلال فكانت تجهز عصرية أمها والجيران -
زينه:هذا هي العصيدة جهزت بزين حوايج لحصه بعد
دلال: وانا خلصت الجلسة وقهوة امي وجاراتها أجل خلصي شغلتك وانا بروش البنات من الحناء
زينه: حطي لهم زيت لاتنسين عشان يجي العرس وشعورهم تهبل
دلال بحنية: يوووووههه متى نحني شعر عذبه!! ياروحي بس
زينه: وراتس عجله والبنت مابعد فتحت عينها حتى ههههههه
-راحت حصه وفايز للمستشفى ومعهم عذبه عشان يسجلون ولادتها ويتطمنون عليها ويسوون تنظيف لحصه وبهالاثناء كانو دلال وزينه في البيت ينتظرون حريم الديره اللي مستحيل يدخلون أيّ بيت وأياديهم خاليه وبما إن الجو كان بنهاية الصيف يعني الاجواء فيها براد وحلوه لجلسة العصر-
زينه: اقول خالتي شرايتس تلبسين هذا؟هوو وراتس مفضخه!!
الجده منيره تتلمس يدينها بخجل:عاد صحتني دلال وارتعت يوم قالت حصه تطلق ما وعيت بلبسي وخزياااااه شافوني عيالي كذا!!
زينه:الله يهداتس يا خالتي ان شاء الله محد كان مركز بس ولو انتس امهم لكن معليه معليه يلا هذاني بخرت لبستس وبرقعتس والقهوه زاهبه وكيكة حصه جهزت الله يسعدها زين سوتها قبل تولد هههه يلا يلا كلنا نحتريتس يبي يجون الحريم هالحين
الجده منيره: رزقني الله ببنتين مع دلال اي والله الله يخليتس يا زينه يلا يلا ابلبس واجيكم وترى حمد يصيح بالحوش كان يبي يروح مع عمه المستشفى ورديته اخذيه هالحين تلاقينه ميت صياح
زينه:ياحبيبي يا حمد -طلعت زينه للحوش وهي تفتح الباب تتلفت وتنادي حمد لكن قابلتها هيا-
هيا:عمه
زينه:هلا امي وش بغيتي؟جوعانه؟
هيا: وين احتي ماسفتها
متعب:اختس بعييييييييييد راحو كلهم
زينه: بس يا متعب لاتصيح البنت-نزلت لهيا وحضنتها-امتس جابت لتس اخت اخيراً تهبل ياحلوها
قاطعتها هيا:بس انا عندي احتين ياعمه ساره ومدون احواتي
متعب: وانا اخوتس بعد
هيا:لا انت انقلع
متعب:يمه مو صح انا اخوها؟
زينه: الا دامك ولد عمها يعني اخوها
هيا: يا عمه ما احب متعب يهاوسني ويمعط سعري
زينه:متعب لعد تجيس بنت عمك هاوشتك انا...ماشفتو حمد؟
هيا:وين ماما طيب؟
زينه:ياربي يا هيا امتس في المستشفى بيشوفون عند عذبه سخونه ولالا وبيجون بس دورو لي حمد
طارق كان جالس بطرف الحوش:حمد يصيح بالسطح يبي عذبه اختي بس جده هاوشته وطلع زعلان
زينه: ياقلبي عليك يا حمد وش هالتعلق والبنت مافتحت عينها -طلعت السطح ولقت حمد مدنق راسه بين رجوله-
زينه:حميد ! حمد!
حمد:نبيه
زينه:يمه ياحلو هالبيه من ثمك ، طالعني يا بوي بشوف وجهك
حمد: دات عدبه؟
زينه: بتجي هالحين بس ناظرني
حمد: مابسوفس لين تدي عدبه وللححححددد يتتلمنننييييي-رجع يصيح-
زينه كاتمه ضحكتها: هالحين زعلان وقاعد بالسطح لحالك عشان عذبه في المستشفى؟
حمد: ايوه-سمع صوت سياره وفز على جدار السطح يناظر الشارع-ددددااااااتتتتتتت
زينه: سم ياحمد لاترككض من الدرج ..يوه استودعتك الله
-دلال بالحمام تروش ساره ومزون اللي ما كان عليهم الا فنايل داخليه بيضاء وسراويل-
ساره:عييووووونننني عيوني
مزون:لاتهاوسين اممي
ساره:عيوني فيها سامبووو عمه !!!
