"أثر الهناء حلم يا حمد"

البارت الواحد والخمسين

طلعت عذبه لشقة فلاح وفز أول ما سمع صوتها تنادي
رغد:اسم الله عليك! عذوب ترى!الله يغربل اللي مروعك! -قامت بتفتح الباب-
فلاح مسك رغد:اقعععدي انتي ادري انها عذبه، انا بفتح لها واذا نشدتس عن شيء قولي وحم او مدري وشو حق الحمال وما ابي البيت بنطلع الاحساء زين؟واحنا بنطلع الاحساء اصلاً اجهزي
رغد بزعل:شنهو؟ شحقققه تخليها بأصعب اوقاتها!! مابقى شيء يا فلاح على زواجها خلاصصصص!!! خبّرها باللي مهببين عليه وناوينه! طلعها بالصورررة! غممممميظة عليج وعلى حمد تلقى صدره مغتلق الحين ... فلاح لاتسوي سواة اهلي تكفى خلك وياها
فلاح بيأس من طارق:منتي فاهمه يا رغد! السالفه اكبر مني وما اقدر اتصرف! ابوي قرر وانتهى بعدين اختي ما بتنضر بتتزوج على سنه الله ورسوله انا بقعد ببيتي واتحرى ولدي اللي بالطريق وزوجتي
رغد امتلت عيونها دموع:بس فلاح...
عذبه:فلاح!!!! اصواتكم طالعه ادري انكم بالبيت افتحو علامكم!!!بسولف معكم ضاق صدري من بيتنا الكل محتاس ومشغول كأن ورانا عيد ولاعرس
فلاح:خلاصصصص يارغد خلاص ادخلي داخل -تقدم للباب وفتح- شهالحلطمة ذي كلها وانا مابعد فتحت؟ وش بقيتي للي بتقولينه لادخلتي ..
عذبه ضحكت:يازينك يا فلاح قسم بالله انك الحسنة الوحيده ببيتنا مدري وش بسوي بحياتي لو الله ثم وجودك انت ورغد، الا وينها؟ مالها حس
انجرح فلاح من كلام عذبه وكأنها تسقيه السم:رغد؟ موجوده اقلطي انتي وانا بزهمها لتس
عذبه:لالالا خلها اكيد نايمه يقولون الحامل يزيد نومها ياعمري ياهيونن اكيد نفس حال رغد، تعال نسولف كأخوان وعلمني بالسر تكفى
فلاح توتر: اي سر ياعذبه؟ وش سامعه؟
عذبه:ليش ما لمينا عفشنا للحين؟مابنسافر الديرة؟؟ مابنصوم رمضان هناك؟؟؟هزاع وجازي قاعدين يختبرون اخر اختبار لهم خلاص المفروض جهزنا صح ؟
فلاح جلس:بنفطر اول يوم رمضان في الديرة بس بنكمل هالاسبوع هنا
عذبه:ليييه!
فلاح قام:مدري ... عن اذنتس يا عذوب بودي رغد للاحساء عند اهلها قبل نسافر الديره بتجلس عندهم كم يوم
عذبه وقفت بحرج:يافشلتتتتي! اجل كانت تجهز وانا طبيت عليكم! يلا يلا بدور لي شغله لين يجي هزاع يوسع صدري
فلاح:طارق كلمتس؟
عذبه لفت بخوف:عن ويش؟
فلاح لاحظ خوفها:طارق مسوي شيء؟
عذبه خافت يصير شيء بين اخوانها او يضرون حمد:لا يا فليح علامك اليوم؟
فلاح:زين ، عذبه اي شيء ما يجوز لتس بهالدنيا علميني بس انتي جربيه اول زين يابوي؟
مافهمت عذبه مقصد فلاح:ابد ابشر.. يلا اخرتكم سلم على رغد واهلها
فلاح:يوصل .. يا هلا
-نزلت عذبه من جناح فلاح ودخلت بيتهم وشافت امها طالبه خدمة تنظيف المنازل وقاعدين ينظفون الصاله والمجالس-
عذبه فرحت:اخيرًا جو معناته بنسافر وهذي نظافه قبل السفر
حصه:هذي النظافه لعرستس وللناس اللي بيجونا .. بيكون بالبيت
ضحكت عذبه:وعمي سيف شلون يجي وهم سيارتهم غمارتين وهذا كثرهم؟والمعرس للحين بالدوره؟ - راحت للمطبخ تسوي لها شيء تاكله بس دخلت حصه وقالت بقسوه-
حصه:احمدي الله يا بنت انه سترتس وساق لتس الكفو اللي يغطي عليتس ويرضى بتس!!! اعقلي واجهزي الليله عرستس ،فكيني من طاري سيف وولده
عذبه:هاه؟شتقولين يمه؟ حمد بالدوره ماله شهر!
