"أثر الهناء حلم يا حمد"

البارت الرابع والأربعين

دخل ابو متعب البيت وشاف امه قاعده لحالها في الصاله والهنوف وهيا يتهاوشون كعادتهم وصوت للهنوف
ابو متعب:ياهننوف
هنوف فزت:لبيه يبه؟
ابو متعب:طلعي القهوه في الحوش ناخذ فنجال مع جدتس قبل المغرب
هيا:اصبرو افرش قدام تطلعون اجل
ابو متعب:الله يوفقتس يا هيا
هيا ابتسمت لعمها وطلعت تفرش وقربت المنقل عشان تشب فيه  (مكان الحطب او الفحم عشان يدفون) ووزعت المراكي
هيا من الحوش:يله يا عمممي المكان زاهب
ابو متعب:قومي يمه نتقهوى برا
الجده منيره:اسندني يا سيف اسندني يا معكازي وسندي .. -مد سيف ذراعه عشان تقوم امه وبعد ماوقفت وهي لازالت ماسكه ذراعه قالت- الحين تمسك أمك وبكره تمسك العايلتين وتدمح الخطأ وتمشي الدنيا هذا اللي ربيتك عليه وهذا اللي احتريه منك
ابو متعب صدّق كلام دلال وعرف ان امه قاعده توصيه على عياله وعيال فايز بس مايدري وش سمعت ووش فهمت وليش توصيه! ليش تحمله هالحمل الثقيل فوق ذنب فايز!
ابو متعب:على خشمي يمه هذا اللي مسويه من اول عمري وابسويه بتاليه و أورثه عيالي بعد مير اطلعي الحين تقهوي واستانسي.. وين ام متعب؟
الجده منيره:مسيره
ابو متعب:افا! ولا اخذتس!
الجده منيره: مابقت فيني بنت الاجواد مير انا ماش خاطر للمخراج
هيا دخلت البيت: هااااه! وراكم بالبيت؟ وانا اصوت لكم برا واقول القعده جهزت!
ابو متعب ابتسم لهيا:جايتس وانا ابوتس وراتس عجله ! يله يمه استجيبي لهيا
طلعو وجلسو على الفرشه ولحقتهم  الهنوف بسرعه بالطوفريه والقهوه والشاهي وقالت:ها مانيب قايله لكم انها مطفوووقه وعجله! 
ابو متعب يوم شاف زول الهنوف والطوفريه بيدها وتهاوش هيا  حب يلاطفها عشان تسكت عن الهواش وقال:
عاش من جاب الفناجيل والدله
والأبريق مخدرٍ به ورق شاهي .. صحّت يمينتس يا الترف كله
هيا:يووووه بدأ المغازل.. الحين ياعمي ابنشدك
ابو متعب:قولي ياابوتس
هيا:الحين انت وعيالك السنتكم معسوله وشعار كلكم صحيح الكلام ذا؟
ابو متعب ضحك:انتي خير شاهد اجل(يقصد ان متعب يغازلها)
هيا استوعبت انها جابت العيد وهجدددددت بخجل
الهنوف:انا منيب قايله لاتهرجيييين! ياااا سواد الوجه ، عاشت سنينك يابو الهنوف عساني ما اخلى
الجده منيره ضحكت:وش هي نشدتس يا هيا؟ كمليها معليتس من عمتس
هيا بهدوء:كنت بقول ورا اهلي وابوي ماصارو شعار مثل عمي سيف
ابو متعب:وعياله
الهنوف والجده منيره:ههههههههههههههههههههههههههههههههههههههههههههههههههههههههههههههههههه
هيا:هااااه!! انتم تبوني اقوم صح!
دخل متعب:السلام عليكم ورحمة الله
الكل رد السلام
ابو متعب:جاتس العسل المصفى
متعب ابتسم وعرف ان هيا انلفت لسانها كعادتها
الهنوف طلعت الورق من جيبها وبدأت تخبص الاونو: اقول يبه اترك عنك الكناري واللعب معي تكفى مبطي ما لعبت
ابو متعب:يلا
الهنوف ناظرت جدتها:تراتس بتلعبين يا منور مالتس مجاااال للاعتذار ابد -التفتت لمتعب عشان تجبره هو بعد بس تقدم لجلستهم وجلس على مركى قريب من المنقل والشبّه وقال-
متعب:انتي اللي مالتس علي مجال انا حكم هنا منيب لاعب لعبي هيا محلي
الهنوف:اونو ترى مهب بلوت! نقبلك تعال
متعب:مكاني زين يابنت
بدأت الهنوف توزع الاوراق وهيا تناظر متعب وتبتسم وقرصتها الهنوف:هيااااااا!!!!! والله ان ماركزتي !
هيا همست باذن الهنوف:خلاص كلي تبن واعتقيني شوي خليني اتهنى حياتي ابو هالسلطة اللي متسلطتها علي !
الجده منيره:هذلّي شسوي بهن؟
الهنوف ضحكت لهيا وقالت:اللون اللي تشوفينه بالارض نزلي مثله
الجده منيره:اجدع كل الالوان اللي تشابهه بالارض!
الهنوف: لااااااا! بس ورقه وحده ياحبي لزولتس، انتي علامتس تبين تفوزين بسرعه
الكل:ههههههههههههههههههههههههههههههههههههههههههههههههههههههههههههههههههه
-بدت الهنوف تلعبهم ومتعب يتأملهم ويناظر حماس هيا وضحكها بين اهله وابو متعب اللي يجهل اللعبه بس لعب عشان خاطر الهنوف وكل شوي يغلطون وتعصب الهنوف وهم يموتون من الضحك ويرجعون اوراقهم معهم او يسحبونها اربعه وثنين ولا حالفها الحظ باللعبه لكن الروح المرحه استمرت طول الوقت وغيرت الجده منيره جو بشكل ملحوووووووظ واستانست وبنص اللعبة دق التليفون ونطت الهنوف ترد-
الهنوف:الو؟؟
الجازي:هنوووف عطيني هياا بسرعهه
الهنوف:سلمممي اول! لمتى ابعلم بنات عمي فايز السنع انا؟ بعدين شتبين مخربه علينا اللعب! هيا مشغوله
الجازي بفرحه: بصيرررر عمممممممههههههه عطييني هيااا ابشرهااااا
الهنوف شهقت:كذاااااااابه!!!! وانا ياربي متى اصير عمه مثلتس!!!!
دخلت هيا:شبلاتس تشهقين؟
الهنوف:الحساويه حامل
ضحكت هيا:قلتتتتتتته والله اني قلتتتتته عطيييني اكلم وابارك
الهنوف مدت السماعه لهيا وقامت تكلم اهلها وتبارك لهم وكلمت رغد والهنوف تحاول تلصق اذنها بالسماعه عشان تسمع لهجة رغد وقفلو وراحو يبشرون اللي بالحوش
الجده منيره:الله يتمه ويقر عينهم والعقبى لكم ياكريم
هيا تلاشت ابتسامتها بخجل
متعب ابتسم:امييين ياجده امييين
-اذن المغرب وقام ابو متعب ومتعب يوضون ويطلعون المسجد-
الهنوف: يبه ان جيت نبي نكمل زين!!!
ضحك ابو متعب:زين يابوتس خليني البي داعي الله(الاذان) وعقبه خير
هيا دنقت لجدتها عشان تساعدها وتدخلها تصلي بالبيت والهنوف شالت المواعين والدله والشاهي للمطبخ