"أثر الهناء حلم يا حمد"

البارت الثالث والثلاثين

سرور ناظر حمد المنطرب والمبسوط :لو ادري ذي فرحتك كان من يومها فحصت ورجعنا
حمد: هذا الظاهر لك اجل وش تقول عن الخافي؟ والله يا سرة لولا الضلوع ولا كان قلبي يرفرف قدامك هنيا -ضرب بيده على الطبلون- ياااوووكككك يا ولد اشتقت اشتتتقت يازقن هالخط وهالدرب بسسسس
ضحك سرور من حب حمد الغريب للديرة اللي بدأت تبان من بعيد وكان سرور عند وعده وصارو على قراب الضحى ، لكن في الديرة كانت الفرحة مختلفه والبنات ملتمين حوالين عذبه ورغد اللي وصلو قبل حمد وسرور وعذبه كانت تضحك بشكل هستيري وهي تناظر بنات عمها وهيا خاصة ومزون ودلال والكل عدا امها اللي جن جنونها يوم شافتها بدون طارق وجايه مع فلاح ورغد وتوقعت ان عذبه تمردت او انحاشت من طارق وانطلقت للغرفة تتصل بطارق وتسأله بس طمنها بطريقته ان كل اللي تشوفه بعلمه وتخطيطه
ساره بكت من فرحتها يوم شافت عذبه بخير شكليًا ورجعت لهم وهي ودها تاخذ منها التفاصيل وتفهم كل شيء بس زحمة البنات ما ساعدتها ومر عليهم صباح رايق وحلو وغييييير عن كل الصباحات وما ننسى دخول رغد بين البنات وكأن بينهم معرفه عريقه وقديمه من أول وهي اللي انسجمت بينهم وفيهم بدون مقدمات
عذبه:والله والله اني اشتقت لكم حيللللل
الهنوف:هالمره اظنتس صادقه اشتقتي لنا كلنا
عذبه:اي والله صادقه وانتو اكثر بعد تخيلو!
ساره:لالالا مو معقول!
عذبه وبقلبها حزن: محدٍ يطغى على الوليف اكيد مير والله انكم وحشتوني
هيا:اتركوووو اختي تعبر وتصيح يا ويل احد يكذبها بشيء .. قولي حبيبتي قولي كل شيء وعبري معليتس فيهم
الهنوف:احنا نشكي من وحده وجات الثانيه الله يعين
مزون:لا بالله محظوظين يا هنوفوه!
هيا: من ورا قلبها معليتس منها
رغد بهمس وهي تردد لهجتهم : معليتس منها! الله
التفتو البنات كلهم على رغد وقامو يضحكون ويطلبونها تعيدها بصوت مسموع وعادتها رغد والتمو كلهم حوالينها يعلمونها لهجتهم ويدربونها على النطق الصحيح
الهنوف: حاولي تكتبين كل كلماتنا لان بعدين ابي اعلمتس على المجاكر وهذي لها مصطلحات ثااااانيه وخاصه
هيا: ههههههههههههههههههههههههههههههههه انشهد انها لعبتس
طلعت سارهونادت عذبه والعذر "ترتيب شنطتها مع اغراضهم ثم ينزلون يتقهوون مع بعض"
و دخلو الغرفة فوق وقفلو الباب عليهم وهنا انفجرت ساره وبكت وهي تخم عذبه وتسمي عليها من بين شهقاتها كانت متحسفه انها ما قدرت تساعدها وانها خلتها تروح للشرقيه وترجع وهي ماتدري وش حصل فيها بس دام طارق بالموضوع معناته ان عذبه تعذبت معه ، كانت ساره تبكي وانفاسها تسابقها على الكلام وتتنهد وهي ودها تتطمن على عذبه بكل صدق بس ما قدرت عذبه ترد ولا تطمنها بالكلام لأنها فهمت ان ساره عرفت وقامت تبكي معها وحيلها مهدود من اليومين اللي راحت وبعد وقت ماهو طويل ..
ساره: عذبه شلونتس؟شلونس صدق؟ والله ماحلفتيني بالله اني دايم الدوم ادعي لتس ترجعين بالسلامه وان الله يفكتس شر هالاقشر من شفت رسالتس وانا لا ليلي ليل ولا نهاري نهار
عذبه مسحت دموعها وجلست بيأس:حمد ما شافها !