حصه بحده نطقت اسم المعرس:رايد ابن ضاري قدم العرس
عذبه ضحكت بس انتبهت لملامح امها الجديه ولاشعوريًا حست بأيادي كثيره وقويه تخنقها من رقبتها وتسد فمها ماتصيح ولاتبكي والنيران تجري مجرى الدم بعروقها وراسها مع كل شهيق وزفير يكبر ويزيد صداعه وبلحظة انفجرت بكاء:يمممممه شتقولين؟؟؟؟ اي رايد؟؟؟ يمه حمدد! حممد حمد وينه؟؟؟ انا ما انسألت عن رايد شلون يعرس علي!!!
حصه بنفس القساوه:ملك وخلص انا بسوي حفله اعلن فيها عرستس لجيراننا بالشرقيه بس ولا انتي زوجته شرعًا من قبل اسبوعين او اكثر
عذبه طاحت عند رجلين امها:يييييممممممه ابوس رجولتس ما تسويينننننها والله ماصار بيني وبين حمد غير الرسايل وشافها طارق وسوا ذا كله والله ما صار شيء يممممه اخذي روحي بس لاتحرميني حمد لاتزوجيني غيييره طالبتس يمه تكفففين ، تكفييين يمه ما ابي ما ااببيييي يمه إلا حمممد إلا حمد
حصه ضربت عذبه كف على فمها عشان تسكت:اوصصصص!!! تبين الفضايح انتي؟؟؟؟؟؟قلت لتس الرجال شاريتس بذنبتس وساتر عليس وللحين تطردين ورا اللي ماينذكر راعي البلاوي؟؟؟
عذبه:يمه انتي تعرفين حمد اكثر مني تعرفينه يممممه تكفيـ... -وقفت وانطلقت لجهة فلاح تطلبه يساعدها بأمها بس شافته طالع ورغد معه- فللااااااااحححح تكففففى يا اخووووي لاتروح لاتخليني اليومممممممم
التفتت رغد وصاحت بس سحبها فلاح للسياره وسكر باب شقتهم وطلعو
رغد:انا بنززل والله ما اخليييهم يزوجونها اقشر ماتبيه
فلاح:ان رفضتي زواجها خذوتس انتي وولدتس مني
رغد جمدت:منهم!
فلاح:ابوي وطارق...سكري الباب عذبه ما بتموت بتتزوج -حرك متجه للأحساء يسحب نفسه من اللي الحاصل حتى زواجها مايبي يحضره-
عذبه رجعت التفتت لأمها:ييييمه لا! تكفين لا تكفييييييين انا ما ابي غير حمد! يمه لو مسوي شيء ماخطبني تكفين اجلللسي وافهمي تكفييين -مسكت يدين امها وهي تشاهق وخايفه تنجبر فعلاً- ياااااربي ياربي وين ابوووي؟؟؟؟
حصه سحبت يدينها وقلبها موجعها على عذبه:ابوتس مزوجتس وموقع وشاهد اختصري الطريق واجهزي -راحت حصه للخدم وبدأت تأمر وتنهي على الشغل تبي تبتعد عن بكاء عذبه اللي يقطع القلب وعذبه طلعت لغرفتها واخذت الرقم اللي تعتقد انه لحمد وهي اللي سجلته من الكاشف يوم شافته رقم غريب ، اخذت الرقم ونزلت اخذت التليفون وطلعت للغرفه تتصل-
بندر كان يتأمل صورة حمد والبنت اللي معه والندم مآكل قلبه أكل ودق جواله في جيبه وسحبه يكتم الصوت على طول وراح لسريره ورد على الاتصال بدون مايتكلم
عذبه برجااااااااااء وبكاء:حمد! بيحرموني منك تككككفى ياحمممممد تكفى لا تخلييييني بيزوجووني غيرك اهههه حمد جاء وقت وعدك ، لاتخليني... لاتخليييني لرايد .. وطارق..
