"أثر الهناء حلم يا حمد"

البارت السابع

تركي:على اساس ما تعرف شايع!! لا وتدري ويش المشكلة!
منصور:اسكت اسكت رايد جايي
(معلومة :تركي ومنصور عيال جيران ابو متعب وعلاقتهم معهم زي العسل واكثر من اخوان ورايد واخوه صقر اللي راح نشوفه بعدين من عيال الديرة الثانيه وتربطهم قصة انتقام لهذي الديرة ولعائلة الطايل خاصه ويزورون ديرتهم بين فتره وفتره عشان انتقامهم)
رايد:السلام عليكم..غريبه مجتمعين محد ناداني!
تركي:وعليكم السلام ارحب، تونا مالنا من جلسنا
رايد:وخويكم واخوانه وينهم؟مالهم حس بالديرة لايكون عمه جاء؟
منصور:اجل العرس اللي بكره لمن؟لولد فايز الطايل
رايد ابتسم على جنب: ايييييه عندهم عرس ! اجل وينهم مالهم حس ولاخبر ولا كأن بكره عرس الطايل!ههه -ابتسم بقرف-ماهيب عوايد ابو متعب بالعادة يحتفل ويجمع الناس على ادنى شيء شعاد عرس ولد اخوه !
تركي عدل ظهره وجلسته: ياخي وش بينك انت وعايلة الطايل؟
رايد:موضوعٍ وبينحل مع الأيام وتذكر كلامي زيييييين
منصور: لاتقول كلامٍ اكبر منك يا رايد وتعقّل تراهم الطايل!! مهب حي الله وفك نفسك وفكنا من المشاكل كلكم اخويانا وكلكم عزيزين على قلوبنا لاتخلينا نوقف بينكم!
تركي:وانا ما ازود على كلام منصور شيء ها اطعم العلم وريحنا
رايد: لاتوقفون بيننا ولا شيء اهدو الحين وهات شاهي يا عمممم ... تقههو وروقو بس
-نرجع لعزبة أبو متعب اللي تراكضو كلهم بس سبقتهم عذبه وحصلت حمد منقلب وفيه جروح بسيطه وماتعور وهو لمح عذبه بعد ما فتح عينه وناظر عيونها ورجفة شفايفها وحب يطمنها بطريقته الشاعريه قبل يقربون الباقين وقال-
حمد:انا على وجهتس من الدمع خايف
وانتي من جروحي تخافين!
عذبه:اي والله خفت يجيك شيء ياحمد
-وقف ونفض ثوبه وشعره- معليتس انا بخير والامور بسيطه لاتصيحين يا منى عيني -تجمعو كلهم بهالوقت ووقف حمد يطمنهم-الله الله ! مادريت اني عزيز عليكم ههههههههههههههههه
-عذبه مسحت دمعتها اللي طاحت بسرعه وابتسمت بسريه-
جاء ابوه:حمد جاك شيء؟
حمد:ليتك ماتعنيت يبه لا والله هذاني بخير معليكم
زينه ضمته:بسم الله عليك الرحمن الرحيم
عذبه :اذا تعورت بنقطع اللعبه خلاص
بدور:لا والله؟؟؟؟؟ ودورنا؟؟
مشعل:صدق يوم جاء دورنا طلعتو يا عصافير الحب؟؟
الكل:ههههههههههههههههههههههههههههههههههههههههههههههههههههههههههههههههههه
ساره:اييييه اكيد بنوقف كل شيء لعيون حميد بسم الله عليه
هنوف:اقول وخرو وخرو دورنا وانتم خسرتو طاح حمد لاتصرفون!
بدور: اي والله دورنا يلا يا طارق
سعود: تبون تفوزون اجل؟ وخر وخر يا طارق انا بسوق واوريهم الهياط
مزون:للحين احنا في الصداره هههههههههههههههههههه تتهاوشون على وش!