ساره: حمد؟ ياقلبي على حمد يا عذبه هو لو شافها تهقين بيسكت؟ تهقين الامور بتتم كذا؟ ان ما حصلت مجزره فانا ما اعرف حمد .. حميد مابعد جاء وكل يوم يرسل سلامه ومراسيله عليتس ، مير قولي لي شلونتس ووش صار تكفيين طمني قلبي
عذبه بدات تتكلم مع ساره بحرقه وغبنه من تفكير امها وظلمهم لها ومن ضرب طارق ومن فزعة رغد الين وصولهم للديرة
ساره:ياعمري عمرتس ياعذبه ياعمممممري عمرتس اللي بعذوبتس تنحط على كفوف الراحة مهب تتعذب بحبها ! انا والله شكيت من عمتي حصه مير ماهقيتها تفكر كذا ! وتسوي هالسواة ! الحمدلله انتس رجعتي وصرتي بيننا وتكملين الاجازه معنا ونقول خطاتس السوء وشر ومر الحمدلله
عذبه: الشر مر والخير جاي رغد تقول حمد بيخطبني عشان كذا جينا
ساره انصدمت وهي تدري انهم لبعض بس ماعندها خبر وحمد مو موجود ! شلون وصلها الخبر واهل البيت نفسه مايدرون!  ما عرفت تبين موقفها او شعورها قدام عذبه تخاف انها خطة من فلاح ورغد عشان يهونون عليها بس مثلت الفرحة وماشت عذبه وهي توعدها بالحياة الوردية والحلوه اللي قدامها
ساره: عذبه
عذبه:سمي
ساره: دامتس بتصيرين حلاله تكفين وقفي مراسيل وقفي اللي تسوينه خلي عرسكم يتم ولا صرتي في ذرى حمد وامانه حزتها سوي اللي براستس لاتروعيني عليتس مره ثانيه انا طالبتس يا عذبه
عذبه ابتسمت: من عيوني يا ساره جعلني ما اخلا منتس بس ، توبتي يا ساره توبتتتتي
وهنا خفت عذبه وخفّت نفسيتها وحِمَلها كثييييييييييير ارتاحت بوجود ساره وبوجودها بنص الأمان وهو بيت عمها والبنات واهلها نزلت عذبه للبنات تتقهوى معهم وانظارها تدور على امها مشتاقه لحضنها رغم اللي حصل بس ما حصلتها .. اما ساره قعدت بغرفتها بعد مانزلت عذبه وجلست تفكر باللي حصل كله ووشلون انتهى وكم باقي على زواجها مع هالصقر المجهول للآن! كانت تهوجس وهي تحس نفسها بحلم من ضغط الأحداث اللي حصلت واللي بتحصل كان ودها تغمض عيونها وتفتح وتلاقي هذا كله ماحصل وأن حياتهم مثل ما بدأت الاجازة ومثل روتينهم الدائم أو على الأقل تطلع خطبة حمد حقيقية وما تنكسر عذبه من جديد، نفضت كل هالهواجيس من راسها وجددت شكلها ونزلت على البنات وقررت تزين لهم شاهي يروقون عليه وطلعت للحوش الخلفي تقطف نعناع وسمعت صوت عند موتر حمد
حمد وهو يتحلطم بعد ما نزله سرور وراح: انا مدري متى ارسل هالسعود وينجز ! كله موتر يا ابن الحلال! وراك مابعته! اوففف
ساره شهقت بكل صوتها وركضت لحمد حضنته بقوووووووه وارتاااااااااااحت ارتاااااااحت يوم سمعت صوته وشافته ارتاحت يوم تواجد بالبيت بعد عذبه وشافته بخير
حمد بصوت مخنوق وهو يرفع رقبته يتنفس: بس يا ساره خنقتيني يابنت الحلال
ساره مافكته: خلني ياحمد والله اني ولهتتتتتت عليك! احسبك بتبطي زود ولاتحضر عرسي!-بعدت عنه-
حمد ضربها في راسها بخفه: انا ما احضر عرستس يا سوير! اخسييي انا حالفٍ لا اسوي لتس عرس يتعالمونه المسلمين كلهم وتقولين ما احضر؟ من ياخذني عن اهلي؟؟ قولي لي شلونتس بس
ساره وعيونها تنتج حب: يا بعد دنياي ونااااسي وكوني كله يا حمد .. الحيننن؟ والله اني طيبببببببه وطيببببه ... متععععب هنوووووف
طلعت الهنوف للحوش وهي مستغربه:علامتس تصار.... ححممممممددددد
حمد ضحك من قلبه:وطي حستس ! اكيد العيال بالبيت!!!