كان بندر يسمع بكاء وساكت وعذبه ماتسمع غير انفاسه
عذبه:حمممد رد رددددددد!!!! ليه ساكتتتتت ! ليه راضي تكلم؟؟؟؟
بندر شهق وقفل يوم استوعب الموضوع:الله يصيبك يا رايد بمصيبة ما يلحقها فرج! وش مسوووووي بالضعيف انت!!! وش مسووووووي!!!!! سالبٍ عقله وماخذٍ حبيبته ! يووييللي انا وش طحت به!! وش هالمصيبه ذي -غمض بندر يرتب افكاره بس صوت بكاء عذبه ما غاب وقطّع قلبه حال حمد وعذبه وحاول يفكر بحل يحسّن به حال حمد ويرده لعقله ولحبيبته ، وزّى جواله بعد ماقفله تحت فراشه وطلع للميدان وحاول يجيب خطه يوصل فيه لأهل حمد عن طريق اوراقه وبياناته بدون ما يلاحظه اللي موّكل على بندر-
اتجه بندر للعيادة وشاف احمد الممرض مشغول في المكتب: يادكتورعظامي توجعني الظاهر بردت ومرضت وارسلوني عليك اخذ مسكن
احمد وقف للرف اللي قدامه:طيب بعطيك مسكن يخفف آلمك لكن.... وش يعورك بالضبط؟
بندر:ظهري ورجولي
احمد وزع نظراته على الأرفف كامله:انتظر اجل بجيب العلاج ولاترهق نفسك
بندر:انا طالب عسكري كيف ما ارهق نفسي؟
-ضحك احمد وطلع وقرب بندر من مكتبه يشوف اي شيء يدله على حمد بس ما شاف الا ورقه تقرير وفيها نسب مئوية وكلام وشعار الأمن وختم عرف انها تخص حمد ومصيبته وفرق الأوراق اللي حواليها وتحتها وحصل وورقه عليها رقم وجنبه (سرور) اخذ بندر القلم وكتب الرقم في ذراعه ونزل البلوزه على طول وجلس يحتري احمد-
بندر:يارب يطلع هالسرور من اقاربه يااااارب كن مع حمد ونجني من المصيبه ذي واحفظ لي اهلي من شر رايد وخبثه
احمد:خذه اذا حسيت إن الألم أشتد لاتاكله كل شوي قوي على الكلى انتبه..سلامتك يا وحش
بندر:ابشر الله يسلمك -طلع بندر وحضر التمارين وكل تركيزه وتفكيره بحمد والبنت اللي كلمته-
-في الرياض وعلى الظهر-
رجع رايد يتصل على صقر بس قفلت ساره وصحّت صقر يطلع المسجد يصلي
صقر:كم الساعة؟وين جوالي؟
ساره لمست وجهه وجبهته:الحمدلله يا صقر خفت حرارتك والله اني ارتعت عليك بغيت اموت ، قم توضأ والحق الصلاه بالمسجد وانا بجهز الغداء قدامك زين؟ -راحت ساره تطلع ثوبه وعطره وهو يناظرها ومبتسم ومرتاح على حاله معها وقرر ينسى الإنتقام ويعيشون بسعادة لولا اتصال رايد الثالث-
التفتت ساره بقوه:انت تعبان لاتكلم احد
صقر:رايد اللي يتصل
ساره:لاترد وتخوفه على نفسك اجل
صقر:لالا معليتس ... الو؟
رايد وهو يناظر شكل البيت الخارجي صار جااااهز:وييييين الناس؟؟؟؟خذتك بنت سيف وغرقت بنهر الحب؟ههههههههههههههههه الوعد الليله يا ولد ضاري وخلفته
صقر تنهد وغمض:متى؟
رايد ناظر ساعته بيده:الحين بطلع الشرقيه اطلع من عندك ونتقابل هناك
صقر دخلته مشاعر انتقام شرسه وغريبه يوم صارت السالفه جد وجاء وقتها ! ساره عنده وعذبه عند رايد وبيسوون فعلتهم ويحرقون قلوب سيف وفايز على بناتهم وياخذون ثأر ابوهم تنهد بحماس وفتح عيونه وشاف ساره تناظر باستغراب
ساره:شفيك؟
صقر تنح شوي ثم قال:فيه واحد توفى من الجماعه وبيقومون العزاء في الشرقيه عند عياله والرجال من الصبح يتصل يبني احضر واعزي بس اخذني التعب ومارديت عليه
ساره:يعني بنسافر الشرقيه ومنها على الديره!!! الله اخيرًا بشوف البحر مع ان كان ودي اشوف بحر جده لكن مو مشكلة الله يرحم عظام هالشايب يومنه تسفر علي وسفرني الشرقيه .. هذا ثوبك جاهز قم المسجد بنزل ازين غداك ونطلع يلااا يلاا
وقف صقر بالغرفه بعد ما انطلقت ساره للمطبخ وهو مستغرب فرحتها بالسفر وقال : يلا سفرها يبو ضاري وخل ختامها مسك معها

-في بيت ابو متعب-
هيا والهنوف كانو في ييت فايز ويرتبونه
هيا:تصدقين اني متتتتتت من الشوق لأهلي!!!!