هيا:خليهم خليهم ترى لنا هديه ان فزنا
ابو متعب:ايه اجهزي ياعروس هذي هديتس
ساره:هههههههههههههههههههههههههههههههههههه يوه! يبه هذي عقوبه مب هدية
-متعب ابتسم وهو يلعب بسبحته ويده الثانيه بجيبه ويناظر هيا-
ابو فلاح:الله يهداك يا سيف خل البنت تضحك انقطع حسها
جازي:يويلي عنتس يا هيا لو درينا طرينا العرس من بدري عشان تسكتين
حصه:بنت
جازي:وانا صادقه يمه
هيا بصوت خافت وخجل لجازي:كلي تبن ازين لتس
عذبه:متى العرس عمي؟
ساره:وراكم مستعجلين خلونا نلعب الحين
ابو متعب بضحكة:عذبه تلمح لعمرها مير انتم ما فهمتو
مشعل:والله استلمكم خالي سيف ههههههههههههههههههههههههههههههههه
عذبه:لا والله فهمتني غلط ياعمي انا اقصد...
حمد:هههههههههههههههههههههههههههه -تعمد يضحك عشان يحرجها زود وهو ضامن انها حبيبته الآن وزوجته مستقبلاً-
عمر:ليتك تطقطق علينا يا خال وتترك البنات عسى حظنا يقوم حتى احنا
سعود ركب وطلع يده من الدريشه وضرب الباب:انا اقول خلو العرس واقعدو اقعدو ترى بحرك
ابو متعب ضرب رجله في رفرف الددسن:تريّض تراهم بنات!
سعود بصوت واطي: طلعو عيوننا هالبنات بس انا اوريهم
-راح ابو متعب هو وحصه وزينه وابو فلاح وجلسو مع امه ودلال والعيال كملو لعبهم وسعود طلع حرته فيهم فعلاً وتناثرو كلهم بالبر والرش على وجيههم بس الضحك كان اقوى ويضحكون لدرجة ما قدرو يوقفون والعيال والبنات صافين ويعززون ويصارخون ويضحكون من ضحكهم واخيراً جاء دور العيال واول ما جلسو اخذو تراب في احضانهم ورموه على البنات وسعود يسوق وهو يضحك ومبسوط ويعزز-
سعود:ككفففووو يا عيال الطايلللل الله يعزكم اي اي اعموهم بالتراب
هزاع:يويلي ابك بطني عورني من الضحك مقدر بنسدح
ركان:تممسك يا الهلامه لاتطيح ونخسر عليهم واحنا مشغلينهم يهايطنا
مشعل:ااااااهخخخخ بطني بطني شوفو ركضة هنوف تكفون سيقانها شطولها وتركض-كلهم التفتو وشافو هنوف رافعه قميصها وفي يدها احجار صغيره ومتجهه لهم-
ركان:انتم ليه تضحكون!! انا اقول تشهدو والله انها معصبه دام الاحجار معها وسيقانها بينه
مشعل:بخليها تروق بس قربنا منها يا سعود
سعود سكر دريشته لانه عارف عصبية اخته وهو يضحك وقربهم منها وهو يقوم مشعل ولا مداه ينطق الا والتراب في عيونه والاحجار عليه:صلي على النبي طيب ...ياويييللييي ويلااهههه يااا سسععععوددد-نط في حوض الددسن وهو يضرب السقف وسعود يسوق ويسرع والبنات ميتات من الضحك والعيال بعد وبعدها رجعت تمطر بقوه ووقفو كلهم بالنص يضحكون واخذو البطانية اللي كانو يلعبون تحتها وكل واحد مسك زاويه ورفعوها فوق روؤسهم وهم يتذكرون لعبهم ويرجعون يضحكون من جديد ورجعو على اهاليهم بشكل جماعه والبطانيه فوقهم من المطر-