ساره بضحكة:لا طلعو كلهم بس متعب بالبيت ابوي معطيه اجازه عشانه عريس هههههههههههههههه
حمد:هههههههههههههههههههههههههههههههههههههههههههههه عقباااالي هالحين يشوفني ويكرفني ، الدلع لمتعب بس
الهنوف وصلت لحمد وسلمت عليه وهي تضرب كتفه: وراك جيت؟شكلك تبي تاخذني وتطلعني معك صح؟
حمد:انا بطلعتس ابشري بمشيتس في الديرة واردتس البيت بس الحدود؟انسييييها
الهنوف كشرت بوجهها: ويععع اجل اقعد لاتطلعني
ساره:انا بطلع معك راضيه بالديرة
متعب جاء بعد صوت ساره وابتسم بعرض ووسع فمه: ارحححب ياححمييد ارحب ارحبببب
حمد تقدم لمتعب: الا ارحببب يا العريس يالله حيه
ساره:خلاص ارحبو كلكم
هيا ناظرت من طرف باب المطبخ: سوير! وش صاير عندكم؟
الهنوف:انشري الخبر با نوير فرع بيتنا.... حمد جاء
ساره: مب حمد! قولي الضابط حمد جاء عشان يصير لها هيبه
هيا بضحكة من الهنوف : عز الله ربعنا يبون يطيرون من الوناسه ما بيهابونه ابد يا سوير
ضحك حمد بعد ماسلم على متعب ونزل عيونه بالارض عشان هيا وحك شنبه وضحك ( من طاري عذبه)
متعب:هههههههههههههههههههههههههههههههههههههه
ساره ضحكت: اوووووووهههه! غبت يومين ورجعت لنا حياوي؟؟؟
الهنوف:هذي اول ثمار الخروج من خلف الحدود لو استقر هناك بتشوفينه اذرب انسان
متعب:انا باخذك من بينهم قبل ياكلونك بالطقطقه هذولا مايرحمون ولا يعرفون الحدود الخاصصصصه بعد
الهنوف سكتت بفشله وركضت للمطبخ وهي فاهمه متعب اللي قالها وهو يضحك عشان يسكت الهنوف وتترك لحمد لمتعب واخذه فعلاً  وراحو للمشب والبنات رجعو للبيت وساره بيدها النعناع وتعلم عذبه وتناظر عيونها اللي تشع بالحب والخوف بنفس الوقت ارتبط حمد بطارق في عينها وصارت فرحتها مؤقته وتحت التهديد
وفي المشب بدأ متعب يبارك لحمد ويعلمه باللي قاله ونواه وهنا فز حمد وحضن متعب ودار فيه بالمشب كله وهو يصااااااارخ
متعب بضحك: فكني يا المصروع شبلاك!!!!
حمد وهو يضحك من كل قلببببه واختلط ضحكه بصراخه وقعد يكرر"الحمدلله" بين ضحكاته لأن حلمه كان مجرد كوابيس وهذا هو اول ما رجع للديرة اجتمع بعذبته وحبيبته رسميًا !
حمد بفرحة وصوت جهوري: ووين اروححح من جزاتك يا متعب؟؟؟؟ وينننننن؟؟؟؟ الله يخليك لي ذخر يا اخوي ويطول عمرككك احلف لك بالله ان هذا ازين استقبال استقبلته من خلقني الله يااازقننننكككك زقننناه يا متعععبببببب اااااااخخخخخخخخخخخخخخخخ -صارخ حمد بفرحة وكأن روحه ازهرت وتوردت كل خلية في جسمه-
دخلت زينه المشب مفجوعه من الصراخ والضحك:متعـ... حممممممد!!!
حمد التفت على امه وخمها بقوه وهو يضحك ومبسوووووط:هلااااااا بحلوة اللبن هلا باميييمتي وعيني وروحيييي هلاا والله بام متعب الشامخه هلااااا
زينه تمت حاضنه حمد وهو اللي اشتاقت له وفارقت له كثييييير ماتعودت ولا احد تعود ان حمد يغيب من البيت أبد
متعب:الظاهر امي بلعت لسانها من الراعه حسيبك الله ياحمد انت وصراخك
حمد هز امه من اكتافها بمزح:يمممه! انطقي
زينه وعيونها مغورقه: جعل زولك ما يغيب عن عيوني يمه ياقلع الديرة بلياك تو ما زانت بعيني والله
حمد ضحك لأمه: لالا يا الغاليه لزوم تتعودين على الوضع ولدتس تبي تبدأ دورته الاسبوع الجاي حزتها وش تسوين؟
زينه: هون يا حمد واقعد
حمد:وعذبه يمه منين اصرف عليها؟؟؟
زينه ضحكت: وهذا اللي شاغلك؟ عيني عليك وعينك على عذبه .. مير الله يكتبها لك ويهنيك وانا امك
حمد ابتسم:اميننننننن امينننن .. اقعععدي وعطيني الجديد والله يا يمه ان قلبي صايرٍ هالكبر -فرق يدينه عن بعض بشكل كبير- من الشوق لو قعدت يوم زيادة انفجر بصدري
زينه جلست : بسممم الله عليك وش هالكلام اللي تقوله! فال الله ولا فالك بس...
-بدأت زينه تسولف ومتعب يشاركهم شوي ويتأمل فرحة حمد اللي مو قادر يجلس! كان يسولف معهم وهو واقف ويناظر فرحته اللي طالعه من عيونه وروحه وابتسامته اللي ما تلاشت ولا تقفل فمه وبدأ متعب يدعي بنفسه ان عمه مايغير رايه ولا يهون ولا يخرب أي شيء وتتم فرحة حمد مثل ماهي ، كان متعب خايف من قعدة طارق بالشرقيه وجية عذبه مع فلاح لحالهم وهو يدري ان طارق ما يهدا ويختفي إلا على شيء بس كان مجهز نفسه ومجهز كل الردود لكل الأحتمالات كله عشان هيا واخوانه وعايلته ما تخرب ولا تتشتت-