الهنوف:تصدقين اني جايه من اختباري انظف بيت عمي؟؟؟؟ بطلع اشوف الحَمَام طيبببب ليش حياتي كلها كرف ومحبوسه بذا الديره!!! بعدين اهلتس الصدق ما ينوله عليهم لولا الحساويه كان ما ساعدتس
هيا ضحكت: يا قل حياتس يا الوصخه تقولينه بوجهي!! خليهم يجون واعلمهم
الهنوف:اخذي حقهم الحين يا الطقوع تبين تحترينهم يجون؟
ام متعب دخلت ومعها مباخر:ما انجزتو للحين!!!! البيت صغير يلا يا بنات! خلصو وبخروه وسكروه وعمتكم دلال بالطريق ، هيا متعب جاب المقضى؟
هيا:لا والله مابعد جاء البيت قال بيجي الضحى ياخذها بس للحين في العزبه
ام متعب:وين ركان يا الهنوف؟بسوي تطلي على الغداء و ما لقيت اغراضه انا ما قلت لتس قبل لاتلهطين مقضى البيت قولي لنا وش اللي بيخلص ؟؟؟ الحين شنسوي ؟ وين اخوتس فيه؟
الهنوف: شدراني يمه اكيد قاعد عند الدكان كل العيال طلعو من الاختبار وراحو هناك
طلعت ام متعب وفتحت الباب نص وبدأت تنادي صالح اللي جاء يركض ومعه غوار ومنصور كان راجع من المسجد ويناظر ام متعب وصالح وتذكر مزون وضحك على نفسه وشوي جاء ركان للبيت وصد منصور ودخل بيتهم وشاف عذاري عندهم
منصور: ياللليل وانتي من جيتي من شهر العسل ذا وانتي ببيتنا؟ ذا كله وله؟عذاري:هذاك قلتها بيتنااااااا مو بيتك لحالك اجي وقت ما ابي
منصور:اها بس! حنا ما زوجناتس عشان اشوفتس عندنا ، وراتس ماغديتي رجلتس وقعدتي ببيتس! جايتنا ذا الوقت ليه!
ام منصور سلمت من الصلاة:اسممممع اختك اسمممع يا منصور! تقول ما تبي ولد السياف ولا العيشه معه لين يبني لها قصرحضرتها اخر عمري اسمع هالحكي والدلع
منصور جلس وسحب شماغه في حضنه:وانتي ساكنه في قصر يوم تشترطين عليه مثل هالكلام؟ارفعي عيونتس شوفي السقف شوفي التلفزيون من أي عهد؟ناظري الطيق السوداء من مدة ابوي رحمة الله عليه هذا بيتس اللي انولدتي فيه وهذي الصاله اللي قطعت امي سري وسرتس فيها ، اما لو كنتي تاكلين بملعقه من ذهب وصحن من فضه كان قلت لا والله ماتطلعين من هالقصر غير لقصر اطيب منه مير تكلفين على الولد وهذي عيشتس ليه! مهب مقصر ولا معيشتس بالمهونه وشوله جايتنا بهالحكي! اسمعي زين لاتخربين علاقتي بخويي بطيش البنات ذا ودلعهم فهمتي ولالا!!!!!! فهمتي؟؟؟؟؟؟؟؟
عذاري ماعرفت كيف تصرف نفسها من غضب منصور بعد كلامه المقنع: لا تقعد تهاوشننني وتصارخ عليييي انا حامل مسكييينه  وتعبت من بيتهم ومن فوز ابي لي شوية خصوصيييه
منصور ناظر امه وضحك بتعجّب:عذاري؟
عذاري:هااه
ام منصور:وشهههوووو؟؟؟؟ حامل؟؟؟؟؟؟؟
منصور:انتي حامل؟ بصير خال يا الحيوانه ولا قلتي غير الحين؟ ينقص لساننني اذا ارتفع عليتس وانتي حامل
عذاري ابتسمت ان خطتها لازالت مستمره بالنجاح
وطلع منصور يعزم تركي الغداء ويصلح الأمور ووافق تركي بس قبل يدخل بيت منصور قال
تركي:طاح الحطب يا منصور؟بترجع؟
منصور غمز له:تقول امي مهرونات الحمل يعني دلع بنيت
ضحك تركي:هرمونااااات هرموناااات ، اشوااا الله يطمنك
منصور:يارجل انا وش يدريني بسوالف ذولا ، اقلط اقلط  يا بووو الا وش بتسمونه؟
تركي ابتسم:على اسم الغالي
منصور:اووووووخص شايع؟
تركي: مبارك
منصور سكت يحاول يشوف جدية تركي من مزحه:تستهبل؟
تركي:لا والله! عساه ياخذ طيب جده بس
حضن منصور تركي بقوه كردة فعل عفويه بعد ما قرر يسمي ولده على اسم ابوه