حصه: والله ان تقولون كلهم من بطن واحد ياحلو خوتهم بس تبارك الله
دلال: اي والله يا ملحهم شوفو ضحكهم هههههههههههه
ابو متعب:ما بان الا ضحك هيا الله يسعد هالبنت ما اطيب قلبها
ابو فلاح:من قال سالم
الجده منيره:ترا وصيتي تزوجونهم من بعضهم وتلمون شملكم ولاتفترقون لو ساعه وحده هذاني قلته وكلكم شهود على بعضكم
دلال:يممممه! بعد عمر طويل بسم الله عليك
ابو متعب:ابد يمه لاتوصين بس انتي اتركي هالطاري الله يعافيتس
-هنا وصلو العيال والبنات ورجعو جلسو حول الشبه وصارت جلستهم وحده-
عذبه:من فازز يلا؟؟؟
بدور:انتم واضحه يعني احنا
سعود:انتم يعني احنا؟ماتعرفين تسولفين انتي؟
بدور التفت على خالها:يا خال فكني شرهه تراه يقهرني من نجي الديره لين نروح
ابو متعب:والله لا اقص لسان اللي يزعل البنات و تراها كلمة ما اثنيها!خلصنا
سعود هجد وخاف من ابوه بس همس لبدور:والله انتس بزر بس هين ان مارديتيها لتس
بدور:هههههههههههههههههههه اص لا اعلم خالي
جازي:وش هديتنا اقول
ساره:اي اي نبي هديه صدق
متعب:شتبون عاد؟محنا فاضين ورانا عرس بكره
هيا:مهب عذر لاتاخذ فلاح ذريعه يلا يلا هات الهديه اقول .... لالا خلاص خلاص-تذكرت طقطقة عمها-تكفون اسكتو خلاص
متعب:ماقلت شيء انا
ابو متعب ضحك جد ومن قلب:هههههههههههههههه بتاصلتس هديتس يابنتي معليتس وعقب عرس فلاح باسبوع
زينه:هههههههههههههه الله يسامح عمتس مير معليتس صدق بيهدونكم انتم فزتو ولا يا طارق ومتعب؟
حمد:وانا؟ يلا احسن كنت مجهز لهم هديه
العمه دلال:انت خلك بأمورك وزين حالك واترك الهدايا..ايوه يا متعب متى عرسك ان شاء الله؟
هيا وفي فمها كيك نحول:هااااااه!!! ياعمه خلينا نستانس شوي كل ما سليت ربطتوني بذا
حصه:هيا سدي ثمتس 
هيا:اي وانا صادقه يمه!! حتى الكيك ماتهنيته
متعب: يبه تكفى فكر من جديد .. من غير قصرة في عمي وعياله بس هالمهبوله ذي من يبيها؟
ساره وهنوف بنفس الوقت قالو:انا
هيا:ييووووهههه انا ان بطيع فعشان خواتي بس
حصه:يويلي هالبنت طار حياها طااار !! هيا!!!
هيا:زين اذا سكت لاتقولون علامها ... وجع انت اترك الكيك
هزاع:خلصيته علينا
هيا: من حر ما اونننسسسس قاعده اكله
زينه طلعت من الصندوق اللي وراها كيك وبساكيت: هاه جبنا زياده كلو وادفو وتقاربو
ابو متعب: قم يا ركان صب القهوه لجدتك وعمك
ركان بهمس: كل ما قعدت قلتو ركان ركان حتى انا ابي كيك وحليب