دلال:ياربي اسكتو مدري الاقيها منكم ولا من هيا اللي انحاشت الله حسيبك يا متعب انت وهالتهريب تقل ساجنتها عندي!!يا متتتعععععبببببببب
-متعب اللي دخل البيت وسمع عمته تنادي من الدور الثاني ورفع راسه يناظر الدرج اللي فوق وشاف عمته دلال رافعه قميصها لنص الساق ونصه مبلل ونصه ناشف ومعصبه ويدينها فيها شامبو قال متعب بكل براءة وخوف-
متعب:مدري وين هيا انحاشت
دلال:من اللي اخذها مني مب انت!!! ردها بسرعه بيجون ضيوف امي والبنت شعرها محنا وبتحوس الدنيا اخلصصص جبها
-متعب ركض الحوش وهو يسحب هيا من رجلينها وهيا تصيح ماتبي تتروش الحين تبي تلعب وجابها بعد شق الانفس-
هيا:ابي امي تروسني ما ابيت انتي
دلال: مهب على كيفك وين امك وانتي وين امشي ادخلي
متعب:روسيني انا
دلال رمته بالنعال بس بخفه:انت اذلف مع ابوك بيروح العزبه روح معه بسرعه
متعب: ما ابي البل ابي هيا
دلال:ووشووو؟؟؟؟
متعب بتأفف وهو ينفض يدينه:خلاص خلاص بروح
-وبعد منازعات وهواش بين دلال والبنات روشتهم وحطت لهم الزيت ولبستهم وانطلقو يلعبون في نص الحاره مع عذاري وتركي ومنصور وفوز اللي كانو عيال الجيران المفضلين وأمّا عن جلسة الحريم فكانت جيتهم خفيفة على الروح وممتعه وبسيطة وبدأتها الجدة منيره بما إنها شاعره ورحبت بضيوفها بطريقتها وقالت-
الجده منيره عند الباب وعليها برقعها وطرحتها على راسها والورده فوق اذنها ولابسه جلابيتها الحلوه تستقبل فيها ضيوفها وتقول بلحن عذب:
يامرحبا ترحيبة الصبح للشمّس
حزة عناق الليل مع طلعة النور
في لحظة كل المعاني غدت همس
والقلب غارق في بحر أنس وسرور
ياهلا ياهلا حي الله خوياتي وانيساتي يامرحبا ومسهلا
أم جابر قبل تدخل والابتسامة شاقه وجهها قالت: ألا يا مرحبا باللي تمايل كما الغرس
لاذعذع النسناس في وقت باكور
رحبتي بروحي قبل تدرك النفس
جعله يبقيتس اعداد ماغرد على الغصن عصفور
زينه:صحت السنتكم ويامرحبا ومسهلا
دلال:زارتنا البركه اي والله صح هالبوح يا اميمتي انتي وخويتس
الجده منيره: هذي ام جابر خوية روحي ياجعلها تبقى والله يحيكم جميع يا هلا ياهلا
-بعد ما جلسو وحلفت الجده منيره إلا أن هي اللي تقهوي الحريم وتسولف عليهم ومدت فنجالها الأول لأم منصور-
وقالت أم منصور:
مديتي فنجال وصلتس والغلا يرقى
ودلال قدرتس تفوح الشوق لأنفاستس
الا يامرحبا ويا هلا بهاللقيا
وياجعلتس تبقين لقلبٍ يبي احساستس
الجده منيره: يا ملح الدار والديره يا ام منصور جعلتس تبقين وتسعدين ياربي ويالله جمع الجنه وشلونكم عساكم طيبين زارتنا السعاده مرحبا ومسهلا
-وبعد التراحيب والقصايد اللي لو نقعد معهم ما بتخلص وكانت هذي ميزة الديرة أن أغلب سكانها شعّار والسنتهم فصيحهم وكلامهم عذب وقلوبهم على بعض والدليل أن يوم بشرت الجدة منيره الحريم بحمل دلال كلهم تحالفو على عزيمة دلال واكرامها لأنها  بنت الشايب (ذياب) الوحيده وكانت مطلب أغلب شباب الديره من سنعها وجمالها وطيبها وبرها في والديها ولكن كتب الله تاخذ عبدالرحمن وتعيش بالرياض وزاد الغلا اكثر يوم صارت تجي الديره كضيفة والكل يتشوق لجيتها ومر الوقت لكن ماهو بالكثير إلا وحصه داخله بعذبه وحمد اللي نزل من السطح لبداية الديرة يلحق سيارة عمه من فرحته في عذبه ودخل معهم البيت وهو يطير لحضن جدته ويبشرها انه لمس وجهها وشافها وعاد الحريم تناقزو يسلمون على حصه ويباركون لفايز وانسحب فايز يوم شاف جمعة الحريم وترك حصه وعذبه عندهم وراح للقهوه اللي بنص الديرة-
تركي لساره: عندكم نونو؟
ساره: ايوووه هذي عدبه احت هيا تعال سوفها
عذاري: وانا وانا بلمسها
فوز:خاله حصه عادي اشيل النونو؟
حصه: لالا
زينه مدت العصيدة لحصه:سمي يا حصه ..ساره خذي العيال واطلعو اللعبو برا يلا ياحمد
حمد:لا بقعد اسوفها حليني
زينه بنبرة حادة: حمد مارحت مع متعب وفلاح للعزبه وسكت تبي تقعد بين الحريم بعد!!!
حمد: ثمي -بمعنى سمي وقام من بينهم بثقل وراح يلعب مع الصغار وعاد راح الوقت مابين ضحك وسوالف وكلٍ يتفق وش ينفع زوجة ملفي في عرس ولدها بكره اللي قالت عليها القهاوي واللي الشاهي واللي التمر والعرس كان باكر من بعد الظهر لذلك سرو بدري وراهم نوم والرجال رجعو من القهوه والعزبه والكل نام في غرفهم الا العيال كانو ينامون سوا في المقلط وحصه تنام لحالها في المجلس لأنها نفاس-
"انتهى💕"