سعود ناظر ابوه بسرعه وهو مبتسم ينتظر الهوشه بس سكت ابوه: هو!! يبه ورا ما جلدته؟ وانا ان قلت لهالسلق حرف مصعت رقبتي
ابو متعب:ليه اجلده وهو وش قايل؟هذا هو قام يصب -ابو متعب عطا ركان نظره وهو سامعٍ همسه و نفضت عظامه وخلته يصب وهو مبتسم بعد-
حمد ضحك:ايييييه اعرف وش جاه اعرفففف النظره ذي مرت علي انا بعد ههههههههههههههههههههههههههههههههه
متعب:شكلها اللي تخبر يا حمد ههههههههههههههههههههههههههههههههه
فارس:تكفون شسالفه
ركان بعصبيه:امور عائلية مالك شغل
ابو فلاح:ماصار شيء بس سيف مربي عياله ماشاءالله
طارق:شدعوه يبه حتى انت مربينا ولا اطيب منهم الا احنا
فلاح:صحيح كلام طارق
حصه:مافيهم الا انت يا يمه
فلاح:يابعد روحي انتي
هزاع: لالالا انتم مهمشينا ولا يا طارق؟
طارق:هذا اللي اشوفه والله
عذبه: لاتظلمينهم يمه والله ان اخواني كلهممممم يهبلون ماشاءالله
مزون بهمس لعذبه: كل اخوانتس متأكده؟ترى ولد العم اخ بعد
البنات سمعوها:ههههههههههههههههههههههههههههههههههههههههههههههههههههههههههههههههههه
-قضو ابطالنا بقية العصر تحت رش المطر الدافي وحوالين الشبه وبين الضحكات والمزوح لين صلو المغرب وعزّمو الأباء الرجعه عشان يجهزون الخيمة ويبدون يفرشون ويجهزون الفناجيل والحطب والزل والعقد وكل شيء وفعلاً شالو البنات الاغراض ونظفو العزبه وراحت عذبه تتوادع من ناقتها بحب ورجعو البيت وكان بإنتظارهم الفقرة المفضلة عند زينة واللي ماقدرت تتخلى عنها-
زينه:يلا يا بنات الحناء كلكم اقعدو قدامي وفكو شعوركم اشوف
عذبه:توي متروشه ياعمه تكفين
هنوف:بكره عرس اخوتس بتتروشين من جديد وبعدين شلون تصير مناسبه بدون حناء امي؟؟
مزون:وتونا جايين من العزبه ومتمردغين يعني كذا ولاكذا بنتروش
هيا:اي والله انتس صادقه ماتحلى المناسبات الا بهالعادة يحلوتس يا عميمه
زينه:بعد روحي انتي اجل تعالي ابدي بتس
هيا فكت شعرها اللي كان طويل وناعم ولونه كستنائي اصلاً من غير شيء:سممممي
حصه:هاتي بحني معتس نصهم عندتس ونص عندي
دلال:وانا بنزل اسوي العشاء اكيد اخواني وامي جاعو
زينه:اقول ام فارس خذي هالطاسه فيها حناء لخالتي انا بحني يدينها وانتي حني شعرها عاد جدة المعرس لازم تكشخ
دلال:ياحلوتس يازيون ابشري
حصه:يلا تعالي يا ساره بسم الله
مزون:ياررربي اليوم كل شيء ذكرني بطفولتنا تخبرون يوم تحنينا وحنا صغار؟
ساره:خلي الحناء تذكرين يوم عمة دلال تروشنا ومتعب هرّب هيا وراحو يلعبون؟
مزون:اذكر امي حطت اللي بقلبها كله فينا ههههههههههههههههههه
زينه:زين انكم كبرتو وخلو عنكم متعب وهيا الا سوير وهي صغيره كانت تبا تكشخ عشان...
هنوف وهي تشرب الشاهي:يمههه لاتقولين تركي ولد الجيران؟
ساره غطت وجهها بيدينها:يييمممممههه اسككتتتتتي
زينه:لالا خليني اعلمهم بماضيتس وهالحين مناشبه هالضعيفه ومتعب
هيا وهي منزله راسها عشان زينه تحني النهايه:اي اي حيلتس فيها ياعمه
حصه:ههههههههههههههههه اظن هالديرة كلهم يحبون صارت ديرة عشاق
عذبه:دقيقه يمه ساره من جدتس كنتي تكشخين لتركي وانتي بزر هالطول؟؟
ساره:اذكر انه كان عرس عمه وهو بيكشخ قلت اجل وش وراي ما اكشخ وانا بنت سيف الطايل
-شاشو البنات وقامو يصفقون ويطقطقون على ساره وكلهم حنو شعورهم ودلال خلصت العشاء وتعشو ونزلت زينه تسوي أخر فقرة بيومها اللي هي تحني يدين الجدة منيرة اللي كانت تشوفها امها الثانيه والغاليه والحب كان متبادل وغمرتها الجدة منيره بدعوات طيبة-
-عند العيال وفي خيمة العرس تحديداً وبعد صلاة المغرب اجتمعو عيال الديرة كلهم عشان يفرشون ويجهزون الفناجيل والدلال وكل شيء-
سعود:حمد ناولني الدلال
تركي:سم .. حمد بعيد
سعود رفع راسه:وين راح توه يمي! يلا يلا
رايد كان جاي ومعه حطب واول ما لمح حمد طيحه على رجله متعمد:سلامات سلامات صابك شيء؟
حمد بنظرة حاده:لا طاحت بالارض
رايد اللي شك:شلون بالارض؟؟
حمد:يعني متعمد ومستقصد الهدف؟
رايد:وش تخربط انت؟
متعب لمح حمد وعيونه تطلع منها شرار وجاه ركض:يلا ياحمد خلصنا اشغالنا بكره نركب العقد امش البيت
حمد وللحين عينه بعين رايد:اي معليك يا متعب بكره نركب العقد ونصفي الامور كلها ونزينها بعد
رايد ابتسم بخبث وسكت وجاء منصور اللي حس ان رايد ماهو ناوي يعديها بسلام
منصور:هاه شباب خلصتو؟حن خلصنا الخيمه باقي مقر الحريم وعاد هم يجهزونه باتسر ولا
متعب: اي اي خلاص خلصنا ...سعوووود
سعود التفت لهم:سم
متعب:يلا ابوي يحترينا بالبيت-سحب حمد من يده وراحو-
حمد:شفت!!!
متعب:يارجال اسفهه ذا لا ام مربيته ولا ابوه حي شلون تبيه يعني!!
حمد:لالا.. انا اعرف بلاه وانا اعرف طبه بس خله يبدا بها جعله السلال
-ركان وهو يركض لين جاء بينهم وشوي الا وسعود معه واكتملو عيال ابو متعب في صف واحد-
سعود:حمد وش يبي؟
حمد:طيح الحطب على رجلي مير والله ما اعديها له وانا ولد ابوي من زمان ابي امسك عليه شيء
متعب بعقلانيه: مهبول انت؟تبي تعدم ليلة اخوك الكبير وفرحتنا الاولى عشان بزر ما يسوى نعول عند الباب؟؟ تعقّل يا حمد وان كان له حق فياخذه مثل الرياجيل ودامه ما اخطا عليك خطأ بيْن فأسفهه ولا جاء من بكره ولا بعده ردها له بنفس الطريقه ولا اتركه
سعود:ولا ازود على كلام متعب اتركه ولاتعدم فرحتنا هذي نيته اصلاً
ركان:انشهد
حمد وهو يحلها في راسه ويهوجس : زين زين
-وصلو العيال البيت ولاهي الا دقايق وعيال عمهم وراهم وابو متعب وابو فلاح في البيت من قبلهم بشوي-
ابو متعب:هاه قضيتو يا متعب؟
متعب:ابد يبه كل شيء يبيض الوجهه ولاقصرو العيال
فارس:والله يا اني متحمس للعرس مررررره
عمر:حتى انا والله ابي اللعب واعرض لين تتصلب رجليني الثنتين من زمان عن عروس الديرة
سعود:اجل يا انكم بتشوفون شيء مبطين عنه صدق
ابو فلاح:عاد انا استأذنكم ورانا بكره عرس وابروح انام ماقصرتو كلكم
ابو متعب:تلاقي الخير ويلا كل ابوكم قدامي يلا قومو نوم لا اثنيها يا عيال بكره من الفجر الاقيكم قدامي في المجسد ومنها على الخيمه
ركان: انا بنام دام وراي كرف صدز يلا
هزاع ومشعل:وانا ،حتى انا
ابو متعب:وانا بحتريكم تقومون واحد واحد؟؟؟؟-ضرب عصاته بالارض-قوموووو
-تناقزو كلهم للمقلط وتجمعو فيه وكانت الطراحات مسفطه كلها جنب التلفزيون وفوق بعض وبدو ياخذونها ويفرشون واحد واحد وعلقو ثيابهم على شماعة ورا الباب وتسدحو وبدت سوالف النوم وكلهم متحمسين للعرس وجوه ويبون يشوفون فلاح وحماسه طبعًا كلهم كانو يسولفون الا حمد انسحب من بينهم انسحاب هادي وطلع للسطح لجلسته المعروفه اللي يطلعها كل ما ضاق صدره وهذي عادته من صغره وهو يهوجس ويفكر وش يسوي برايد وموضوعه اللي عيا يتقفل وهو مستغرب حقد رايد عليه خاصه وهو ماله شغل!وكل ماكبرو كبر معه وهنا حس إن الهواجيس بتزيد عليه فقرر ينزل المطبخ يسوي شاهي وحصل عذبه تغسل اخر الصحون وتنحنح قبل يدخل-
عذبه التفت بسرعه ولامس شعرها وجنات حمد وقال:ياحلو ريحة الحناء حلوااااه هذي والله اللي تسج الصدر وتبري علته
عذبه:شفيك صاحي للحين؟بعدين مادريت انك تحب ريحته تو كنت بخلص المواعين وازيته للعرس بكره عشان يصير يهبل
-حمد وهو مفهي في وجهها وهي كالعادة نست تتغطى لانها ماتعودت-
حمد:تغطي ياعذبه كفاني عذاب الله بجازيتس بافعالتس صدق تغطي
عذبه تحسست وجهها بيدينها والتفت لجهة المجلى بسرعه وهي ترفع الجلال على راسها:حمد انسى تكفى
حمد:بنسى معليتس بس دامتس بالمطبخ ضبطي شاهي نعناع وسامريني  خاطري ماهوب اشلا
عذبه: شفيك؟
حمد:تعالي لاخلص وانا اقولتس
-فعلاً جهزت عذبه الشاهي والعيال سولفو لين نامو ومحد حس بفقد حمد الا سعود لكنه عرف انه ببكون في السطح وبيقعد يهوجس فقرر انه يتركه يفكر بهدوء والبنات بعد غسلو شعورهم من الحناء ونامو وهم كلهم حماس لبكره أما ابطالنا او على قولة مشعل عصافير الحب فكانو في السطح وقاعدين على ضو القمر وعندهم براد شاهي بالنعناع صغير ويتشاركون الهموم سوا وبينهم مسافه وحدود -
عذبه جلست ومعها الطوفريه والشاهي :اييييه يا ولد عمي من وسع صدرك وطيبك قلطت به العلوم والهموم ..اسلم
حمد ضحك منها صدق: ههههههههههههههههههه عاد بهذي ماصدقتي
عذبه بفهاوه: وراه؟ مب ضايق؟
حمد:ماقلط بذا-اشر على صدره-غير حبتس ولا وطاه الا طاريتس واسمتس
عذبه:اظن القمرى هيضتك ولا انت مستدرجني هنا عشان تقلبها ليلة غزليه؟
حمد:ههههههههههههههههه انتي وراتس؟ ماني مدور فيتس ردى والله ان خاطري ضيق مير شفتس وسلى خاطري
عذبه:هذا وانا مابعد ماسولفت للحين شعاد لا سولفت لك! بتموت ضحك وتطلع علينا الشمس بعد من غير مانحس
حمد:ياليتها تصير يا ليتها
عذبه:حمممد!! اترك عنك هالطبع وعلمني ترى من دخلت البيت وانا شايفه بعيونك علم
حمد:اجل بقولتس لكن اوعديني مايطلع الموضوع لأحد من روحي لروحتس حتى لو جاتس الموت وانحديتي ماتقولينه لأحد
عذبه توترت: حمد العلم كايد؟
حمد:ايه مهب هين بتقدرين؟
عذبه: اي لكن وراك ماقلت لعمي ولا متعب ولا ابوي دام الموضوع كبير ليه مخليه بصدرك بس؟؟
حمد:البلاء ان ابوي عارف تدرين شلون؟انسي انسي
عذبه: علمني ومالك الا اللي يجلي همك
حمد:هههههههههههههههههههههههه الله يعزتس
عذبه: اترك عنك التعزيز وعلمني وش بتسوي؟
حمد: ايييييييه وش بسوي؟ ...-سكت حمد يناظرها شوي ثم ناظر السماء وقال-
بكحل عيونتس وبجدل ظفايرتس
وماضايقتس من هم زكيه يمّي
وبجلس على حافة سريرتس واعطرتس
بأزكى عطور الشعر يا بنت عمي
وبشيل همتس يا أم شيهانه واسامرتس
هذا جزاتس يوم انتس تشيلين همي
عذبه داخلت من قولة "ام شيهانه" :اي ماقلتي لي همك عشان اشيله
حمد:لو تدرين شلون بدلتي حالي لحال ثاني ما لمتيني في قصيدي وغلاتس
-عذبه هنا داخخخخخخخخت وضاعت علومها كلها وغلبها الخجل وسكتت-
حمد: اقول فنجالتس برد يا عذبتي ووراتس ماقلتي صح لسانك ولا ما جاز لتس قصيدي؟
عذبه: شلون ماتجوز لي يا ابو شيهانه؟
حمد: يا الله تتتحححقققههههااا ياااررررربببيييييي
عذبه:ههههههههههههههههههههههههه انت مهبول صدق !! اقصر حسك لحد يقوم ويشوفنا -قالت بخجل بين في صوتها-صح الله لسانك وابياتك بس صدق شلت همك وبدلت حالك؟
حمد: انتي تليتي قلبي تللل وطيرتني فوق هاك الغيوم شفتي القمر ذاك؟-اشر عليه-
عذبه: ايه؟
حمد: احس قلبي صار فوقه من السعاده وتقولين شلتي همي!! انا لو ما اخذ من عمري كله الا هالمقابل بس وهالجلسة بالذات والله ماعاد اشكي من الهم عقبها يا ويلي عليتس ياعذبه احـ...
عذبه توترت: خلاص حمد اسكت لاتقولها لين اصير حلالك
حمد: ان صرتي حلالي ما بقول هالكلمة وبس
عذبه: حمممممد!! قم قم ورانا عرس من الصبح.. قليل ادب-اخذت الطوفريه ونزلت وقلبها بيطلع من مكانه-
حمد وهو منسدح في جلسته ويناظر القمرى: الله يجعلتس نصيبي يابنت اهههههههخخ -نام وهو مبتسم والدنيا ما تاسعه ونسى رايد اللي ما انتبه انه يناظره من دريشة البيت البعيد واللي شبه مهجور ووحده من الغرف كانت تطل على بيت ابو متعب وسطحه بعد وهي اللي كان رايد واقف فيها .. نام حمد لكنه نام متأخر وصحى أبو متعب يصلي الفجر وصحّى العيال كلهم ولا لقى حمد بينهم-
ابو متعب وهو يضرب رجل سعود: قممم وهات قيس الا التيس معك المسجد تلقاه في السطوح قممم
متعب وهو يوضي: بصحيه يبه
فارس:شسالفه؟
طارق: انا لو اني نايم ببيتنا ابرك ويصحيني ابوي بهدوء
ابو متعب: قم لا اطى بطنك انت وابوك اخلص طلعت الشمس ولا تبيها ضحى؟-قال بصوت حاد-هالحين كلكم وراي المسجد -ولامداه يكمل كلامه الا والعيال كلهم متوضين وطالعين وراه الا حمد-
انتهى 💗